U Turn (2016) - Kannda Movie Review !!

ഏറെ നിരൂപക പ്രശംസ പിടിച്ചു പറ്റിയ ലൂസിയ (2013) എന്ന ചിത്രത്തിന് ശേഷം അതിന്‍റെ സംവിധായകന്‍ പവന്‍ കുമാര്‍ ഒരുക്കിയ പുതിയ ചിത്രമാണ് U Turn. ഞാന്‍ കണ്ട ആകെ ഒരു കന്നട മൂവി ആയിരുന്നു ലൂസിയ. അത് കൊണ്ട് തന്നെയാണ് അയാളുടെ ഈ പുതിയ ചിത്രവും കാണാന്‍ തീരുമാനിച്ചത്.

Spoilers ahead..
ഇതിലെ നായിക രചന ഒരു ജേര്‍ണലിസ്റ്റ് ആണ്. അവളുടെ ഒരു റിസര്‍ച്ചിന്‍റെ ഭാഗമായി നഗരത്തിലെ തിരക്കേറിയ ഒരു ഫ്ലൈ ഓവറില്‍ നടക്കുന്ന അപകടങ്ങളെ കുറിച്ച് അന്വേഷിക്കുന്നു. തിരക്കില്‍ നിന്നൊഴിവാകാന്‍ വേണ്ടി പലരും റോഡിലെ ഡിവൈഡറിലെ ചില കല്ലുകള്‍ മാറ്റി വെച്ച് u turn എടുത്ത് പോകുന്നത് അവളുടെ ശ്രദ്ധയില്‍ പെടുന്നു. അങ്ങനെ പോകുന്ന വണ്ടികളുടെ നമ്പര്‍ നോട്ട് ചെയ്യാന്‍ അവള്‍ റോഡില്‍ താമസിക്കുന്ന ഒരു വൃദ്ധന് കാശ് കൊടുക്കുന്നുണ്ട്. അങ്ങനെ കിട്ടിയ ഒരു വണ്ടിയുടെ ഉടമസ്ഥനെ അന്വേഷിച്ച് രചന അയാളുടെ വീട്ടില്‍ ചെല്ലുന്നു. ആരും ഇല്ലാത്തത് കൊണ്ട് അവള്‍ മടങ്ങി പോരുന്നു. ആ ദിവസം രാത്രി രചനയെ അന്വേഷിച്ച് പോലീസ് അവളുടെ ഫ്ലാറ്റില്‍ എത്തുന്നു. അവള്‍ അന്വേഷിച്ച് ചെന്ന ആ വണ്ടിയുടെ ഉടമയുടെ മരണവുമായി ബന്ധപ്പെട്ടു അവര്‍ രചനയെ ചോദ്യം ചെയ്യുന്നു. പിന്നീട് അങ്ങോട്ട് രചന നേരിടേണ്ടി വരുന്ന അമ്പരപ്പിക്കുന്ന സംഭവങ്ങളാണ് കഥയുടെ ബാക്കി.

ലൂസിയ പോലെ ഇതും ജനപങ്കാളിത്തത്തോടെ നിര്‍മ്മിച്ച ചിത്രമാണ്‌. വലിയ താരങ്ങള്‍ ഒന്നും തന്നെ ചിത്രത്തില്‍ ഇല്ല. ഇതിന്‍റെ സംവിധായകന്‍ പവന്‍ കുമാര്‍ തന്‍റെ മകളെ സ്കൂളില്‍ ഡ്രോപ്പ് ചെയ്യാന്‍ പോകുമ്പോള്‍ പലപ്പോഴും ഒരു മണിക്കൂറോളം സ്കൂള്‍ പാര്‍ക്കിങ്ങില്‍ വെയിറ്റ് ചെയ്യാറുണ്ട്. ആ സമയങ്ങളില്‍ ആണ് ഈ സ്ക്രിപ്റ്റ് എഴുതിയത്. ചിത്രത്തിന്‍റെ ആദ്യ പകുതി ഗംഭീരമാണ്. പ്രേക്ഷകനെ ചിത്രത്തില്‍ പിടിച്ചിരുത്തുന്ന പല സീനുകളും ഉണ്ട്. പക്ഷെ രണ്ടാം പകുതിയില്‍ ആ ഒരു ത്രില്‍ കിട്ടിയില്ല. ക്ലൈമാക്സ്‌ ആയപ്പോഴേക്കും കഥ വഴി മാറി പോയി. എന്നിരുന്നാലും തരക്കേടില്ലാത്ത ഒരു ത്രില്ലര്‍ മൂവി തന്നെയാണ് U Turn. Waiting for Pawan's next - C10H14N :)

Joker (2016) - Tamil Movie Review !!

എന്‍റെ സുഹൃത്ത് ലിയാസ് ആണ് എന്നോട് ഈ സിനിമയെ കുറിച്ച് പറഞ്ഞത്. അവന്‍ അങ്ങനെ പ്രത്യേകം പറയാറുള്ള സിനിമകള്‍ ഒക്കെ ഞാന്‍ കാണാറുണ്ട്. വലിയ താരങ്ങള്‍ ഒന്നുമില്ലാത്ത ഒരു കൊച്ചു ചിത്രം ആണ് ജോക്കര്‍. ഇതിലെ നായകനെ നിങ്ങളില്‍ പലരും അറിയും, അഞ്ച് സുന്ദരികളിലെ, സേതുലക്ഷ്മി എന്ന ചിത്രത്തിലെ ഫോട്ടോഗ്രാഫറെ അവതരിപ്പിച്ച ഗുരു സോമ സുന്ദരം.

കഥ നടക്കുന്നത് തമിഴ്നാട്ടിലെ ഒരു ഉള്‍നാടന്‍ ഗ്രാമത്തില്‍ ആണ്. മന്നാര്‍ മന്നന്‍ എന്ന നായകന്‍ താന്‍ ഇന്ത്യയുടെ രാഷ്‌ട്രപതി ആണെന്ന് സ്വയം കരുതുകയും, അത് പോലെ മറ്റുള്ളവരോട് പെരുമാറുകയും ചെയ്യുന്ന ഒരാളാണ്. അയാളുടെ വേഷവും വാഹനവും എല്ലാം കൌതുകം ഉള്ളതാണ്. നാട്ടിലെ സാധാരണക്കാരുടെ എല്ലാ പ്രശ്നങ്ങളിലും അയാള്‍ ഇടപെടുന്നു, പരിഹാരം ഉണ്ടാക്കാന്‍ ശ്രമിക്കുന്നു. അതിനു വേണ്ടി അയാള്‍ക്ക് അയാളുടെതായ സമരമുറകള്‍ ഉണ്ട്. അത് കൊണ്ട് തന്നെ സര്‍ക്കാര്‍ ഉദ്യോഗസ്ഥര്‍ക്കും, രാഷ്ട്രീയക്കാര്‍ക്കും, പോലീസിനും ഇയാള്‍ ഒരു സ്ഥിരം തലവേദനയായി മാറുന്നു. എന്നാല്‍ ഇയാള്‍ എങ്ങനെ ഇങ്ങനെ ആയതിന് പിന്നില്‍ വേദനിപ്പിക്കുന്ന ഒരു കഥയുണ്ട്. അതാണ് സിനിമയുടെ ബാക്കി ഭാഗം പറയുന്നത്.

ഇന്ത്യയിലെ 60% ജനങ്ങള്‍ക്കും ഇന്നും സ്വന്തമായി ശൌചാലയം ഇല്ല. ഈ ഒരു ഗൌരവമായ വിഷയമാണ്‌ സിനിമയിലൂടെ പറയുന്നത്. അത് തന്നെയാണ് ഈ സിനിമയുടെ പ്രസക്തിയും. നായകന്‍ ആയി അഭിനയിച്ച ഗുരുവിന്‍റെ പ്രകടനം എടുത്ത് പറയേണ്ടതാണ്‌. അയാള്‍ ആ കഥാപാത്രമായി ജീവിച്ചു എന്ന് തന്നെ പറയാം.സൂപ്പര്‍സ്റ്റാര്‍ രജനികാന്ത് ഈ ചത്രം കണ്ട് ഇതിന്‍റെ അണിയറക്കാരെ അഭിനന്ദിച്ചിരുന്നു. ചിത്രം തമിഴ് നാട്ടില്‍ വിജയം ആയിരുന്നു എന്നാണ് അറിഞ്ഞത്.

Sairat (2016) - Marati Movie Review

Sairat (2016)

ഏതോ ഒരു മൂവി സൈറ്റില്‍ നിന്നാണ് ഞാന്‍ ആദ്യമായി ഈ സിനിമയെ കുറിച്ച് അറിയുന്നത്. Sairat ഈ വര്‍ഷം ഇറങ്ങിയ ഒരു മറാത്തി സിനിമയാണ്. വെറുമൊരു സിനിമയല്ല. അവിടത്തെ ഇത് വരെയുള്ള കളക്ഷന്‍ റെക്കോര്‍ഡ്സ് എല്ലാം തകര്‍ത്ത , അവിടെ ആദ്യമായി 50 കോടിക്ക് മുകളില്‍ കളക്റ്റ് ചെയ്ത , ആമിര്‍ഖാന്‍, അക്ഷയ്കുമാര്‍, അനുരാഗ് കശ്യപ് തുടങ്ങി വരെ ബോളിവുഡിലെ പല പ്രമുഖരും അഭിനന്ദിച്ച സിനിമ. അത് മാത്രമല്ല , UAE-യില്‍ റിലീസ് ചെയ്ത ആദ്യത്തെ മറാത്തി സിനിമ കൂടിയാണ് Sairat. നമ്മുടെ നാട്ടില്‍ പ്രേമം സിനിമ പോലെ അവിടെ ഈ സിനിമ ഒരു ട്രെന്‍ഡ് ആയിരുന്നു. അതിന്‍റെ അത്ഭുതകരമായ വിജയം ഹിന്ദി സിനിമ ലോകത്തെ തന്നെ ഞെട്ടിച്ചു എന്നാണ് കേട്ടത്. ഇത് കൊണ്ടൊക്കെ തന്നെയാണ് ഈ ഇതര ഭാഷ ചിത്രം കാണാന്‍ ഞാന്‍ തീരുമാനിച്ചത്.

Sairat ഒരു പ്രണയ കഥയാണ്. ജാതിയില്‍ താഴ്ന്ന കുടുംബത്തിലെ പയ്യനായ പ്രശാന്തും, ആ നാട്ടിലെ ജന്മി കുടുംബത്തിലെ അംഗമായ അര്‍ച്ചനയും ഒരേ കോളേജില്‍ ആണ് പഠിക്കുന്നത്‌. അവര്‍ തമ്മില്‍ പ്രണയത്തിലാകുന്നു. ഒരിക്കല്‍ അര്‍ച്ചനയുടെ വീട്ടുകാര്‍ അവരെ തെറ്റായ ഒരു സാഹചര്യത്തില്‍ പിടി കൂടുന്നു. വേറെ മാര്‍ഗം ഒന്നും ഇല്ലാത്തത് കൊണ്ട് കൂട്ടുകാരുടെ സഹാത്തോടെ അവര്‍ ഒളിച്ചോടുന്നു. അര്‍ച്ചനയുടെ സഹോദരന്മാരും അവരുടെ ഗുണ്ടകളും അവരെ പിന്തുടരുന്നു. തുടര്‍ന്ന് ഉണ്ടാകുന്ന സംഭവങ്ങളാണ് കഥാസാരം. ചിത്രത്തിന്‍റെ ഇന്‍റര്‍വെല്‍ സീന്‍ ഒരു സിനിമ ആസ്വാദകന്‍ എന്ന നിലയില്‍ എനിക്കേറെ ഇഷ്ട്ടപ്പെട്ടു. തുടര്‍ന്ന് ആരും പ്രതീക്ഷിക്കാത്ത ഒരു ക്ലൈമാക്സ്‌. സ്ഥിരംപ്രണയ കഥകളുടെ വഴികളില്‍ നിന്നു മാറി സഞ്ചരിച്ച ഒരു രീതിയില്‍ അത് എന്നെ കുറച്ചൊന്നു ഞെട്ടിച്ചു.

പുതുമുഘങ്ങള്‍ ആണ് ഇതില്‍ അഭിനയിച്ചിരിക്കുന്നത്. സിനിമ കണ്ടു തുടങ്ങുമ്പോള്‍ അത് വേറൊരു ഭാഷ ചിത്രം ആണെന്ന് നമുക്ക് തോന്നില്ല. നല്ല പാട്ടുകളും ചെറിയ കോമഡികളും എല്ലാം ഉണ്ട്. എനിക്ക് വളരെ അധികം ഇഷ്ട്ടപെട്ടു.

PA VA (2016) - Malayalam Movie Review !!

.
പാവ (2016)

പൊടിമീശ മുളക്കണ കാലം എന്ന മനോഹരമായ ഒരു ഗാനം കുറച്ച് നാള്‍ മുന്‍പ് കേട്ടപ്പോള്‍ തന്നെ കാണണം എന്ന് ആഗ്രഹിച്ചിരുന്ന ഒരു മൂവി ആയിരുന്നു പാവ. നല്ല സിനിമ ആയിട്ടും കബാലിയുടെ കൂടെ ഇറങ്ങിയത് കൊണ്ട് ശ്രദ്ധിക്കപ്പെട്ടില്ല എന്നും കേട്ടിരുന്നു. ഇന്നലെയാണ് സിനിമ കണ്ടത്.

ബാല്യം മുതല്‍ വാര്‍ധക്യം വരെ കൂട്ടുകാരായ രണ്ടു പേരാണ് പാപ്പനും വര്‍ക്കിയും. രണ്ടു പേര്‍ക്കും വലിയ കുടുംബം ഉണ്ട്. പെട്ടെന്നൊരു ദിവസം വര്‍ക്കിച്ചന്‍ മരണപ്പെടുന്നു. അതിന് ശേഷം പാപ്പന്‍റെ ജീവിതത്തില്‍ ഉണ്ടാകുന്ന കാര്യങ്ങളാണ് നര്‍മ്മത്തില്‍ ചാലിച്ച് പറഞ്ഞിരിക്കുന്നത്. വ്യത്യസ്തമായ ഒരു കഥ ആണെങ്കിലും അവതരണത്തില്‍ എന്തൊക്കെയോ അപാകതകള്‍ തോന്നി. കണ്ടു കഴിഞ്ഞപ്പോള്‍ ഒരു തൃപ്തി തോന്നിയില്ല..മുരളി ഗോപിയുടെ വേഷം നന്നായിരുന്നു, അനൂപ്‌ മേനോന് ആ വയസ്സന്‍ വേഷം യോജിക്കാത്ത പോലെ തോന്നി, പ്രത്യേകിച്ച് ആ വിഗ് ഒക്കെ കുറച്ച് ബോര്‍ ആയിരുന്നു. അശോകന്‍, രണ്‍ജി പണിക്കര്‍, രണ്ജിനി, തുടങ്ങിയവര്‍ കൂടെ ചിത്രത്തില്‍ ഉണ്ട്. കുറച്ച് രംഗങ്ങള്‍ നന്നായിരുന്നു എന്നെങ്കിലും കണ്ടു കഴിഞ്ഞപ്പോള്‍ ഒരു തൃപ്തി തോന്നിയില്ല. ചിലര്‍ക്ക് ഇഷ്ടപ്പെട്ടു എന്നും കേട്ടിരുന്നു. താല്പര്യം ഉള്ളവര്‍ക്ക് ചുമ്മാ ഒരു വട്ടം കണ്ടു നോക്കാം എന്ന് മാത്രം. ഗാനങ്ങള്‍ എല്ലാം കൊള്ളാമായിരുന്നു.


വായിക്കാന്‍ ആളുണ്ടെങ്കില്‍ നാളെ മറ്റൊരു ചിത്രത്തിന്‍റെ വിശേഷം ആയി വരാന്‍ ശ്രമിക്കാം. :)

Two Brothers (2004) - English Movie Review !!

Two Brothers (2004)

കുറച്ചു നാള്‍ മുന്‍പേ എന്‍റെ ഒരു സുഹൃത്താണ് എന്നോട് ഈ സിനിമയെ കുറിച്ച് പറഞ്ഞത്. ഇംഗ്ലീഷ് സിനിമകള്‍ അങ്ങനെ കാണാറില്ലെങ്കിലും ഇതിന്‍റെ കഥ കേട്ടപ്പോള്‍ കാണാന്‍ ഒരു താല്പര്യം വന്നു.

കഥ തുടങ്ങുന്നത് ഒരു കാട്ടിലാണ്. അവിടെ ജീവിക്കുന്ന ഒരു കടുവ കുടുംബം. അച്ഛന്‍, അമ്മ, സഹോദരങ്ങളായ രണ്ടു കുട്ടികടുവകള്‍. അവിടെ വന്ന വേട്ടക്കാരില്‍ ചിലര്‍ അച്ഛന്‍ കടുവയെ വെടി വെച്ച് കൊല്ലുന്നു. അമ്മ കടുവ ഒരു കുഞ്ഞിനേയും കൊണ്ട് രക്ഷപ്പെടുന്നു. ഒരു കടുവകുട്ടി അവരുടെ കയ്യില്‍ പെടുന്നു. അവന്‍ ഒരു സര്‍ക്കസ് കമ്പനിയിലും അതിന്‍റെ സഹോദരന്‍ കടുവ പിന്നീട് ഒരു രാജകൊട്ടാരത്തിലും എത്തിപെടുന്നു. ഒരു വര്‍ഷത്തിന് ശേഷം അവര്‍ രണ്ടു പേരും വലിയ കടുവകള്‍ ആയ ശേഷം വേറൊരു സ്ഥലത്ത് വേറൊരു സാഹചര്യത്തില്‍ കണ്ടു മുട്ടുന്നതാണ് കഥാസാരം. ശേഷമുള്ള പല രംഗങ്ങളും നമ്മളുടെ മനസ്സില്‍ സ്പര്‍ശിക്കും.

2004-ല്‍ ആണ് ഈ ചിത്രം പുറത്തിറങ്ങിയത്. ഫ്രാന്‍സിലെയും തായ്‌ലണ്ടിലെയും മൃഗശാലകളില്‍ നിന്നുള്ള മുപ്പതോളം കടുവകളെയാണ് ഈ സിനിമയില്‍ ഉപയോഗിച്ചിരിക്കുന്നത്. വളരെ രസകരമായ സിനിമയാണ്. കുട്ടികളുടെ കൂടെ കാണാന്‍ ശ്രമിക്കുക. അവര്‍ക്ക് നമ്മളെക്കാള്‍ കൂടുതല്‍ ആസ്വദിക്കാന്‍ കഴിയും.

പൊന്ന് പോലൊരു കാക്കകുഞ്ഞ് !!

ഒരു അഞ്ചാറ് മാസം മുന്‍പ് ഉപ്പാക്ക് റോഡില്‍ നിന്നും ഒരു കാക്ക കുഞ്ഞിനെ കിട്ടി. ഉപ്പ അതിനെ വീട്ടിലേക്ക് എടുത്ത് കൊണ്ട് വന്നു. അതിന് ഭക്ഷണവും വെള്ളവും കൊടുത്തു. അത് പിന്നെ ഉപ്പാടെ അടുത്ത് നിന്നു പോയില്ല. വീട്ടിലും പറമ്പിലും ഒക്കെ ആയി കൂടി. പൊതുവേ മനുഷ്യനുമായി ഇണങ്ങാത്ത ഒരു പക്ഷി ആണല്ലോ കാക്ക, ഇത് പക്ഷെ അങ്ങനെ അല്ല. ഉപ്പയുമായി നല്ല ചങ്ങാത്തം ആയി. ഉപ്പ വീട്ടില്‍ നിന്നും പോകുമ്പോളും വരുമ്പോളും ഒക്കെബൈക്കില്‍ കൂടെ ഉണ്ടാകും. കാലത്ത് ഉപ്പാനെ വിളിക്കുന്നതും അവന്‍ തന്നെ. ഉപ്പ കേച്ചേരി പോയി വരുമ്പോള്‍ അവന് കഴിക്കാന്‍ എന്തെങ്കിലും വാങ്ങി കൊണ്ട് വരും. കാലത്ത് ഉപ്പ ഉണരാന്‍ വൈകിയാല്‍ ശബ്ദം ഉണ്ടാക്കി ഉണര്‍ത്തും. ഉപ്പാനെ ഫോണ്‍ വിളിക്കുമ്പോള്‍ എല്ലാം കാക്കയുടെ ശബ്ദം കൂടെ കേള്‍ക്കാറുണ്ട്. എന്തിനേറെ പറയുന്നു കുറച്ചു നാളുകള്‍ കൊണ്ട് അവന്‍ വീട്ടിലെ ഒരു അംഗത്തെ പോലെയായി. കുറച്ച് ദിവസം മുന്‍പ് CC TV-യില്‍ നിന്നും ആരോ ഒരു സ്റ്റോറിക്ക് വേണ്ടി വരട്ടെ എന്ന് ചോദിച്ചിരുന്നത്രേ, പക്ഷെ ഉപ്പ വേണ്ട എന്ന് പറഞ്ഞു.



വീട്ടില്‍ പോകുന്ന ചില സുഹൃത്തുക്കള്‍ ചില ഫോട്ടോസും വീഡിയോസും ഒക്കെ എനിക്ക് അയച്ചു തരാറുണ്ട്. മക്കള്‍ ഒക്കെ ഉപ്പാട് എന്നും അതിന്‍റെ വിശേഷം ഒക്കെ ചോദിക്കും. രണ്ടു മൂന്നു മാസം കഴിഞ്ഞ് നാട്ടില്‍ പോകുമ്പോള്‍ നേരില്‍ കാണാം എന്ന് കരുതി ഇരിക്കുവായിരുന്നു. പക്ഷെ ഇന്നലെ വൈകീട്ട് ആ കാക്ക കുഞ്ഞ് ചത്ത്‌ പോയി. അപ്പോള്‍ തൊട്ട് ഉപ്പ ആകെ ടെന്‍ഷന്‍ ആയി ഇരിക്കുകയാണ്. ഞാന്‍ വിളിക്കുമ്പോള്‍ ഭക്ഷണം പോലും കഴിച്ചിട്ടില്ല. അടുത്തൊന്നും ആളെ ഇങ്ങനെ വിഷമിച്ച് ഞാന്‍ കണ്ടിട്ടില്ല. ഞാന്‍ വിളിച്ചപ്പോള്‍ പറഞ്ഞു ഇത്ര ബുദ്ധിയുള്ള ഒരു പക്ഷിയെ ഞാന്‍ ജീവിതത്തില്‍ കണ്ടിട്ടില്ല എന്ന്. കാശ് കൊടുത്താല്‍ ഇനി അങ്ങനെയൊന്നിനെ വാങ്ങിക്കാന്‍ പറ്റിലല്ലോ എന്നും. എല്ലാരും പറഞ്ഞ് പറഞ്ഞ് അവരുടെ കാര്യങ്ങള്‍ അറിയാവുന്ന കാരണം എനിക്കും ഇന്നലെ തൊട്ടു ഒരു സുഖം തോന്നുന്നില്ല. ഇങ്ങനെയൊക്കെ സംഭവിച്ചാലോ എന്ന പേടി കാരണം ഞാന്‍ കുറെ നാളായി ഒരു പൂച്ചയെ പോലും വീട്ടില്‍ വളര്‍ത്താറില്ല. അവറ്റകള്‍ക്ക് എന്തെങ്കിലും സംഭവിച്ചാല്‍ അതിന്‍റെ വിഷമം മാറാന്‍ എളുപ്പമല്ല. എന്‍റെ മുന്‍കാല അനുഭവങ്ങള്‍ അങ്ങനെയാണ്.

കമ്മീഷണര്‍ (1994) - ഷാജി കൈലാസ് - സുരേഷ് ഗോപി - രണ്‍ജി പണിക്കര്‍.

തലസ്ഥാന നഗരം - പകല്‍

മോഹന്‍ തോമസിന്‍റെ അനിയന്‍ സണ്ണിച്ചനെ കോളേജില്‍ പോയി പിടിച്ചു കൊണ്ട് നടുറോഡിലൂടെ നടന്നു വരുന്ന ഭരതും, അന്‍വറും പ്രസാദും. സംഘര്‍ഷഭരിതമായ അന്തരീക്ഷം. ജനങ്ങള്‍ നാല് പാടും ചിതറി ഓടുന്നു. അപ്പോള്‍ അവിടേക്ക് കാറില്‍ വന്നിറങ്ങുന്ന IG രാജന്‍ ഫെലിക്സും മേനോനും വഴിയില്‍ വെച്ച് അവരെ തടയുന്നു. സണ്ണിയെ അറ്റസ്റ്റ് ചെയ്യാനുള്ള വാറണ്ട് കാണിച്ച് അവര്‍ അയാളെ അവരുടെ കസ്റ്റഡിയില്‍ നിന്നും മോചിപ്പിക്കുന്നു. അന്‍വറിന്‍റെ നേരെ തട്ടിക്കയറുന്ന സണ്ണിയെ അടിക്കാന്‍ ഓങ്ങുന്ന ഭരതിനെ തടയുന്ന രാജന്‍ ഫെലിക്സ്. അതോടെ രോഷകുലനാകുന്ന ഭരത്.

ഭരത് : കാക്കിയിട്ടവന്‍റെ നേരെ കൈയോങ്ങിയാൽ തനിക്കു നോവില്ല. കൂട്ടത്തിലൊരുത്തൻ ചങ്കു കീറി ചോരയൊലിപ്പിച്ചു നിക്കുന്നതു കണ്ടാലും തനിക്കു നോവില്ല. പക്ഷേ, തന്‍റെ മുന്നിൽ വെച്ച് ഈ പൊലയാടി മോന്‍റെ രോമത്തില്‍ തൊട്ടാ തനിക്കു നോവും, അല്ലേടാ പന്ന പൊലയാടി...

രാജന്‍ ഫെലിക്സ്‌ : പ്ഫാ, നായെ..

ഹും, നായ...എടൊ, മോഹന്‍ തോമസിന്‍റെ ഉച്ചിഷ്ട്ടവും അമേദ്യവും കൂട്ടികുഴച്ചു നാല് നേരം മ്രിഷ്ട്ട്ടാനം വെട്ടി വിഴുങ്ങി, ഏമ്പക്കവും വിട്ടു, ആസനത്തില്‍ വാലും ചുരുട്ടി വെച്ച് അവന്‍റെയൊക്കെ കാല്‍ച്ചുവട്ടില്‍ കിടക്കുന്ന തന്നെയും ഇവനെയും പോലുള്ള പരമ നാറികള്‍ക്കേ ആ പേര് ചേരൂ..എനിക്ക് ചേരില്ല...ഓര്‍ത്തോ... I Am Barath Chandran..Just Remember That..!!

സണ്ണിയെ തള്ളി മാറ്റി കൊണ്ട് ഭരതും അന്‍വറും പ്രസാദും സ്ലോമോഷനില്‍ നടന്ന് വരുമ്പോള്‍ അവിടെയുള്ള പോലീസ്കാര്‍ രണ്ടു ഭാഗത്തേക്ക് മാറി നിന്ന് ഭരതിന് സല്യൂട്ട് അടിക്കുന്നു. രാജാമണിയുടെ ത്രസിപ്പിക്കുന്ന ആ ബാക്ക്ഗ്രൌണ്ട് മ്യൂസിക്കിന്‍റെ അകമ്പടിയോടെ അന്ന് സുരേഷ് ഗോപി നടന്നു കയറിയത് പ്രേക്ഷകരുടെ മനസ്സിലേക്ക് ആയിരുന്നു. ഒരു സൂപ്പര്‍സ്റ്റാറിന്‍റെ ഉദയം അവിടെ നിന്നായിരുന്നു.


ഒരു കാലഘട്ടത്തെ രോമാഞ്ചം കൊള്ളിച്ച ആ ഇന്‍റര്‍വല്‍ സീന്‍. 21 വര്‍ഷങ്ങള്‍ക്ക് ശേഷം ഇന്ന് കാണുമ്പോളും അതേ ആവേശം. കഴിഞ്ഞ അവധിക്ക് തിരുവനന്തപുരം പോയപ്പോള്‍ എന്‍റെ സുഹൃത്ത്‌ ആ ലോക്കേഷന്‍ എനിക്ക് കാണിച്ചു തന്നു. യൂണിവേര്‍‌സിറ്റി കോളേജിന്‍റെ മുന്‍പിലാണ് ആ രംഗം ഷൂട്ട്‌ ചെയ്തത്. അന്ന് യാതൊരു തയ്യാറെടുപ്പും ഇല്ലാതെ ബൈജുവിനെയും, സുരേഷ്ഗോപിയും കൂട്ടരെയും റോഡിലേക്ക് ഇറക്കിയാണ് ഷാജി ആ സീന്‍ എടുത്തത്. അന്ന് ആ വഴി വന്നവരൊക്കെ എന്താണ് നടക്കുന്നത് എന്നറിയാതെ പകച്ചു നിന്നു. വണ്ടികളില്‍ ഉണ്ടായിരുന്നവര്‍ കാര്യമറിയാന്‍ വേണ്ടി എത്തി നോക്കി. ഇന്നും ആ രംഗം ശ്രദ്ധിച്ചാല്‍ മനസ്സിലാകും. അതിന് ഇത്ര ഒറിജിനാലിറ്റി കിട്ടിയത് ഷാജിയുടെ സംവിധാന മികവു കൊണ്ടാണ്. പിറ്റേ ദിവസത്തെ പേപ്പറിലും ആ ആഴ്ചത്തെ വനിതയിലും ഇതിന്‍റെ വാര്‍ത്തയും ചിത്രങ്ങളും ഉണ്ടായിരുന്നു. ഇതൊക്കെ തിരുവനന്തപുരത്തുള്ള ഒരാള്‍ തന്നെ പറഞ്ഞുള്ള അറിവാണ്.

നിങ്ങളില്‍ എത്ര പേര്‍ക്ക് കമ്മീഷണര്‍ തിയ്യറ്ററില്‍ നിന്നും കാണാനുള്ള ഭാഗ്യം കിട്ടിയിട്ടുണ്ട് എന്നറിയില്ല. എന്തായാലും എനിക്ക് കാണാന്‍ പറ്റിയിട്ടില്ല. അന്ന് രാമദാസില്‍ ഏയ്‌ ഹീറോ കാണാന്‍ മാറ്റിനിക്ക് പോയപ്പോള്‍ കമ്മീഷണര്‍ നൂണ്‍ഷോ ഓടുന്നുണ്ടായിരുന്നു. അന്ന് ഫസ്റ്റ് ക്ലാസ്സിന്‍റെ വാതിലിന്‍റെ അടുത്ത് നിന്നപ്പോള്‍ അകത്ത് നിന്നും ക്ലൈമാക്സ്‌ ഫയിറ്റിന്‍റെ ശബ്ദം കേട്ടിരുന്നു. അന്ന് അത് കാണാന്‍ പറ്റാത്ത വിഷമം കുറച്ചെങ്കിലും മാറിയത് പിന്നെ 11 വര്‍ഷത്തിന് ശേഷം ഭരത് ചന്ദ്രന്‍ IPS (2005) ഫസ്റ്റ് ഡേ സപ്നയില്‍ നിന്നും കണ്ടപ്പോളാണ്. അതും ഒരു ഒന്നൊന്നര ഷോ ആയിരുന്നു. പക്ഷെ ഇന്നും ഒരു സിനിമ റീറിലീസ് ആഗ്രഹിക്കുന്നെണ്ടെങ്കില്‍ അത് കമ്മീഷണര്‍ ആയിരിക്കും