ആടുതോമയും കുറ്റിക്കാടനും !!

സ്‌ഫടികം ഇറങ്ങി 25 വർഷങ്ങൾ ആയത് കൊണ്ട് ഇന്നലെ സിനിമ ഒന്നൂടെ കണ്ടു. തോമയും കുറ്റിക്കാടനും തമ്മിൽ പത്തോളം സീനുകൾ ആണ്‌ ഉള്ളത്. അതിൽ എന്താ രസമെന്ന് വെച്ചാൽ അതിൽ ഏറെക്കുറെ എല്ലാ സീനിലും ഇവർ തമ്മിൽ അടിയാണ്. ഒന്നോർത്താൽ കുറ്റിക്കാടന്റെ കാര്യം കഷ്ടമാണ്. തോമയുടെ അടി കുറച്ചൊന്നുമല്ല അയാൾ വാങ്ങി കൂട്ടിയത്.

തോമ ആദ്യമായി സ്റ്റേഷനിൽ വന്ന ദിവസം . അന്ന് മാത്രമാണ് തനിക്ക് അവനെ ശരിക്കൊന്ന് തല്ലാൻ കിട്ടിയത് . തോമ തിരിച്ച് തല്ലാൻ ഓങ്ങുമ്പോളെക്കും പെങ്ങൾ കേറി തടഞ്ഞു , അത് കൊണ്ട് അവൻ അന്ന് ഒന്നും ചെയ്തില്ല . പിന്നെ അവന്റെ കൊച്ചാപ്പൻ ഒരു പരട്ട വക്കീലിനെയും കൊണ്ട് വന്ന് അവനെ പുറത്തിറക്കി. അന്നേരം ഒരു പഞ്ചിന് അവനൊരു വടിയും കൊടുത്ത് വിട്ടതാ. പക്ഷെ അവിടെ നിന്ന് തൊട്ട് തന്റെ കഷ്ടകാലം തുടങ്ങി. പിന്നെയങ്ങോട്ട് നിലം തൊട്ടിട്ടില്ല.

ഭാര്യയേയും കൂട്ടി മനഃസമാധാനമായി സിനിമ കാണാൻ വന്നപ്പോളാണ് തോമ തിയറ്ററിൽ വന്ന് അലമ്പുണ്ടാക്കിയത് . ഭാര്യയെ വീട്ടിൽ കൊണ്ടാക്കി യൂണിഫോം ഇട്ട് വന്നതാ, തോമ അറഞ്ചം പുറഞ്ചം തല്ലി. തലയിലൂടെ മുണ്ടിട്ട് SI സോമനെ ചെയ്ത പോലെ കിണറ്റിൽ തള്ളിയിടാൻ നോക്കി. എന്തോ തോമ അത് ചെയ്യാതെ വിട്ടു. ഉള്ള ജീവനും കൊണ്ട് അന്ന് രക്ഷപെട്ടു.

അതിന് പകരമായി തോമായെ പിടിക്കാൻ ലൈലയുടെ വീട്ടിൽ ചെന്നപ്പോൾ അവിടെയും തോമ തന്നെ എടുത്തിട്ട് പെരുക്കി. തോക്ക് ഉണ്ടായത് ഭാഗ്യമായി. ഒടുവിൽ അത്
കാണിച്ചാണ് അവനെ കീഴടക്കിയത്. അല്ലെങ്കിൽ അന്നും അടി കൊണ്ട് ചത്തേനെ.

തോമയെയും ലൈലയെയും വിലങ്ങ് വെച്ച് ചന്തയിലൂടെ നടത്തി സ്റ്റേഷനിൽ കൊണ്ട് വന്നു. ലോക്കപ്പിൽ കയ്യ് കെട്ടിയിട്ട് അടിക്കാൻ ചെന്നപ്പോൾ അവിടെയും തോമയുടെ കുറേ ചവിട്ട് കൊണ്ടു. തിരിച്ച് തല്ലാൻ നിന്നപ്പോളേക്കും ആ SP വിളിച്ചു. തോമ കൂളായി ഇറങ്ങി പോയി.. ശല്യങ്ങൾ.

ജഡ്ജിയുടെ ഗേറ്റ് പൂട്ടിയിട്ട കേസിൽ തോമയെ അറസ്റ്റ് ചെയ്യാൻ പോയപ്പോൾ ഒരു കാര്യവും ഇല്ലാതെ തോമയുടെ അമ്മയെ പിടിച്ച് തള്ളി. അതിനും കിട്ടി തോമയുടെ ചവിട്ട് നെഞ്ചത്ത് തന്നെ. ഒടുക്കം അവന്റെ തന്തയുടെ സഹായത്തോടെ തോമായെ പിടിച്ച് കൊണ്ട് പോയി ഗേറ്റിൽ പൂട്ടിയിട്ട് തല്ലാമെന്ന് വെച്ചതാ. അപ്പോളേക്കും ആ ജഡ്ജ് തന്നെ വന്ന് തോമയെ തുറന്ന് വിടാൻ പറഞ്ഞു. അപ്പോളും തോമ രക്ഷപ്പെട്ടു.. നാശം.

തോമ തന്റെ ശിങ്കിടികളെയും കൂട്ടി വീട്ടിൽ വന്ന് ഭീഷണി പെടുത്തി പോയി. അതും തന്റെ ഭാര്യയുടെ മുൻപിൽ വെച്ച്. അവന്റെ പെങ്ങളുടെ കല്യാണം അടുത്തത് കൊണ്ട് എന്തോ ഭാഗ്യത്തിന് അന്ന് അടി കിട്ടാതെ രക്ഷപ്പെട്ടു . തനിക്ക് നേരിട്ട് തോമായെ ഒന്നും ചെയ്യാൻ പറ്റില്ലെന്ന് മനസ്സിലായി. അങ്ങനെയാണ് പൂക്കോയെ കൊണ്ട് കാശ് കൊടുത്ത് തോമയെ കൊല്ലാൻ തൊരപ്പനെ ഇറക്കുന്നത്. പക്ഷെ തോമ ചത്തില്ല.. കോപ്പ്.

തന്നെ കുത്തിയ തൊരപ്പനെ ഇറക്കിയത് ആരാണെന്ന് മനസ്സിലായ തോമ ഹോസ്പിറ്റലിൽ നിന്നിറങ്ങി ഒരു വരവ് വന്നു . മാർക്കറ്റിൽ എല്ലാരുടെയും മുൻപിൽ വെച്ച് തന്നെ അടിച്ച് വീഴ്ത്തി. കൊല്ലാൻ വേണ്ടി വെട്ടുകത്തിയും എടുത്ത് വന്നതാ, ആ തുളസി വന്ന് തടഞ്ഞ കാരണം കഷ്ടിച്ച് രക്ഷപ്പെട്ടു, അല്ലെങ്കിൽ അവിടെ തീർന്നേനെ തന്റെ കഥ .

അവസാന ശ്രമം എന്ന നിലക്കാണ് വണ്ടിയിൽ ബോംബ് വെച്ച് തോമായെ കൊല്ലാൻ നോക്കിയത് . പക്ഷേ കൂടെ ജോലി ചെയ്യുന്ന ആ പാച്ചുപിള്ള കൃത്യ സമയത്ത് തോമായെ വിവരം അറിയിച്ചു. അവൻ അവിടെ നിന്നും രക്ഷപ്പെട്ടു. ഓരോ പാരകൾ .

എന്നാൽ പിന്നെ ആ ഗ്യാപ്പിൽ തോമയെ കൊല്ലാൻ നോക്കിയെന്നും പറന്ന് തോമയുടെ അപ്പനെ അകത്താക്കാം എന്ന് വെച്ചതാ. അത് പക്ഷേ കയ്യാങ്കളി ആയി , അപ്പോളേക്കും തോമ വന്ന് വീണ്ടും ഇടി തുടങ്ങി. ഇത്രേം പോലീസ് ഉണ്ടായിട്ടും തോമായെ തളക്കാൻ പറ്റിയില്ല. എന്നാൽ വെടി വെച്ച് വീഴ്ത്താം എന്ന് കരുതിയപ്പോളാണ് ആ തന്തപ്പടി ഒരു കാര്യവുമില്ലാതെ അതിന്റെ മുൻപിലേക്ക് ചാടിയത്. തോമ വീണ്ടും രക്ഷപ്പെട്ടു. ഓരോ കുരിശുകൾ.

ഇനി അവിടെ നിന്നാൽ പന്തിയല്ലെന്ന് മനസ്സിലായി ഓടി രക്ഷപ്പെടാൻ ശ്രമിച്ചതായിരുന്നു, പക്ഷേ തോമ ജീപ്പുമായി പിന്നാലെ വന്ന് ഇടിച്ചിട്ടു. ജീപ്പിൽ കൈ വിലങ്ങ് ഇട്ട് പൂട്ടി ആ പാറമടയുടെ മുകളിൽ നിന്ന് വണ്ടിയോടെ തള്ളിയിട്ടു. തക്ക സമയത്ത് പുറത്തേക്ക് ചാടി അവൻ രക്ഷപ്പെട്ടു. അലവലാതി. താനും വണ്ടിയും താഴേക്ക് പതിച്ചു. ടമാർ പടാർ.. എല്ലാം ശുഭം !!

Ranjith as Kalathil Ramanunni !!

പെറ്റ തള്ള പറഞ്ഞു രാമനുണ്ണിക്ക് ഭ്രാന്താണെന്ന്, ചങ്ങാതിമാർ പറഞ്ഞു , നാട്ടുകാർ പറഞ്ഞു , അങ്ങനെ സ്വന്തക്കാരും അന്യരും പറഞ്ഞിട്ടും ഞാൻ ആരുടെ മുന്നിലും നിഷേധിച്ചില്ല. കാരണം അത് സത്യാണ്. ആ ഭ്രാന്തിന് വർഷങ്ങളുടെ പ്രായമുണ്ട്. ആ ഭ്രാന്തും കൊണ്ടാ രാമനുണ്ണി വളർന്നത്. രാമനുണ്ണിക്ക് ഇഷ്ടാ അത് , വളരെ. എന്നെക്കാളും എനിക്കിഷ്ടാ ഇന്ദു നീ എന്ന ഭ്രാന്തിനെ.

ഞാൻ സംഗീതം പഠിച്ചിട്ടില്ല , തമ്പുരാക്കൻമാരുടെ പരമ്പരയുമല്ല. എന്ന് വെച്ച് എനിക്കിഷ്ട്ടപ്പെട്ടൂടെ ഒരു പെണ്ണിനെ?
പക്ഷേ പിഴച്ചു പോയി. നിന്നെ കിട്ടാൻ വേണ്ടി ഞാൻ പെട്ട പാടൊക്കെ വെറുതെയായി.

ഇപ്പോൾ പോലീസ് നിർത്താതെ ഓടുന്നുണ്ട്. പിടി ഞാൻ കൊടുക്കും. കോടതിയും ജയിലും കുറച്ചു നാളത്തെ കളി വേണ്ടി വരും. പക്ഷേ ഇറങ്ങി പോരും ഞാൻ.

ഈ ഡയലോഗ് ഇഷ്ടമായത് കൊണ്ട് ചുമ്മാ എഴുതിയതാണ്. ചന്ദ്രോത്സവം സിനിമ പോലെ തന്നെ ഇഷ്ട്ടമാണ് രഞ്ജിത്തിന്റെ ഈ വില്ലൻ വേഷം. കളത്തിൽ രാമനുണ്ണി. പടത്തിൽ ആ ചെട്ടിയാർ പറഞ്ഞ പോലെ "തെളിവിന് നീ നിക്കണ സ്ഥലത്തെ മണ്ണ് പോലും ഉണ്ടാകില്ല . അതും കൂടെ കത്തിച്ച് കടലിൽ കലക്കണ പാർട്ടിയാ രാമനുണ്ണി.

നടി പ്രിയാ രാമന്റെ ഭർത്താവ് കൂടിയാണ് ശ്രീ രഞ്ജിത്ത്. ഈ സിനിമ ചെയ്ത അതേ വർഷം (2005) തന്നെയാണ് പുള്ളി രാജമാണിക്യത്തിലെ വില്ലനായ സൈമൺ നാടാർ ആയി വന്ന് കിടുക്കിയത് . ഇനിയും നല്ലൊരു വില്ലൻ വേഷത്തിൽ ആളെ കാണുവാൻ ആഗ്രഹമുണ്ട്.

MGR Nagaril (1991) - In Harihar Nagar Tamil Remake

മഹാദേവന്‍, തോമസ്കുട്ടി. ഗോവിന്ദന്‍ കുട്ടി, അപ്പുക്കുട്ടന്‍, സേതുമാധവന്‍, സേതുവിന്‍റെ സിസ്റ്റര്‍ മായ, ആണ്ട്രൂസ്, സിസ്റ്റര്‍ ജോസ്ഫൈന്‍. ജോണ്‍ ഹോനായി.



ഇന്‍ ഹരിഹര്‍ നഗര്‍ തമിള്‍ റീമേക്ക്, MGR നഗറില്‍. ഇന്നലെ അവിചാരിതമായി K ടീവിയില്‍ കണ്ടത്. ഉറക്കം വരാത്തത് കൊണ്ട് മുഴുവന്‍ ഇരുന്നങ്ങ് കണ്ടു. സ്ക്രിപ്റ്റില്‍ തമിഴ് സിനിമകള്‍ക്ക് അനുസരിച്ച് ചെറിയ മാറ്റം ഉണ്ട്, പിന്നെ ഇടയില്‍ ആണ്ട്രൂസും ആനി ഫിലിപും കൂടെ ഒരു ഡ്യൂയറ്റ്, ആണ്ട്രൂസും ഹോനായിയും കൂടെ ഒരു ഫൈറ്റ്, ക്ലൈമാക്സില്‍ ഹോനായി പെട്ടി വാങ്ങാന്‍ വരുമ്പോള്‍ അമ്മച്ചിയുടെ കൂടെ ആ വീട്ടില്‍ മായയും ഉണ്ട്. ഹോനായിയെ അമ്മച്ചി കൊല്ലുന്നതായിട്ടാണ് എടുത്തിരിക്കുന്നത്. നല്ല ഗാനങ്ങള്‍, സംഗീതം S.ബാലകൃഷ്ണന്‍ തന്നെയാണ് എന്ന് നെറ്റില്‍ കണ്ടു.

അവസാനം മായ യാത്ര പറഞ്ഞു പോകുമ്പോള്‍ വേറെ കാറില്‍ വേറൊരു പെണ്‍കുട്ടിയും കുടുംബവും വരുന്നു, മഹാദേവനും കൂട്ടരും ആ പെണ്‍കുട്ടിയുടെ പിന്നാലെ പോകാന്‍ തുടങ്ങുന്നിടത്ത് പടം തീരുന്നു. സംവിധാനം ആലപ്പി അഷ്‌റഫ്‌.

തിരിച്ചു കിട്ടുമോ ആ പഴയ ജയറാമിനെ?

ദൂരദര്‍ശനില്‍ സിനിമകള്‍ കണ്ട് തുടങ്ങിയ കാലം തൊട്ടേ ജയറാമിന്‍റെ സിനിമകള്‍ എനിക്ക് ഇഷ്ട്ടമായിരുന്നു. പിന്നീട് കാസ്സറ്റുകള്‍ വാടകക്ക് എടുത്ത് കണ്ടിരുന്ന സമയത്തും ജയറാമിന്‍റെ പഴയ സിനിമകളും തിരഞ്ഞെടുത്ത് കണ്ടിരുന്നു. വിറ്റ്നസ്, കാവടിയാട്ടം, വചനം, വര്‍ണ്ണം, മൂന്നാം പക്കം, അയലത്തെ അദ്ദേഹം അങ്ങനെ കുറേ സിനിമകള്‍. പിന്നീട് ഹൈ സ്കൂള്‍ സമയം ആയപ്പോളേക്കും ജയറാമിന് കുറേ ഹിറ്റുകള്‍ ഉണ്ടായിരുന്നു. മേലേപറമ്പില്‍, CID ഉണ്ണികൃഷ്ണന്‍, അനിയന്‍ബാവ, ആദ്യത്തെ കണ്മണി, പുതുകോട്ട അങ്ങനെ കുറേ സിനിമകള്‍, ജയറാമിന്‍റെ ഏതൊരു സിനിമക്കും മിനിമം ഗാരണ്ടി ഉണ്ടായിരുന്ന സമയം. കോളജില്‍ ചേര്‍ന്ന സമയത്ത് ആദ്യമായി ഒരു സിനിമക്ക് ഒറ്റക്ക് പോയതും ജയറാമിന്‍റെ ഒരു സിനിമ ആയിരുന്നു. തൂവല്‍ കൊട്ടാരം. പിന്നെ ദില്ലിവാല, കളിവീട്, ഇരട്ടകുട്ടി, കഥാനായകന്‍, സൂപ്പര്‍മാന്‍, അരമനവീട്, കിലുകില്‍ പമ്പരം, കാരുണ്യം, സമ്മര്‍, അപ്പൂട്ടന്‍, വീട്ടുകാര്യങ്ങള്‍, ഫ്രണ്ട്സ്, പട്ടാഭിഷേകം, അങ്ങനെ കൈ നിറയെ ഹിറ്റുകള്‍ ആയി പുള്ളി നിറഞ്ഞു നില്‍ക്കുന്ന സമയം. ശരിക്കും ഒരു ജനപ്രിയ നായകന്‍ തന്നെ എന്ന് പറയാം.




പക്ഷെ 2000-ന് ശേഷം പിന്നീട് ജയറാമിന്‍റെ ഗ്രാഫ് താഴെ പോകുന്ന കാഴ്ചയാണ് കണ്ടത്. നാടന്‍ പെണ്ണ്‍, മില്ലേനിയം, വക്കാലത്ത്, ഷാര്‍ജ, നാറാണത്ത്, ഇവര്‍, സല്‍പേര്, ഫിങ്കര്‍പ്രിന്‍റ്, ആലീസ്, പൌരന്‍, സര്‍ക്കാര്‍ ദാദ, മധു ചന്ദ്ര ലേഖ, മൂന്നാമതൊരാള്‍, കനക സിംഹാസനം, അഞ്ചില്‍ ഒരാള്‍ അര്‍ജുനന്‍, സൂര്യന്‍, നോവല്‍, പാര്‍ഥന്‍, സമസ്ത കേരളം, വിന്‍റര്‍, രഹസ്യ പോലീസ്, കാണാ കണ്മണി, മൈ ബിഗ്‌ ഫാദര്‍, തുടങ്ങി സീത കല്യാണം, ഫോര്‍ ഫ്രണ്ട്സ്, കുടുംബ ശ്രീ, വാലിഭന്‍,സ്വപ്ന സഞ്ചാരി, നായിക, ഞാനും എന്‍റെ ഫാമിലിയും, തമ്പാന്‍, മാന്ത്രികന്‍, മദ്രാസി, ലക്കി സ്റ്റാര്‍, ഭാര്യ അത്ര പോര, ജിഞ്ചര്‍, സലാം കശ്മീര്‍, ഒന്നും മിണ്ടാതെ, ഉത്സാഹ കമ്മിറ്റി, ഞങ്ങളുടെ വീട്ടിലെ അതിഥികള്‍, മൈലാഞ്ചി മൊഞ്ചുള്ള, സാര്‍ സിപി, തിങ്കള്‍ മുതല്‍, അവസാനം ഇറങ്ങിയ സത്യ, ദൈവമേ കൈ തൊഴാം, ആകാശ മിട്ടായി വരെ ഫ്ലോപ്പുകളുടെ ഒരു നീണ്ട നിര. ഇടയില്‍ കൊച്ചു കൊച്ചു സന്തോഷങ്ങള്‍, യാത്രക്കാരുടെ, മലയാളി മാമന്‍, വെറുതെ ഒരു ഭാര്യ, മനസ്സിനക്കരെ, സീനിയേഴ്സ്, ഹാപ്പി ഹസ്ബണ്ട്സ്, ഭാഗ്യ ദേവത, കഥ തുടരുന്നു അങ്ങനെ കുറച്ച് ഹിറ്റുകള്‍ മാത്രം. ഇതില്‍ ചില ഫ്ലോപ്പുകളും ഹിറ്റുകളും മിസ്സ്‌ ആയിട്ടുണ്ടാകും , പക്ഷെ പറഞ്ഞു വന്നത് അതല്ല. ഇടക്ക് പുള്ളി തമിഴില്‍ സരോജയും, തുപ്പാക്കിയും തെലുഗില്‍ ബാഗമതിയും ഒക്കെ ചെയ്തു. പക്ഷെ മലയാളത്തില്‍ ശരിക്കും ജയറാമിന്‍റെ ഒരു ഗാപ്‌ ഫീല്‍ ചെയ്തു തുടങ്ങി. എങ്കിലും ജയറാമിന്‍റെ പുതിയൊരു സിനിമ അനോണ്‍സ് ചെയ്യുമ്പോള്‍ വീണ്ടും കാത്തിരിക്കും. ഇപ്പോളും പുള്ളിയുടെ ചില ഞെട്ടലുകളും, ചമ്മലുകളും കാണാന്‍ ഇഷ്ട്ടമാണ്. തുപ്പാക്കിയിലെ ആ ചെറിയ കോമഡി സീന്‍ പോലും പുള്ളി നന്നായി ചെയ്തിരുന്നു. അത് പോലെ തന്നെ 20:20യിലെ പാക്കരന്‍, ചൈന ടൌണിലെ സക്കറിയ, സീനിയേഴ്സിലെ പപ്പന്‍ അങ്ങനെ ചില മിന്നലാട്ടങ്ങള്‍ കണ്ടിരുന്നു. വ്യത്യസ്തതക്ക് വേണ്ടി ചെയ്ത പഞ്ചവര്‍ണ്ണകിളിയിലെ വേഷവും പ്രതീക്ഷിച്ച പോലെ വിജയം ആയില്ല. ഈ മാസും , ആക്ഷനും ഒന്നും ജയറാമിന് ചേരില്ല എന്ന് പണ്ട് തൊട്ടേ അറിയാവുന്നതാണ്, എന്നാലും പുള്ളി ഇടക്ക് വീണ്ടും ഓരോ മാസ്സ് കൂള്‍ ഒക്കെ ആയി വരും. മനസ്സില്‍ ഇപ്പോളും തൂവല്‍ കൊട്ടാരത്തില്‍ ബാത്‌റൂമില്‍ കേറി വാതിലടച്ച് കരയുന്ന മോഹന ചന്ദ്രന്‍ വക്കീലിന്‍റെ മുഖമാണ്. അന്നത് കണ്ട് കണ്ണ്‍ നിറഞ്ഞിട്ടുണ്ട്. ആ പഴയ ജയറാമിനെ ഇനി അത് പോലെ സ്ക്രീനില്‍ കാണാന്‍ പറ്റുമോ എന്നറിയില്ല. എങ്കിലും ഇപ്പോളും കാത്തിരിക്കുന്നു അദ്ദേഹത്തിന്‍റെ ഒരു സൂപ്പര്‍ ഹിറ്റിന്. ഇന്ന് ജന്മദിനം ആഘോഷിക്കുന്ന അദ്ദേഹത്തിന് എല്ലാ നന്മകളും നേരുന്നു.

ആക്ഷന്‍ സ്റ്റാര്‍ സുരേഷ് ഗോപി !!

തലസ്ഥാനം, ഏകലവ്യൻ, മാഫിയ , കമ്മീഷണർ, കാശ്മീരം ലേലം , പത്രം എന്നീ ചിത്രങ്ങളുടെ ഒപ്പം തൊണ്ണൂറുകളിൽ സുരേഷ് ഗോപി വേറെയും കുറേ ആക്ഷൻ മൂവീസ് ചെയ്തിരുന്നു. സിറ്റി പോലീസ് , യാദവം ,ആചാര്യൻ ,ചുക്കാൻ , ദി സിറ്റി , രുദ്രാക്ഷം , അക്ഷരം , ഹൈവേ , കർമ്മ , യുവതുർക്കി , രജപുത്രൻ , മഹാത്മ, മാസ്മരം , ഗംഗോത്രി , തക്ഷശില , ഭൂപതി . FIR. പലതും പരാജയങ്ങൾ ആയി. എങ്കിലും ചിലതൊക്ക ഇപ്പോളും ഇടക്ക് കാണാറുണ്ട്. അന്നൊക്കെ പുള്ളി ഒരു ജാക്കറ്റ് ഒക്കെ ധരിച്ച് ഇത് പോലെ ഒരു തോക്കും ചൂണ്ടി നിൽക്കുന്ന പോസ്റ്റർ കാണാൻ തന്നെ ഒരു ത്രിൽ ആയിരുന്നു. ആക്ഷൻ സ്റ്റാർ ‌എന്നൊരു പേരും ആ സമയത്ത് കിട്ടി. പിന്നീട് ടൈഗർ , സത്യമേവ ജയതേ , ഭരത് ചന്ദ്രൻ പോലെ രണ്ടോ മൂന്നോ മൂവീസ് ആണ്‌ ആ ഒരു ജെനറിൽ കൊള്ളാം എന്ന് തോന്നിയത്. ഇന്നലെ ചുക്കാൻ ഒന്നൂടെ കണ്ടപ്പോൾ ചുമ്മാ ഓർമ്മ വന്നതാണ്.

ആഗസ്റ്റ് 1? - 30 വര്‍ഷങ്ങള്‍ !!

ജൂണ്‍ 29 -കേരളദേശം പാര്‍ട്ടി അവരുടെ നിയമസഭ നേതാവായി KGR-നെ തിരഞ്ഞെടുക്കുന്നു.
കഴുത്തുമുട്ടം വാസുദേവന്‍‌ പിള്ള നേതാവായി തിരഞ്ഞെടുക്കപ്പെടും എന്നാണ് കരുതിയിരുന്നത്.

ജൂണ്‍ 30- KGR മുഖ്യമന്ത്രിയായി സത്യപ്രതിഞ്ജ ചെയ്യുന്നു. എരിഞ്ഞളി അബൂബകര്‍, കഴുത്തുമുട്ടം വാസുദേവന്‍‌ പിള്ള, മത്തായി തോമസ്‌ പാപ്പച്ചന്‍, എന്നീ ഭരണകക്ഷി MLA-മാര്‍ സത്യപ്രതിഞ്ജ ചടങ്ങില്‍ പങ്കെടുക്കുന്നില്ല. വിശ്വം അന്ന് രാത്രി കഴുത്തുമുട്ടത്തിന്‍റെ വീട്ടില്‍ വെച്ച് അവരെ കാണുന്നു. പാപ്പച്ചന്‍ വിശ്വത്തെ സമാധാനിപ്പിച്ച്അയക്കുന്നു. തുടര്‍ന്ന് അയാള്‍ പാര്‍ട്ടി പ്രസിഡണ്ട്‌ കൈമളിനെ കാണുന്നു. അയാളുടെ താല്പര്യങ്ങള്‍ സംരക്ഷിച്ചു കൊള്ളാമെന്ന് കൈമള്‍ അയാള്‍ക്ക് വാക്ക് കൊടുക്കുന്നു.

ജൂലൈ 5 - കേരളദേശം പാര്‍ട്ടി എക്സിക്യുട്ടീവ്‌ തീരുമാനിച്ച മറ്റുള്ള അഞ്ച് മന്ത്രിമാരുടെ പേരുകളില്‍ പാപ്പച്ചന്‍റെയോ, അബൂബകറിന്‍റെയോ അവരുടെ ലോബികളില്‍ പെട്ട ആരുടേയും പേരുകള്‍ ഉണ്ടായിരുന്നില്ല. ഒരു ആശ്വാസത്തിന് വേണ്ടി കഴുത്തുമുട്ടത്തെ സ്പോര്‍ട്സ് മന്ത്രി ആക്കാമെന്ന് പറയുന്നു, അയാള്‍ അത് നിരസിക്കുന്നു.

KGR-ന്‍റെ ഭാവത്തിലും പെരുമാറ്റത്തിലും അയാള്‍ ഭരണത്തിന്‍റെ നിയന്ത്രണം സ്വയം ഏറ്റെടുത്തതായി അവര്‍ക്ക് തോന്നി. മദ്യ നയത്തിന്‍റെ കാര്യത്തില്‍ വിശ്വത്തിനോ അയാളിടെ ആളുകള്‍ക്കോ അനുകൂലമായ ഒരു തീരുമാനവും ഉണ്ടാകില്ല എന്ന് അയാള്‍ പറയുന്നു.കൂടാതെ പ്രൈവറ്റ് ഡിസ്റ്റിലറീസിന്‍റെ പ്രവര്‍ത്തനങ്ങളെ കുറിച്ച് നിയമസഭ കമ്മിറ്റിയെ കൊണ്ട് അന്വേഷിക്കാനും തീരുമാനിക്കുന്നു. ഒന്നരകൊടിയോളം ഇലക്ഷന് മുടക്കിയ വിശ്വത്തിന് കിട്ടിയ ആദ്യത്തെ ഷോക്ക്‌


ജൂലൈ 9 - പാര്‍ട്ടി പ്രസിഡന്‍റ് കൈമള്‍ CM-നെ ഓഫീസില്‍ വെച്ച് കാണുന്നു. മദ്യ നയത്തിന്‍റെ തീരുമാനം പുന പരിശോധിക്കണം എന്ന് CM-നോട്‌ കൈമള്‍ നിര്‍ബന്ധിക്കുന്നു. സാധ്യമല്ല എന്ന് CM തീര്‍ത്ത് പറയുന്നു.

തുടര്‍ന്ന് ഗസ്റ്റ് ഹൌസില്‍ വെച്ച് അവര്‍ യോഗം ചേരുന്നു. KGR-നെതിരെ രാഷ്ട്രീയ നീക്കം കൊണ്ട് പ്രയോജനമില്ല എന്ന തീരുമാനത്തില്‍ എത്തുന്നു. 2 ദിവസത്തിനകം തന്‍റെ തീരുമാനം അറിയിക്കാമെന്ന് പറഞ്ഞ് വിശ്വം പിരിയുന്നു.

JULY 15 മദ്രാസ്‌ - വിശ്വം അയാളുടെ സുഹൃത്തായ മുനിയാണ്ടി തേവര്‍ എന്ന ബിസിനസ് കാരനെ കാണുന്നു. അയാളുടെ വീട്ടില്‍ വെച്ച് KGRനെ അസ്സാസിനെറ്റ് ചെയ്യാന്‍ പ്ലാന്‍ ഇടുന്നു. അയാളുടെ ലിസ്റ്റില്‍ പെട്ട ഒരു വാടക കൊലയാളിയുടെ സഹായം അഭ്യര്‍ത്ഥിക്കുന്നു.

ജൂലൈ 28- ഗോമസ് എന്ന വാടക കൊലയാളി ഇവിടെ മ്യൂസിയത്തില്‍ വെച്ച് വിശ്വവുമായി കണ്ട് മുട്ടുന്നു. CMനെ അസ്സാസിനെറ്റ് ചെയ്യാനുള്ള പ്ലാന്‍ ഉറപ്പിക്കുന്നു. ഈ ഗോമസ് എന്നുള്ള പേര് തന്നെ ഫേക് ആണ്. വിശ്വത്തിന് അയാളുടെ പേരോ നാടോ ഒറിജിനോ ഒന്നുമറിയില്ല.

ഓഗസ്റ്റ്‌ 1 -ഹോട്ടല്‍ ജാസ് - റൂം നമ്പര്‍ 712ല്‍ വെച്ച് 20 ലക്ഷം രൂപ In cash, വിശ്വം ഗോമസിനെ ഏല്‍പ്പിക്കുന്നു.

15 ദിവസത്തിനകം ഗോമസ് എന്ന വാടക കൊലയാളി KGRനെ അസ്സാസിനെറ്റ് ചെയ്യും. എപ്പോള്‍, എവിടെ വെച്ച്, എങ്ങനെ എന്നുള്ളതിനെ കുറിച്ച് ഈ ലോകത്ത് ആ കൊലയളിക്കല്ലാതെ വേറെ ആര്‍ക്കും അറിയില്ല.





പിന്നീടുള്ള ഉദ്യോഗജനകമായ 15 ദിവസങ്ങള്‍ സമ്മാനിച്ച മലയാളത്തിലെ എക്കാലത്തെയും മികച്ച ത്രില്ലര്‍ സിനിമകളില്‍ ഒന്നായ ഓഗസ്റ്റ്‌ 1 പുറത്തിറങ്ങിയിട്ട് ഇന്നേക്ക് 30 വര്‍ഷങ്ങള്‍ പിന്നിടുന്നു. S N സ്വാമി രചിച്ച് സിബി മലയില്‍ സംവിധാനം ചെയ്ത ഈ ചിത്രം നിര്‍മ്മിച്ചത് M.മണിയാണ്.

മാനത്തെ കൊട്ടാരം (1994) - ഓര്‍മ്മകള്‍ !!

അന്ന് താരതമ്യേന പുതുമുഖമായ ദിലീപ്, നാദിര്‍ഷ , ഹരിശ്രീ അശോകന്‍, കൂടെ ഇന്ദ്രന്‍സ് എന്നിവരെ വെച്ച് സുനില്‍ സംവിധാനം ചെയ്ത ചിത്രം. അവരുടെ കൂടെ തമിഴില്‍ നിന്ന് കുശ്ബുവിനെയും കൊണ്ട് വന്നു. ഒപ്പം അന്നത്തെ തിരക്കുള്ള നായക നടനായ സുരേഷ് ഗോപിയുടെ ഒരു ഗസ്റ്റ് വേഷവും. എല്ലാം കൊണ്ടും ഒരു നല്ല പ്രൊജക്റ്റ് . പൂനിലാമഴ എന്ന ആ ഗാനം ചിത്രത്തിന് വന്‍ മൈലേജ് ആണ് കൊടുത്തത്. (ആ പേരിൽ സുനിൽ പിന്നീട് ആ പേരിൽ ഒരു സിനിമ എടുക്കുകയും ചെയ്തു). അന്ന് ചിത്ര ഗീതത്തിലൊക്കെ ഈ പാട്ട് വരാന്‍ കാത്തിരിക്കുമായിരുന്നു. ആ ഒരു ഗാനരംഗത്ത് ലോഹിതദാസ് , സിബി മലയിൽ, രഞ്ജി പണിക്കർ , ഷാജി കൈലാസ് , സിദ്ദിഖ് ലാൽ എന്നിവരൊക്കെ വന്നു. ആ വര്‍ഷം ഹിറ്റായ കാതലന്‍ സിനിമയിലെ പേട്ട റാപ്പ് എന്ന്‍ വാക്ക് സിനിമയില്‍ പല സ്ഥലത്ത് ഉപയോഗിക്കുന്നുണ്ട്. വില്ലനായ രാജന്‍ പി ദേവിന്‍റെ പേരും ലൂക്കൊച്ചന്‍ പേട്ട എന്നായിരുന്നു. ആ വർഷം കൃസ്ത്മസിനാണ് റിലീസ് ചെയ്തത്.നല്ല അഭിപ്രായവും, ഒപ്പം ഗംഭീര കളക്ഷനും നേടി ഈ ചിത്രം സൂപ്പര്‍ ഹിറ്റായി. നാരായണൻകുട്ടി , ഫിലോമിന , മാള ഇവരുടെ കോമഡി ട്രാക്കും ഒപ്പം ജഗതിയുടെ PRO എബ്രഹാം ജോണും അന്ന് തിയറ്ററില്‍ പൊട്ടിച്ചിരി ഉണർത്തി . അന്ന് വീഡിയോ കടകളില്‍ ഇതിന്റെ ക്യാമറ പ്രിന്‍റ് വരെ നല്ല ഓട്ടമായിരുന്നു



ചിത്രത്തിലെ ദിലീപിന്‍റെ പേരും ദിലീപ് എന്നായിരുന്നു , പുള്ളിയുടെ അഭിനയ ജീവിതവും പിന്നീട് ആ സിനിമയിലെ പോലെ ആയി. ഇന്ദ്രന്‍സ് എന്ന നടനും ഈ സിനിമയോടെ തിരക്കുള്ള ഒരു താരമായി. അവിടെ നിന്ന് അങ്ങോട്ട് ഇന്ദ്രന്‍സ് ഇല്ലാത്ത ചിത്രങ്ങള്‍ ചുരുക്കം ആയിരുന്നു എന്ന് തന്നെ പറയാം. ഇതിന്റെ അതേ ചുവട് വെച്ച് ഏതാണ്ട് ഇതേ താരങ്ങളെ വെച്ച് സുനില്‍ അടുത്ത വര്‍ഷം വൃദ്ധന്മാരെ സൂക്ഷിക്കുക എന്നൊരു ചിത്രമായി വന്നു. സുരേഷ് ഗോപിക്ക് പകരം ആ വര്‍ഷം തിളങ്ങി നിന്ന ജയറാമിനെയും ഗസ്റ്റ് റോളില്‍ കൊണ്ട് വന്നു. അതിന് പക്ഷെ ഈ വിജയം ആവര്‍ത്തിക്കാന്‍ ആയില്ല.


ഇനി അന്ന് വായിച്ച ഒരു അണിയറ വിശേഷം പറയാം ഇതിന്‍റെ കഥ അന്‍സാര്‍ ആദ്യം കാണിച്ചത് മമ്മൂട്ടിയെ ആണെന്ന് കേട്ടിട്ടുണ്ട്. മമ്മൂട്ടിക്ക് സ്ക്രിപ്റ്റ് ഇഷ്ട്ടപ്പെടതെയോ എന്തോ പുള്ളി അന്ന് നോ പറഞ്ഞു. കഥ കേള്‍പ്പിക്കാന്‍ ചെന്നപ്പോള്‍ മമ്മൂട്ടി ചെറുതായി പുള്ളിയെ എന്തോ കളിയാക്കുകയും ചെയ്തു. ആ വാശിക്കാണ് ക്രിസ്മസിന് സുക്രുതത്തിന്‍റെ കൂടെ തന്നെ മാനത്തെ കൊട്ടാരം റിലീസ് ചെയ്യിച്ചത് എന്ന് കേട്ടിട്ടുണ്ട്.

മഹാത്മ (1996) - ചില അണിയറ വിശേഷങ്ങള്‍ !!

ഈ അടുത്ത് മഹാത്മ (1996) കണ്ടപ്പോള്‍ ഓര്‍മ്മയില്‍ വന്ന കുറച്ച് കാര്യങ്ങള്‍.



ഞാന്‍ കോളേജില്‍ പഠിക്കുന്ന സമയത്ത് ആണ് ഈ പടം ഇറങ്ങിയത്. അന്ന് ഇതിന് മുട്ടന്‍ ഹൈപ്പ് ആയിരുന്നു. കമ്മീഷണര്‍, കിംഗ്‌ എന്നീ ഹിറ്റുകള്‍ക്ക് ശേഷം വീണ്ടും ഷാജി കൈലാസ്, സിനിമ വരികളില്‍ എല്ലാം കിടു കവറേജ്, സുരേഷ് ഗോപിയുടെ കിടിലന്‍ ഗെറ്റ് അപ്പ്‌. പിന്നെ വന്‍ ബജറ്റില്‍ ഒരുങ്ങുന്നു എന്നത് വേറെ. അങ്ങനെ എല്ലാം കൊണ്ടും കാത്തിരുന്ന പടം. തൃശൂര്‍ രാഗത്തിലാണ് പടം ഇറങ്ങിയത്. എന്ത് കൊണ്ടോ അന്ന് എനിക്ക് കാണാന്‍ കഴിഞ്ഞില്ല. എന്‍റെ ഒരു കൂട്ടുകാരന്‍ ആദ്യ ദിവസം തന്നെ അടിയുണ്ടാക്കി പോയി പടം കണ്ടു. വന്‍ ജനം ആയിരുന്നു, ടിക്കറ്റ്‌ കിട്ടും എന്ന് കരുതിയില്ല എന്നൊക്കെ അവന്‍ പറഞ്ഞു. പക്ഷെ പടം പ്രതീക്ഷക്കൊത്ത് ഉയര്‍ന്നില്ല. ഹൈ ബജറ്റ് കാരണം ചിത്രം ഒരു നഷ്ടമായി.

ഇതില്‍ സിനിമയുടെ നിര്‍മ്മാണ ചിലവ് വേറെ പല വഴികളിലും കൂടുകയും, പിന്നീട് ഒന്ന്‍ രണ്ട് തവണ ഷൂട്ടിംഗ് നിര്‍ത്തുകയും ചെയ്തു എന്ന് കേട്ടിട്ടുണ്ട്. വേറെ ഒരു രസം ഇതിന്‍റെ ക്ലൈമാക്സ് ഷൂട്ട്‌ ചെയ്തിട്ടില്ല എന്നതാണ്. ചിത്രത്തിലെ പ്രധാന വില്ലന്‍ ആയ ഡേവിഡ്‌ എബ്രഹാമിനെ അവസാനം കാണിക്കുന്നില്ല. പകരം ഗണേഷിനെ കൊല്ലുന്നിടത്ത് വെച്ച് പടം അവസാനിപ്പിച്ച്‌ A Film by Shaji Kailas എന്ന് കാണിക്കേണ്ടി വന്നു. ഇതൊക്കെ അന്നത്തെ വാരികകളില്‍ വായിച്ച അറിവാണ്. ചിലപ്പോള്‍ തെറ്റായിരിക്കും, പക്ഷെ പടം കാണുമ്പോള്‍ അതൊക്കെ ശരിയാണ് എന്നാണ് തോന്നിയത്. ഇതൊക്കെ ആയാലും സിനിമയില്‍ സുരേഷ് ഗോപിയുടെ ചില കിടിലന്‍ ഡയലോഗുകള്‍ ഉണ്ട്. അത് കാണാന്‍ മാത്രം ഇടക്ക് ആ സീനുകള്‍ കാണാറുണ്ട്. പിന്നെ പുള്ളി ഈ പടത്തില്‍ ഒടുക്കത്തെ ഗ്ലാമറും ആയിരുന്നു. സുരേഷ് ഗോപി വലിച്ചിരുന്ന ആ നീല കളറുള്ള സിഗരറ്റ് വിദേശത്ത് നിന്നും കൊണ്ട് വന്നതാണെന്നും ഒക്കെ സിനിമ ഫ്ലോപ്പ് ആയപ്പോള്‍ ചെറിയ ഗോസിപ്പുകള്‍ ആയി അന്ന് ചില മാഗസിനുകളില്‍ വന്നിരുന്നു.

ഇതില്‍ വിദ്യ സാഗര്‍ ഒരുക്കിയ പുള്ളോര്‍ കുടവും എന്ന ഗാനം ഏറെ ഇഷ്ട്ടമാണ്.

തേന്മാവിന്‍ കൊമ്പത്ത് - 24 വര്‍ഷങ്ങള്‍ !!

ഒന്‍പതാം ക്ലാസ്സില്‍ പഠിക്കുന്ന സമയം. വൈകീട്ടത്തെ ട്യൂഷന്‍ ക്ലാസ്സില്‍ ഇരിക്കുമ്പോളാണ് താഴത്തെ ഓഡിയോ ഷോപ്പില്‍ നിന്ന് മനോഹരമായ ഗാനങ്ങള്‍ കേള്‍ക്കുന്നത്. ക്ലാസ്സ്‌ കഴിഞ്ഞ ഉടനെ ഓടി താഴെ പോയി കടയിലെ ചേട്ടനോട് ചോദിച്ചു. പുള്ളി എനിക്ക് ആ കേസ്സറ്റ് തന്നു. തേന്മാവിന്‍ കൊമ്പത്ത് എന്ന് അതില്‍ ഉണ്ടായിരുന്നു. മനോഹരമായ ആ പേരും ഡിസൈന്‍ അപ്പോളെ മനസ്സില്‍ കയറി. പിന്നീട് എങ്ങും എവിടെയും ആ ഗാനങ്ങളായി. കറുത്ത പെണ്ണും, കള്ളി പൂങ്കുയിലും മലേയ ലോല ലോലെയുമൊക്കെ എല്ലായിടത്തും അലയടിച്ചു. കുറച്ച് ദിവസങ്ങള്‍ക്ക് ശേഷം സിനിമ റിലീസ് ആയി. ഇന്നത്തെ പോലെ ടീസറൊന്നുമില്ല. നാനയിലൊക്കെ വരുന്ന റിപ്പോര്‍ട്ട്‌ മാത്രം. സിനിമ എന്താണെന്ന്‍ തിയറ്ററില്‍ ചെന്നാല്‍ മാത്രം അറിയുന്ന സമയം. അങ്ങനെ വീടിന്‍റെ അടുത്തുള്ള ഒരുത്തന്‍റെ കൂടെ ഞാനും സിനിമ കാണാന്‍ തൃശൂര്‍ പോയി. വഴിയില്‍ പലയിടത്തും പോസ്റ്റര്‍ കണ്ടപ്പോള്‍ ഉള്ളം സന്തോഷിച്ചു. അങ്ങനെ ഞങ്ങള്‍ സപ്നയില്‍ എത്തി. തിരക്കെന്ന് പറഞ്ഞാല്‍ ഒടുക്കത്തെ തിരക്ക്. പ്രതീക്ഷയോടെ ഞങ്ങള്‍ ക്യൂവില്‍ നിന്നു. അന്ന് സപ്നയുടെ ഒരു ഭാഗത്ത് പിന്‍ഗാമിയുടെ പോസ്റ്റര്‍ കണ്ടു. വരുന്നു...എന്ന്. ബെല്‍ അടിച്ചപ്പോള്‍ ക്യൂ നീങ്ങി തുടങ്ങി. കിട്ടും കിട്ടും എന്ന്‍ മനസ് പറഞ്ഞു, പക്ഷെ ഞങ്ങള്‍ അടുതെത്തിയപ്പോഴേക്കും ക്ലോസ് ആയി. അന്നത്തെ വിഷമം പറഞ്ഞാല്‍ തീരില്ല. അടുത്ത ദിവസം വരാം എന്ന് അവന്‍ പറഞ്ഞെങ്കിലും പിന്നെ പോകാന്‍ പറ്റിയില്ല. പിന്നീട് കാസ്സെറ്റ്‌ ഇട്ടാണ് സിനിമ കണ്ടത്. ഇന്നും അതൊരു നഷ്ട്ടമായി മനസ്സില്‍ കിടക്കുന്നു. തേന്മാവിന്‍ കൊമ്പത്ത് ഇറങ്ങിയിട്ട് ഇന്നേക്ക് 24 വര്‍ഷങ്ങള്‍ പൂര്‍ത്തിയാകുന്നു.

അന്ന് താരങ്ങളില്ലാതെ പടത്തിന്‍റെ പേര് മാത്രമായി ഒരു പോസ്റ്റര്‍ വരാറുണ്ട്. കറുത്ത ബാക്ക് ഗ്രൗണ്ടില്‍ പച്ച കളറില്‍ ആയിരുന്നു തേന്മാവിന്‍ കൊമ്പത്ത് എന്നെഴുതിയത്. അങ്ങനെയൊരു പോസ്റ്ററിന്‍റെ കീറിയ ഒരു ചെറിയ ഭാഗം ടൌണില്‍ ഒരു സ്ഥലത്ത് പിന്നീട് കുറേ വര്‍ഷം കണ്ടിരുന്നു. എന്നും അതിലൂടെ ബസില്‍ പോകുമ്പോള്‍ ഞാന്‍ അത് നോക്കും. അത് എന്നും എനിക്ക് മനസിന്‌ സന്തോഷം നല്‍കുന്ന ഒരു കാഴ്ച ആയിരുന്നു.പിന്നീട് എപ്പോഴോ നഗരത്തിന്‍റെ തിരക്കില്‍ അതും നഷ്ട്ടമായി.

2017- ഒരു തിരിഞ്ഞു നോട്ടം. !!

ഒരു പുതുവര്‍ഷം കൂടെ ഇന്ന് ആരംഭിക്കുന്നു. 2017 ദാ എന്ന് പറയുമ്പോളെക്കും കഴിഞ്ഞു പോയി. എടുത്ത് പറയാന്‍ ഉള്ളത് കഴിഞ്ഞ വര്‍ഷമാണ്‌ എനിക്ക് UAE ലൈസന്‍സ് കിട്ടിയത് എന്നാണ്. ഇവിടെ വന്ന് പത്ത് വര്‍ഷത്തിന് ശേഷമാണ് ഡ്രൈവിംഗ് ക്ലാസ്സിന് ചേരുന്നത്. കുറെ ശ്രമങ്ങള്‍ക്ക് ശേഷമാണ് അത് ലഭിച്ചത്. മാര്‍ച്ചില്‍ നാട്ടില്‍ പോയതാണ് മനസ്സില്‍ നില്‍ക്കുന്ന മറ്റൊരു നല്ല ഓര്‍മ്മ. വീട്ടുകാരുടെ കൂടെ, കൂട്ടുകാരുടെ കൂടെ ഒരു മാസം. ഫാമിലിയുടെ കൂടെ തൃശ്ശൂരും, എറണാകുളവും, പാലക്കാടും എല്ലാം ഒന്ന് കറങ്ങി. ഇടയില്‍ ഒരു വിഷുക്കാലവും കിട്ടി. കുറെ പൂരങ്ങള്‍, കുറെ പെരുന്നാളുകള്‍.അങ്ങനെ കുറെ സന്തോഷം വേറെ. ഇപ്പോള്‍ നാട്ടില്‍ നിന്നും വന്നിട്ട് എട്ട് മാസങ്ങള്‍ കഴിഞ്ഞു. ഇനിയിപ്പോള്‍ 2018 മാര്‍ച്ച് ആകാനുള്ള കാത്തിരിപ്പാണ്.

ഇപ്പോള്‍ താമസിക്കുന്ന ഫ്ലാറ്റില്‍ കഴിഞ്ഞ 4.5 വര്‍ഷമായി താമസിക്കുന്നു. ഞങ്ങള്‍ അവിടെ സെറ്റ് ആയിരുന്നു. എന്നാലും കുറച്ചു കൂടെ നല്ല ഒരു ചുറ്റുപാടിലേക്ക് മാറണം എന്ന് കരുതിയിരുന്നു. അപ്പോളാണ് ബോസ്സ് തന്നെ ഇങ്ങോട്ട് പറഞ്ഞത് വേറെ റൂം നോക്കിക്കോ എന്ന്. അതോടെ പിന്നെ റൂം അന്വേഷണമായി. കുറച്ച് ദിവസങ്ങളിലായി അതിന്‍റെ ഒരു തിരക്കിലായിരുന്നു. കുറേ റൂമുകള്‍ കണ്ടു.ഇപ്പോളാണ് ഇഷ്ട്ടപ്പെട്ട ഒന്ന് കിട്ടിയത്. ഞങ്ങള്‍ മുന്‍പ് താമസിച്ച അതെ ഫ്ലാറ്റ് ആണെന്നത് ഒരു പ്ലസ്‌ ആയി. അങ്ങനെ പുതുവര്‍ഷം അങ്ങോട്ടേക്ക് ഫ്ലാറ്റിലേക്ക് മാറുകയാണ്. ആദ്യമായല്ല ഇങ്ങനെ മാറേണ്ടി വരുന്നത്. എന്നാലും ഈ തവണ വല്ലാത്തൊരു വിഷമം. കുറെ നാളുകളായി ഇവിടെ താമസിച്ചു പെട്ടെന്ന് ഇറങ്ങുമ്പോള്‍ ഉള്ള ഒരു പ്രയാസം. രണ്ട് മക്കള്‍ ജനിച്ചതും വളര്‍ന്നതും ഈ വീട്ടിലായിരുന്നു.അതിന്‍റെയൊരു ഇമോഷണല്‍ അറ്റാച്ച്മെന്‍റ് ഇവിടെയുണ്ട്. കുറച്ച് ദിവസമായി ഉറക്കമൊന്നും തീരെ ശരിയാകുന്നില്ല. ഇനി അവിടെ പോയി ഒന്ന് ഓക്കേ ആകാന്‍ കുറച്ച് ദിവസം എടുക്കും.

ഈ പോയ വര്‍ഷം ഒരു പാട് സിനിമകള്‍ കണ്ടു. എങ്കിലും അങ്കമാലി ഡയറീസും. ടേക്ക് ഓഫും, പറവയും, തൊണ്ടി മുതലും വിക്രം വേധയും എല്ലാം മനസ്സില്‍ നില്‍ക്കുന്നു. അതെല്ലാം തിയറ്ററില്‍ നിന്നും തന്നെ കാണാന്‍ സാധിച്ചു. ഷോ ടൈം ഓക്കേ അല്ലാത്തത് കൊണ്ട് മാത്രം കാണാതിരുന്ന സിനിമകളും ഉണ്ട്. ഓണ്‍ലൈന്‍ ആക്ട്ടിവിറ്റീസ് എല്ലാം വളരെ കുറച്ച ഒരു വര്‍ഷം ആയിരുന്നു ഇത്. ഏപ്രില്‍ മുതല്‍ സിനിമ ഫോറങ്ങളില്‍ നിന്നെല്ലാം വിട്ടു നിന്നു. ബ്ലോഗ്‌ തന്നെ ആകെ നാലോ അഞ്ചോ എണ്ണം ആണ് എഴുതിയത്. കുറെ നാള്‍ വാട്ട്‌സ് അപ്പിലും, ഇന്‍സ്റ്റാഗ്രമിലും,ഫേസ്ബുക്കിലും ഒന്നും ഇല്ലായിരുന്നു. അവധി കഴിഞ്ഞ് വരുമ്പോള്‍ വാങ്ങിയതില്‍ കുറച്ച് പുസ്തകങ്ങള്‍ ഇപ്പോളും വായിച്ചിട്ടില്ല. മടി തന്നെ കാരണം. സമയം ഒക്കെ മാനേജ് ചെയ്ത് കുട്ടികളുടെ കൂടെ പരമാവധി ഉണ്ടാകാറുണ്ട്. സാമ്പത്തികമായ ഞെരുക്കം കാരണം പുറത്ത് കറങ്ങാന്‍ പോകല്‍ കുറവാണു. കഴിഞ്ഞ കുറെ നാളുകളായി മാസത്തില്‍ ഒരു തവണ മാത്രമാണ് പുറത്ത് പോകുന്നത്. അതും ചെലവു വളരെ കുറച്ച് കൊണ്ടുള്ള യാത്രകള്‍. കുറെ നാളായി ഒരു തല വേദന ആയിരുന്ന ഒരു ക്രെഡിറ്റ്‌ കാര്‍ഡ്‌ ക്ലോസ് ചെയ്യാന്‍ സാധിച്ചതും ഈ വര്‍ഷമാണ്‌. അത് നല്‍കിയ ആശ്വാസം ചില്ലറയല്ല. കാര്‍ഡ്‌ ഉപയോഗിക്കാത്ത ഒരു പുതുവര്‍ഷമാണ് മനസ്സിലുള്ളത്. ആ തീരുമാനം എത്ര മാത്രം നടക്കും എന്നറിയില്ല. എങ്കിലും കഴിയുന്ന പോലെ ശ്രമിക്കും. കുറെ നാളായുള്ള ഒരു സുഹൃത്തിന്‍റെ പിണക്കം പറഞ്ഞ് തീര്‍ത്തതും ഈ വര്‍ഷമാണ്‌. ഇതൊക്കെയാണ് 2017ലെ എന്‍റെ പ്രധാനവിശേഷങ്ങള്‍. നിങ്ങള്‍ എല്ലാവര്‍ക്കും സന്തോഷകരമായ ഒരു പുതു വര്‍ഷം ആശംസിക്കുന്നു.

Movie Review - 12 Feet Deep

ജോന & ബ്രീ എന്നീ രണ്ട് സഹോദരിമാര്‍. അവര്‍ ഒരു ദിവസം ഒരു പബ്ലിക്‌ പൂളില്‍ കുളിക്കാന്‍ ഇറങ്ങുന്നു. കുറച്ച് കഴിഞ്ഞപ്പോള്‍ പൂള്‍ അടക്കാന്‍ സമയമായി എന്ന് അറിയിപ്പ് വന്നു. അവര്‍ പൂളില്‍ നിന്നും കേറിയപ്പോളാണ് ബ്രീയുടെ വിവാഹ നിശ്ചയ മോതിരം നഷ്ട്ടപ്പെട്ടത് അറിയുന്നത്. പൂളിന്‍റെ അടിഭാഗത്ത് മോതിരം കിടക്കുന്നത് കണ്ടു ബ്രീ അതെടുക്കാന്‍ വീണ്ടും പൂളിലേക്ക് ചാടുന്നു. അതവിടെ കുടുങ്ങി കിടക്കുകയാണ്. അവളെ സഹായിക്കാന്‍ തൊട്ട് പിന്നാലെ ജോനയും ചാടുന്നു. അവര്‍ പൂളിന്‍റെ അടിത്തട്ടില്‍ ഉള്ളതറിയാതെ ഓപ്പറേറ്റര്‍ പൂളിന്‍റെ മുകള്‍ ഭാഗം ക്ലോസ് ചെയ്ത് ഡോര്‍ പുറത്ത് നിന്ന് പൂട്ടി പോകുന്നു. ഇനി രണ്ട് മൂന്ന് ദിവസം ഹോളിഡെയ്സ് ആയത് കൊണ്ട് പൂള്‍ അവധിയും ആണ്.




പൂളില്‍ കുടുങ്ങി പോകുന്ന ഈ സഹോദരിമാര്‍ രക്ഷപ്പെടുമോ എന്നതാണ് സിനിമയുടെ ബാക്കി കഥ പറയുന്നത്. 85 മിനുട്ട് ഉള്ള ഈ ചിത്രം സര്‍വൈവല്‍ മൂവിസ് ഇഷ്ട്ടപെടുന്നവര്‍ക്ക് കണ്ടു നോക്കാം. അത്യന്തം ഉദ്യോഗജനകം അല്ലെങ്കിലും , ഒരു സ്ലോ പേസില്‍ കണ്ടിരിക്കാവുന്ന ഒന്നാണ്.

നരന്‍ - ഓര്‍മ്മകുറിപ്പുകള്‍..!!

2005-ലെ ആ ഓണക്കാലം. ചന്ദ്രോത്സവം, ഉടയോന്‍ എന്നീ രണ്ട് ചിത്രങ്ങള്‍ക്ക് ശേഷമുള്ള ഒരു ചെറിയ ഇടവേളക്ക് ശേഷം മോഹന്‍ ലാലിന്‍റെ ഓണ ചിത്രമായ നരന്‍ പ്രദര്‍ശനത്തിന് ഒരുങ്ങുന്ന സമയം. ദീപക് ദേവ് ഒരുക്കിയ വേല്‍ മുരുകാ എന്ന ഗാനം എവിടെയും അലയടിക്കുന്നു. ഞാന്‍ അന്ന് ടൌണില്‍ ഒരു ഫ്ലക്സ് പ്രിന്റിംഗ് കമ്പനിയില്‍ ജോലി ചെയ്യുന്നു. റിലീസിന് ഒരു ആഴ്ച മുന്‍പ് തൊട്ടേ, ഫാന്‍സുകാര്‍ പല സൈസ് പ്രിന്റുകള്‍ അടിപ്പിക്കാന്‍ വരുന്നുണ്ട്. അവര്‍ കൊണ്ട് വരുന്ന സ്റ്റില്‍സ് കണ്ട് കണ്ട് പടം കാണാനുള്ള കാത്തിരിപ്പിലായി ഞാനും.



റിലീസ് ദിവസം ഓഫീസില്‍ ലീവ് പറഞ്ഞ് ഞാന്‍ ടൌണില്‍ നേരത്തെ എത്തി. ജോസിന്‍റെ മുന്‍പില്‍ നല്ല തിരക്കുണ്ട്. എനിക്കുള്ള ടിക്കറ്റ്‌ റെഡി ആയത് കൊണ്ട് ഞാന്‍ ഭാരതില്‍ പോയി ബ്രേക്ക്‌ ഫാസ്റ്റ് കഴിച്ചു. മടങ്ങി വന്നപ്പോഴേക്കും തിരക്ക് കൂടിയിരുന്നു. നോക്കി നില്‍ക്കെ അത് കൂടി കൂടി വന്നു. ആകെ ഒരു ഓളം. കുറച്ച് സമയത്തെ കാത്തിരിപ്പ്. ഒടുവില്‍ സെക്യൂരിറ്റി വന്ന് ഗേറ്റ് തുറന്നു. എല്ലാവരും വലിയ ആര്‍പ്പു വിളികളോടെ അകത്തേക്ക് ഓടി. ഇപ്പോള്‍ അകത്ത് ഒരു പൂരത്തിനുള്ള ആളുണ്ട്. ഞാന്‍ ചുമ്മാ ബാല്‍ക്കണി കൌണ്ടറില്‍ പോയി നോക്കി. ഫാമിലീസിന്‍റെ നല്ല തിരക്കുണ്ട് അവിടെയും. FDFS കാണുന്നതിന്‍റെ ഒരു സന്തോഷത്തോടെ വീണ്ടും താഴേക്ക് പോയി നോക്കി. പോലീസ് എത്തിയിട്ടുണ്ട്. ഫസ്റ്റ് ക്ലാസ്സ്‌ കൌണ്ടറില്‍ നല്ല റഷ്. ചിലര്‍ വരിയില്‍ നില്‍ക്കുന്നവര്‍ക്ക് ടിക്കറ്റ്‌ എടുക്കാന്‍ വേണ്ടി കാശ് കൊദുക്കാന്‍ നോക്കുന്നു. മറ്റു ചിലര്‍ ഇടയില്‍ കേറാന്‍ നോക്കുന്നു. അപ്പൊ വരിയിലുള്ളവര്‍ സാറേ..എന്നലറും. ഉടനെ പോലീസ് വന്നു ലാത്തി വീശും. അപ്പൊ വരി പൊട്ടും, ഭാഗ്യമുള്ളവര്‍ വീണ്ടും വരിയില്‍ കേറും, അല്ലാത്തവര്‍ പുറത്ത്. അങ്ങനെ ആകപ്പാടെ ഒരു ലഹള. കുറച്ച് കഴിഞ്ഞപ്പോള്‍ ജോസിലെ ടിക്കറ്റ്‌ കൊടുക്കാനുള്ള ആ ബെല്‍ നീട്ടി അടിച്ചു. വരിയില്‍ നില്‍ക്കുന്നവര്‍ ആവേശത്തോടെ അലറി. വരി കുറേശ്ശെ നീങ്ങി തുടങ്ങി. പിന്നില്‍ നില്‍ക്കുന്നര്‍ ചോട്ടാ മുംബൈയില്‍ ബിജു കുട്ടന്‍ പൈപ്പ് വെള്ളം എടുക്കാന്‍ വരിയില്‍ നിന്ന പോലെ മുഖത്ത് ടെന്‍ഷന്‍ അടിച്ച് നില്‍ക്കുന്നു. ദൈവമേ എങ്ങാനും ടിക്കറ്റ്‌ തീരുമോ? ബ്ലാക്കില്‍ എടുക്കേണ്ടി വരോ? അങ്ങനെ എന്തൊക്കെ ചിന്തകളാണ് എന്നറിയോ?

ടിക്കറ്റ്‌ കിട്ടിയവര്‍ അകത്ത് കയറി, ചിലര്‍ കൂട്ടുകാരെ പേര് ചൊല്ലി വിളിക്കുന്നു. അടുത്തടുത്ത് ഇരിക്കാനുള്ള സീറ്റുകള്‍ നോക്കുന്നു. ചിലര്‍ ചൂട് കാരണം ഷര്‍ട്ട് ഒക്കെ അഴിച്ച് അരയില്‍ കെട്ടിയിരിക്കുന്നു. മറ്റു ചിലര്‍ ലാലേട്ടന്‍ കീ ജയ് എന്ന് വിളിക്കുന്നു. എല്ലാം കണ്ടു കൊണ്ട് ഫസ്റ്റ് ക്ലാസ്സിന്‍റെ ഒരു സൈഡ് സീറ്റില്‍ ഞാനും. ഒടുവില്‍ സിനിമ തുടങ്ങി. ആശിര്‍വാദ് സിനിമാസ് അവതരിപ്പിക്കുന്ന എന്ന് കാണിച്ച ഉടനെ തിയറ്ററില്‍ ചിലര്‍ അലറി വിളിക്കാന്‍ തുടങ്ങി. ആവേശ തിരയിളക്കി കൊണ്ട് ലാലിന്‍റെ ഇന്ട്രോ സീന്‍.
അന്ന് അവിടെ കിട്ടിയ കയ്യടികള്‍, ആര്‍പ്പു വിളികള്‍, ഇന്നും എന്‍റെ കാതുകളില്‍ ഉണ്ട്. അതാണ് ഈ ഫസ്റ്റ് ഷോയുടെ ഒരു രസം. ആദ്യം തന്നെ ഒരു കിണ്ണന്‍ കാച്ചി ഫൈറ്റ്. പിന്നെ അവിടെ നിന്ന് അങ്ങോട്ട്‌ മുള്ളന്‍ കൊള്ളിയിലെ ഒരാളായി പ്രേഷകരും. വേല്‍ മുരുഗാ എന്ന ഗാനം വന്നതോടെ തിയറ്റര്‍ ഉത്സവ പറമ്പ് പോലെയായി. എല്ലാവരും ഡാന്‍സ് തന്നെ ഡാന്‍സ്. അതൊന്നും ഇന്നത്തെ പോലെ ഷൂട്ട്‌ ചെയ്യാന്‍ ഒരു മാര്‍ഗവുമില്ലായിരുന്നു. പടം സൂപ്പര്‍ ആയി തന്നെ അവസാനിച്ചു. ക്ലൈമാക്സിലെ ആ ഗാനം കൂടി ആയപ്പോള്‍ എല്ലാവരും സന്തോഷത്തോടെ പുറത്തിറങ്ങിയപ്പോള്‍ അവിടെ അടുത്ത ഷോക്കുള്ള തിരക്ക്. ഞാന്‍ റോഡ്‌ ക്രോസ് ചെയ്ത് തേക്കിന്‍ കാട് മൈതാനത്ത് കേറി നിന്നു.
ഫാന്‍സുകാര്‍ പടക്കം പൊട്ടിക്കുന്നു. പോലീസ് വന്ന് തടയുന്നു. ജോസിന്‍റെ മുന്‍പില്‍ ബ്ലോക്ക്‌ ആയ വണ്ടികളുടെ ഹോണ്‍ ഒരു ഭാഗത്ത്, മറുഭാഗത്ത് ഫാന്‍സിന്‍റെ ആര്‍പ്പുവിളികള്‍, അകത്ത് വരിയില്‍ നില്‍ക്കുന്നവരുടെ ബഹളം. എല്ലാം ഞാന്‍ എന്‍റെ സ്റ്റില്‍ ക്യാമറയില്‍ പകര്‍ത്തി. അത് പോലൊരു ദിവസം പിന്നീട് ജീവിതത്തില്‍ ഉണ്ടായിട്ടില്ല എന്ന് തന്നെ പറയാം. ക്യമറയില്‍ ഉണ്ടായിരുന്ന ഫിലിം ഞാന്‍ പിന്നീട് പ്രോസസ് ചെയ്ത് ഫാന്‍സുകാര്‍ക്ക് കൊടുത്തു. അവരത് പ്രിന്‍റ് എടുത്ത് അവരുടെ ആല്‍ബത്തില്‍ ഒട്ടിച്ചു. ആ ആല്‍ബം അവര്‍ പിന്നീട് ഒരിക്കല്‍ ലാലേട്ടനെ കാണിച്ചിരുന്നു എന്ന് പറഞ്ഞു. ഞാന്‍ എടുത്ത ഫോട്ടോസ് എല്ലാം പുള്ളി കണ്ടു എന്നും. അത് കേട്ടപ്പോള്‍ സന്തോഷം തോന്നി. കുറച്ചു നാള്‍ മുന്‍പ് ആരോ എന്നോട് ഈ ഫോട്ടോസ് ചോദിച്ചപ്പോള്‍ ഞാന്‍ ഈ ആല്‍ബം വീണ്ടും അന്വേഷിച്ചു. പത്ത് പന്ത്രണ്ട് വര്‍ഷം ആയില്ലേ? ഇപ്പോള്‍ അത് ആരുടെ കയ്യില്‍ ആണെന്ന് ആര്‍ക്കും ഒരു പിടിയുമില്ല, ഇനി ഉണ്ടെങ്കില്‍ തന്നെ അതിന്‍റെ കണ്ടീഷന്‍ എങ്ങനെ ആകും എന്നും അറിഞ്ഞൂടാ. ആ നെഗറ്റീവ്സ് അന്ന് അത് പോലെ മിസ്സ്‌ ആയതാണ്. എന്നാലും ഞാന്‍ ശ്രമിക്കുന്നുണ്ട്. ഇന്നും ടിവിയില്‍ നരന്‍ വരുമ്പോള്‍ അറിയാതെ ഇരുന്ന് കണ്ടു പോകും. ഇന്നും ആ പഴയ ഓര്‍മ്മകള്‍ മനസ്സിലെക്കെത്തും.

തൊണ്ടി മുതലും ഫഹദും !!

ഈ ആഴ്ചയാണ് തൊണ്ടി മുതല്‍ കണ്ടത്. കൂടെ ഉണ്ടായിരുന്നവരില്‍ പലര്‍ക്കും പടത്തെ കുറിച്ച് പല അഭിപ്രായങ്ങള്‍ ആയിരുന്നു. പക്ഷെ ഫഹദിന്‍റെ പെര്‍ഫോമന്‍സ്, അതിന് മാത്രം എല്ലാവര്‍ക്കും ഒരേ അഭിപ്രായം, കിടിലന്‍.


ആ സെല്ലില്‍ ഇരുന്ന് മാല മോഷണത്തെ കുറിച്ച് വിവരിക്കുന്നതൊക്കെ ഗംഭീരം, പ്രത്യേകിച്ചും തെക്കോട്ടൊക്കെ ഉള്ള റോഡുണ്ടല്ലോ, എന്ത് സുഖാന്നറിയോ? എന്ന് പറയണതൊക്കെ എന്ത് നാച്ചുറല്‍ ആണ്. ഫഹദിന് ശരിക്കും ഈ പണി അറിയോ എന്ന് വരെ തോന്നി പോകും, അത് പോലെയാണ് രസകരമായ ആ വിവരണം. ശരിക്കും Behave ചെയ്യുക എന്നത് ഫഹദിന്‍റെ കാര്യത്തില്‍ കറക്റ്റ് ആണ്. അഭിനയത്തിന്‍റെ കാര്യത്തില്‍ ഫഹടിനോട് മത്സരിക്കാന്‍ പുതിയ പിള്ളേര്‍ കുറച്ചു പാട് പെടും.

മഹേഷിന്‍റെ പ്രതികാരം, ടേക്ക് ഓഫ്‌, ഇപ്പൊ തൊണ്ടിമുതല്‍. എന്തിനാ അധികം സിനിമകള്‍? വര്‍ഷത്തില്‍ ഇത് പോലെ ഒന്നോ രണ്ടോ പോരെ? ഇങ്ങോര്‍ ഇത് ഈ ലെവലില്‍ പോയാല്‍ പിടിച്ചാല്‍ കിട്ടില്ല...

Angamali Diaries - Review

ഇന്നലെ അംഗമാലി ഡയറീസ് കണ്ടു. സിനിമയെ കുറിച്ച് ഇനി പ്രത്യേകം പറയുന്നില്ല. അസാധ്യ മേകിംഗ്. ലിജോ ജോസ് പെല്ലിശ്ശേരി, നിങ്ങള്‍ ഒരു സംഭവമാണ് എന്ന് പറയാതെ വയ്യ. ഇത്രയും പുതിയ പിള്ളേരെ വെച്ച് ഇങ്ങനെ ഒരു പടം ചെയ്യാന്‍ നിങ്ങള്‍ക്കെ കഴിയൂ. എല്ലാവരും ഒന്നിനൊന്ന് മെച്ചം. നായകന്‍ ആന്റപ്പന്‍ ഒക്കെ ആദ്യ സീന്‍ മുതലേ അങ്ങ് കത്തി കയറുവല്ലായിരുന്നോ. അത് പോലെ ലിച്ചി..എന്റമ്മോ.. ഇങ്ങനെയുമുണ്ടോ ഒരു നോട്ടം..ഹോ.. അടുത്ത കാലത്തൊന്നും ആ ചിരി മനസ്സില്‍ നിന്ന് പോകത്തില്ല. പിന്നെ ഭീമന്‍, തോമസ്‌, കുഞ്ഞൂട്ടി, മരംകൊത്തി, മാര്‍ട്ടി, കണകുണ, ബാബുജി, അങ്ങനെ ഒരു ലോഡ് പുതുമുഖങ്ങള്‍ ഒരു രണ്ടു രണ്ടേകാല്‍ മണിക്കൂര്‍ ചുമ്മാ വന്നിറങ്ങി അങ്ങ് പൊളിച്ചടുക്കി.



പക്ഷെ ഒരു പ്രേക്ഷകന്‍ എന്ന നിലയില്‍ എന്നെ ഞെട്ടിച്ചത് ദേ ഈ രണ്ടു ഗടികളാണ്. എന്താണ് ഇവരെ കുറിച്ച് പറയേണ്ടത് എന്നറിയില്ല ശരിക്കും. ഇരുവരുടെയും ആദ്യ ചിത്രം ആണെന്ന് വിശ്വസിക്കാന്‍ പ്രയാസം. അത്രക്ക് അനായാസമായ അഭിനയം. അല്ലെങ്കില്‍ തന്നെ ഇവര്‍ രണ്ടു പേരും ഇതില്‍ എവിടെയാണ് അഭിനയിച്ചത് എന്ന് മനസ്സിലായില്ല. പച്ചയായ ജീവിതം, നാടന്‍ സംഭാഷണം, അവരുടെ വേഷം, ഭാവം എല്ലാം കിറുകൃത്യം. അപ്പാനി രവിയെ അവതരിപ്പിച്ച ശരത്, പുള്ളി ഇനി മിക്കവാറും ആ ഒരു പേരില്‍ അറിയപ്പെടാനാണ് സാധ്യത, . ക്ലാമ്പ് രാജനെ അവതരിപ്പിച്ച ടിറ്റോ. അങ്ങോര്‍ നടനൊന്നുമല്ല, വേറെ ഏതാണ്ടാ.. അയാളെ പോലോരാളെ ഞാന്‍ ടൌണില്‍ വെച്ച് മുന്‍പ് എപ്പോഴോ കണ്ടിട്ടുണ്ട്..അല്ലെങ്കില്‍ അത് പോലെയുള്ള വേറൊരാളെ ഇനിയും കണ്ടെന്നു വരാം.അത്ര മാത്രം ജീവിതത്തോട് ചേര്‍ന്നു നില്‍ക്കുന്ന ഒരാള്‍. ഒരു പക്ഷെ അപ്പാനി രവിയേക്കാള്‍ ഒരു പൊടിക്ക് എനിക്ക് കൂടുതല്‍ ഇഷ്ട്ടപ്പെട്ട കഥാപാത്രം രാജന്‍ ആണ്. ഇനി ഒരിക്കല്‍ കൂടി അംഗമാലി ഡയറീസ് കാണുന്നുണ്ടെങ്കില്‍ അത് ഇവര്‍ രണ്ട് പേര്‍ക്ക് വേണ്ടി മാത്രം ആയിരിക്കും.

വിനായകന്‍ എന്ന നടന്‍

ഇന്ന് കൊച്ചിയില്‍ വെച്ച് നടന്ന CPC സിനി അവാര്‍ഡില്‍ മികച്ച നടനുള്ള അവാര്‍ഡ്‌ വാങ്ങി കൊണ്ട് വിനായകന്‍ പറഞ്ഞു" 94-ല്‍ സിനിമയില്‍ വന്നതാണ്‌ ഞാന്‍, ഇവിടെ വരെ എത്താന്‍ ഇത്രയും സമയം എടുത്തു, വളരെ സന്തോഷം. വിനായകന് ആ സദസ്സ് നല്‍കിയ കയ്യടി ആ കലാകാരനുള്ള യഥാര്‍ത്ഥ അംഗീകാരമാണ്.

ഒരു നൃത്തസംവിധായകന്‍ ആകാന്‍ ആഗ്രഹിച്ചഒരാളായിരുന്നു ഒരിക്കല്‍ വിനായകന്‍. ബ്ലാക് മെര്‍ക്കുറി എന്ന ഒരു ഡാന്‍സ് ട്രൂപ്പും പുള്ളിക്ക് ഉണ്ടായിരുന്നു. ഫയര്‍ ഡാന്‍സ് ആയിരുന്നു വിനായകന്‍റെ ഐറ്റം. പിന്നീട് തമ്പി കണ്ണന്താനം ആണ് മാന്ത്രികം (1995) എന്ന സിനിമയിലൂടെ വിനായകനെ സിനിമയിലേക്ക് കൊണ്ട് വന്നത്. പക്ഷെ വിനായകന്‍ ശ്രദ്ധിക്കപ്പെട്ടത് സ്റ്റോപ്പ്‌ വയലന്‍സ് (2002) എന്ന AK സാജന്‍ ചിത്രത്തിലെ മോന്ത എന്ന വേഷത്തിലൂടെ ആയിരുന്നു. തുടര്‍ന്ന് ഒന്നാമന്‍ (2001),ചതിക്കാത്ത ചന്തു (2004), ചിന്താമണി കൊലക്കേസ് (2006) അങ്ങനെ കുറെ ചിത്രങ്ങളില്‍ ചെറുതും വലുതുമായ വേഷങ്ങള്‍.അതിനിടയില്‍ ജെയിംസ് (2005) എന്ന ഹിന്ദി ചിത്രത്തിലും തിമിര് (2006) എന്ന തമിള്‍ ചിത്രത്തിലും എന്ന വേഷമിട്ടു.

2007-ല്‍ ബിഗ്‌ ബിയിലെ പാണ്ടി അസി, ചോട്ടാ മുംബെയിലെ സതീശന്‍ എന്നീ മികച്ച വേഷങ്ങളിലൂടെ വിനായകന് അവസരങ്ങള്‍ ഏറി വന്നു. എങ്കിലും വാരി വലിച്ച് കുറെ സിനിമകള്‍ ചെയ്തില്ല. അമല്‍ നീരദിന്‍റെസിനിമകളിലെ സ്ഥിരം സാന്നിധ്യം ആയ വിനായകന് സാഗര്‍ ഏലിയാസ്‌ ജാക്കി, ബാച്ചിലര്‍ പാര്‍ട്ടി, ഇയൂബിന്‍റെ പുസ്തകം എന്നീ സിനിമകളില്‍ മികച്ച വേഷങ്ങള്‍ ലഭിച്ചു. 2013-ല്‍ തമിഴില്‍ ധനുഷിന്‍റെ മാരിയാന്‍ എന്ന തമിള്‍ ചിത്രത്തിലും വില്ലനായി.

എന്നാല്‍ 2016ല്‍ ഇറങ്ങിയ കമ്മട്ടിപ്പാടം എന്ന ചിത്രത്തിലൂടെ കഥ മാറി. ഗംഗ എന്ന കഥാപാത്രം കൊണ്ട് വിനായകന്‍ എല്ലാവരുടെയും പ്രശംസ ഏറ്റു വാങ്ങി. ഒരു പക്ഷെ ആ ചിത്രത്തിലെ മറ്റുള്ള താരങ്ങളെയെല്ലാം കടത്തി വെട്ടിയ ഒരു പ്രകടനം. പ്രായമായ ഗംഗയുടെ ആവലാതിയും, പേടിയും നിസ്സഹായതയും എല്ലാം തന്‍റെ ശരീര ഭാഷ കൊണ്ട് വിനായകന്‍ മികച്ചതാക്കി.ചാനല്‍ അവാര്‍ഡുകളില്‍ വിനായകനെ ഒഴിവാക്കിയെങ്കിലും ജനങ്ങളുടെ അവാര്‍ഡ്‌ എപ്പോഴും വിനായകന് തന്നെ ആയിരുന്നു. അതിന്‍റെ ഏറ്റവും വലിയ ഉദാഹരണം ആയിരുന്നു വനിതാ അവാര്‍ഡും, ഇന്ന് നടന്ന CPC അവാര്‍ഡും. കമ്മട്ടിപ്പടത്തിലെ പുഴു പുലികള്‍ എന്ന ഗാനത്തിനട്ട് സംഗീതം നല്കിയതും വിനായകന്‍ ആയിരുന്നു. വിനായകന്‍ എന്ന നടന്‍റെ എക്കാലത്തെയും കികച്ച പ്രകടനം സമ്മാനിച്ച ഗംഗ എന്ന ആ കഥാപാത്രം ഒരു നോവായി പ്രേക്ഷകരുടെ മനസ്സില്‍ അവശേഷിക്കുന്നു.

പുഴു പുലികൾ പക്കി പരുന്തുകൾ
കടലാനകൾ കാട്ടുരുവങ്ങൾ
പലകാല പര ദൈവങ്ങൾ
പുലയാടികൾ നമ്മളുമൊപ്പം
നരകിച്ചു പൊറുക്കുന്നിവിടം
ഭൂലോകം തിരുമകനെ
കലഹിച്ചു മരിക്കുന്നിവിടം
ഇഹലോകം എൻ തിരുമകനെ...

Sikharam Thodu (2014) - Review

സിഖരം തൊട് (2014)



Spilers Ahead..

ചെല്ല പാണ്ട്യന്‍ (സത്യരാജ്) വികലാംഗനായ ഒരു പോലീസ്കാരന്‍ ആണ്. ഇന്നയാള്‍ ക്രൈം റിക്കോഡ്‌സ് ബ്യൂറോയില്‍ ക്ലാര്‍ക്ക് ആയി ജോലി ചെയ്യുകയാണ്. അയാള്‍ക്ക് ഒരു ആഗ്രഹമേ ഉള്ളൂ, തന്‍റെ ഏക മകന്‍ മുരളിയെ (വിക്രം പ്രഭു) ഒരു ഇന്‍സ്പെക്ടര്‍ ആക്കണം. അച്ഛന്‍റെ അവസ്ഥ ചെറുപ്പത്തിലെ കണ്ടു മനസ്സ് മടുത്ത മുരളിക്ക് പക്ഷെ എങ്ങനെ എങ്കിലും ഒരു ബാങ്ക് മാനേജര്‍ ആകണം എന്നാണ് മനസ്സില്‍. എന്നാലും അച്ഛനോട്‌ അവന്‍ അത് ഇത് വരെ പറഞ്ഞിട്ടില്ല. ഒരു യാത്രയിലാണ് അവന്‍ അംബുജത്തെ കാണുന്നത്. അവര്‍ തമ്മില്‍ പ്രണയത്തിലാകുന്നു. അവളാകട്ടെ എന്ത് വന്നാലും ഒരു പോലീസ്കാരനെ കല്യാണം കഴിക്കില്ല എന്ന് തീരുമാനിച്ചിട്ടുള്ളതാണ്.

പിന്നീട് ഒരു സാഹചര്യത്തില്‍ മുരളിക്ക് പോലീസ് SI സെലക്ഷന്‍ കിട്ടുന്നു. അവന്‍ ആ ജോലി കഴിയുന്നതും ഒഴിവാക്കാന്‍ നോക്കിയിട്ടും നടക്കുന്നില്ല. അച്ഛന്‍ ഹാപ്പി ആയെങ്കിലും അംബുജം അയാളുമായി അകലുന്നു . പിന്നീട് ഒരു 30 ദിവസത്തേക്ക് മാത്രം ആയി അവന്‍ കാക്കി ഇടുന്നു. നഗരത്തിലെ സ്റ്റേഷനില്‍ SI ആയി ചാര്‍ജ് എടുക്കുന്നു. കുഴപ്പങ്ങള്‍ ഒന്നുമില്ലാതെ 29 ദിവസം പിന്നിടുന്നു. പക്ഷെ മുപ്പതാമത്തെ ദിവസം നടക്കുന്ന ചില സംഭവങ്ങള്‍ മുരളിയുടെ പ്ലാന്‍സ് എല്ലാം മാറ്റി മറിക്കുന്നു. അയാള്‍ പോലീസില്‍ തുടരുമോ എന്നതാണ് കഥയുടെ ബാക്കി ഭാഗം പറയുന്നത്.

ഞാന്‍ വിക്രം പ്രഭുവിന്‍റെ ഒരു സിനിമ മാത്രമേ കണ്ടിട്ടുള്ളു. അറിമ നമ്പി. ആ ചിത്രം നല്ലൊരു ത്രില്ലര്‍ ആയിരുന്നു. അത് പോലെ ഒരു ചിത്രമാണ്‌ ഇതും. സംവിധായകന്‍ ഗൌരവ് (Thoonga Nagaram Fame) തന്നെയാണ് ഇതിലെ വില്ലന്‍ വേഷം ചെയ്തിരിക്കുന്നത്. നഗരങ്ങളിലെ ATM റോബറി വിഷയമാക്കി എടുത്ത ഈ ചിത്രത്തില്‍ നല്ല ആക്ഷന്‍ രംഗങ്ങള്‍ ഉണ്ട്. ആദ്യ പകുതി കുറച്ച് സ്ലോ ആണ്, പിന്നീട് നല്ല പേസില്‍ കാണാം. വിക്രം പ്രഭുവിന്‍റെ പുതിയ സിനിമ വീര ശിവജി ഈ വെള്ളിയാഴ്ച റിലീസ് ആകും. അതും നന്നാകും എന്ന് പ്രതീക്ഷിക്കുന്നു.

Mr. Church (2016) - A Brief Note

Mr Church (2016)

ചാര്‍ളിയും അമ്മ മേരിയും മാത്രമാണ് ആ വീട്ടില്‍ ഉള്ളത്. ഒരു ദിവസം രാവിലെ ചാര്‍ളി ഉണരുമ്പോള്‍ അവരുടെ കിച്ചണില്‍ ഒരാള്‍ ഭക്ഷണം ഉണ്ടാക്കുന്നു. അവള്‍ ഓടിച്ചെന്ന് അമ്മയോട് കാര്യം പറഞ്ഞപ്പോഴാണ് അറിയുന്നത് അത് അവരുടെ പുതിയ കുക്ക് ആണെന്ന്. മേരിക്ക് കാന്‍സര്‍ ആണ്.ആറ് മാസം കൂടിയേ ജീവിക്കാന്‍ സാധ്യത ഉള്ളു. അത് കൊണ്ട് കിച്ചണിലേക്ക് ഒരു സഹായത്തിന് കൊണ്ട് വന്നതാണ്‌ ചര്‍ച്ച് എന്ന ഈ കുക്കിനെ. ആദ്യമൊന്നും ചാര്‍ളിക്ക് അയാളെ ഇഷ്ട്ടമായില്ല. പക്ഷെ അയാള്‍ ഉണ്ടാക്കിയ ഭക്ഷണം കഴിച്ച് തുടങ്ങിയപ്പോള്‍ അവള്‍ അയാളെ ഇഷ്ട്ടപ്പെട്ടു തുടങ്ങി. മെല്ലെ മെല്ലെ ചര്‍ച്ച് ആ വീട്ടിലെ ഒരാളായി. മേരിയുടെ മരണ ശേഷവും അയാള്‍ ആ വീട്ടില്‍ തന്നെ ജീവിച്ചു. അയാള്‍ ചാര്‍ളിയുടെ ജീവിതത്തെ എങ്ങനെ സ്വാധീനിക്കുന്നു എന്നതാണ് കഥയുടെ ബാക്കി പറയുന്നത്.

യഥാര്‍ത്ഥത്തില്‍ നടന്ന ഒരു കഥയാണ് ഈ സിനിമയാക്കിയത്. അധികം കഥാപാത്രങ്ങളില്ല. മൂന്നു തലമുറകളിലൂടെയാണ് കഥ കടന്നു പോകുന്നത്. കണ്ടു കഴിഞ്ഞപ്പോള്‍ ഒരു സംതൃപ്തി തോന്നി. A Movie with a life എന്നൊക്കെ പറയാം.വലിയ വിജയം ഒന്നും ആയിട്ടില്ല. എങ്കിലും കണ്ടിരിക്കാവുന്ന ഒരു നല്ല ചിത്രമാണ്‌.

ഡാര്‍ലിംഗ് ഡാര്‍ലിംഗ് (2000) - ഓര്‍മ്മകള്‍ !!

ഡാര്‍ലിംഗ് ഡാര്‍ലിംഗ് (2000)

കൊട്ടാരം വീട്ടിലെ അപ്പൂട്ടന്‍ (1998), ഞങ്ങള്‍ സന്തുഷ്ട്ടരാണ് (1999), നാടന്‍ പെണ്ണും നാട്ടു പ്രമാണിയും (2000) ഇങ്ങനെ അടുപ്പിച്ച് മൂന്നു ജയറാം ചിത്രങ്ങള്‍ക്ക് ശേഷം രാജസേനന്‍ തന്‍റെ സ്ഥിരം ശൈലി ഒന്ന് മാറ്റിപ്പിടിക്കാന്‍ തീരുമാനിച്ചു. അങ്ങനെ എടുത്ത ചിത്രമാണ് ഡാര്‍ലിംഗ് ഡാര്‍ലിംഗ്. തന്‍റെ സ്ഥിരം നായകന്‍ ആയ ജയറാമിനെ മാറ്റി പകരം ദിലീപിനെയും കുഞ്ചാക്കോ ബോബനെയുമാണ് ആദ്യം കാസ്റ്റ് ചെയ്തത്. ചാക്കോച്ചന്‍റെ തിരക്ക് കാരണം പിന്നീട് ആ റോള്‍ വിനീതിന് വന്നു ചേര്‍ന്നു. ഒപ്പം കാവ്യാ മാധവനും ജഗതിയും ശരതും എല്ലാം ഉണ്ടായിരുന്നു. ഉദയ് കൃഷ്ണ സിബി കെ തോമസ്‌ ടീം ആണ് ചിത്രത്തിന് തിരക്കഥ ഒരുക്കിയത്. ജോക്കറിന് ശേഷം വന്ന ദിലീപ് പടം ആയിരുന്നു ഇത്. കഥ പറഞ്ഞപ്പോള്‍ ആദ്യം ദിലീപിന്‍റെ റോള്‍ വിനീതിനും വിനീതിന്‍റെ റോള്‍ ദിലീപിനും ആയിരുന്നു. പക്ഷെ കഥ കേട്ട ദിലീപ് തനിക്ക് വിനീതിന്‍റെ ആ നെഗറ്റീവ് വേഷം മതി എന്ന് പറഞ്ഞു. അന്ന് നായകന്‍ എന്നതിനേക്കാള്‍ വ്യത്യസ്ത വേഷങ്ങള്‍ ചെയ്യാന്‍ ആയിരുന്നു ദിലീപിന് താല്‍പര്യം. വിജയുടെ പ്രിയമുടന്‍ (1998) എന്ന ചിത്രവുമായി കുറച്ചു സമയങ്ങള്‍ ഉണ്ടായിരുന്നു എങ്കിലും ഡാര്‍ലിംഗ് ഡാര്‍ലിംഗ് അവതരണത്തിലും കോമഡിയിലും മികച്ചു നിന്നു. വിനീതും കാവ്യയും തമ്മിലുള്ള ഫോണ്‍ സംഭാഷണങ്ങള്‍ അന്ന് എല്ലാവരെയും ആകര്‍ഷിച്ച ഒന്നായിരുന്നു. അത് പോലെ തന്നെ ദിലീപ് ജഗതി ടീമിന്‍റെ കോമഡി, ഇന്ദ്രന്‍സ് - ജനാര്‍ദ്ദനന്‍- CI പോള്‍ സംഘത്തിന്‍റെ വിറ്റുകള്‍ എല്ലാം ക്ലിക്ക് ആയി.ഔസേപ്പച്ചന്‍ ഒരുക്കിയ ഗാനങ്ങള്‍ എല്ലാം സൂപ്പര്‍ ഹിറ്റ് ആയി. ഉള്ളടക്കത്തിലെ ഒരു BGM ആണ് പ്രണയ സൌഗന്ധികങ്ങള്‍ എന്ന എക്കാലത്തെയും മികച്ച പ്രണയ ഗാനം ആയി മാറിയത്. അത് കൂടാതെ ചിത്തിര പന്തലിട്ട്, മുത്തും പവിഴവും, അണിയമ്പൂ മുറ്റത്ത് അങ്ങനെ വേറെയും കുറേ ഹിറ്റ്‌ ഗാനങ്ങള്‍ ചിത്രത്തില്‍ ഉണ്ടായിരുന്നു.

2000 നവംബര്‍ 17ന് ആണ് ചത്രം റിലീസ് ചെയ്തത്. ചിത്രം അന്ന് മികച്ച സാമ്പത്തിക വിജയം നേടുകയും ചെയ്തു. ഇതിറങ്ങി ഒരു മാസം കഴിഞ്ഞപ്പോളാണ് കൃസ്ത് മസിന് തെങ്കാശിപട്ടണം , ദാദ സാഹിബ്‌, ദേവദൂതന്‍ എന്നീ ചിത്രങ്ങള്‍ ഇറങ്ങുന്നത്. തെങ്കാശി പട്ടണം വലിയൊരു ഹിറ്റ്‌ ആയി, . ജോക്കര്‍, ഡാര്‍ലിംഗ് ഡാര്‍ലിംഗ്, തെങ്കാശിപ്പട്ടണം അങ്ങനെ മൂന്ന് ഹിറ്റുകള്‍ ആയി ദിലീപിന്‍റെ താരമൂല്യം കുതിച്ചുയര്‍ന്നു. അത് കോളേജിലെ ഞങ്ങളുടെ അവസാന വര്‍ഷം ആയിരുന്നു. അന്ന് സോഷ്യല്‍ സര്‍വീസ് ഡേ കഴിഞ്ഞ് ഒരു ഞായറാഴ്ച ദിവസം ഞങ്ങള്‍ സുഹൃത്തുക്കള്‍ എല്ലാം കൂടെ ഒരുമിച്ച് പോയി തൃശൂര്‍ ജോസില്‍ നിന്നാണ് ഈ സിനിമ കണ്ടത്. ഞങ്ങള്‍ എല്ലാവരും മനസ്സ് തുറന്നു ചിരിച്ച ഒരു സിനിമ. അന്നത്തെ ആ നല്ല ഓര്‍മ്മകള്‍ക്ക് ഇന്ന് 17 വര്‍ഷം തികയുന്നു. അത് കൊണ്ട് ഇന്നും എന്‍റെ പ്രിയ ചിത്രങ്ങളില്‍ ഒന്നാണ് ഡാര്‍ലിംഗ് ഡാര്‍ലിംഗ്.

54321 (2016) - Tamil Movie Review !!

Spoilers Ahead..

വിനോദും ഭാര്യയും ഒരു കുഞ്ഞും അടങ്ങുന്ന കുടുംബം. ഒരു ദിവസം രാത്രി വിനോദ് ഇല്ലാത്ത സമയത്ത് ഒരു കള്ളന്‍ ആ വീട്ടില്‍ കയറുന്നു. സഹായിയെ പുറത്ത് നിര്‍ത്തി അയാള്‍ അകത്ത്‌ കയറുന്നു. പണവും പണ്ടവും ഒക്കെ എടുത്ത് പോകാന്‍ ഒരുങ്ങുമ്പോളാണ് ആ വീട്ടിലേക്ക് വേറൊരാള്‍ വരുന്നത്. അയാള്‍ ഉള്ള കാരണം കള്ളന് പുറത്തിറങ്ങാന്‍ പറ്റുന്നില്ല. പുറത്ത് നിന്ന് വൈകി എത്തുന്ന വിനോദിനെ ആ വന്നയാള്‍ അടിച്ച് കെട്ടിയിടുന്നു. ബോധം വരുന്ന വിനോദ് കാണുന്നത് കസേരയില്‍ കെട്ടിയിട്ടിരിക്കുന്ന തന്‍റെ ഭാര്യയെയാണ്. ആ വന്നയാള്‍ ആരാണ്? എന്താണ് അയാളുടെ ആവശ്യം? വിനോദിനും ഭാര്യക്കും എന്ത് സംഭവിക്കും? ആ കള്ളന്‍ എങ്ങനെ പുറത്ത് കടക്കും? ഇതാണ് കഥയുടെ ബാക്കി ഭാഗം പറയുന്നത്.

അഞ്ച് പേര്‍, 4 ലൈഫ് സ്റ്റൈല്‍, 3 കൊലപാതകം, 2 മണിക്കൂര്‍, 1 പ്രതികാരം. അതാണ് 54321 എന്ന ഈ സിനിമ പറയുന്നത്. രണ്ട് മണിക്കൂര്‍ ഒരു വീട്ടില്‍ നടക്കുന്ന സംഭവങ്ങള്‍. ഓരോ നിമിഷവും അടുത്തത് എന്ത് സംഭവിക്കും എന്ന ആകാംക്ഷയോടെ കണ്ടിരിക്കുന്ന ഒരു ത്രില്ലര്‍. പുതിയ സംവിധായകനും പുതുമുഖ താരങ്ങളും ആണ്. കണ്ടു നോക്കൂ. നിങ്ങള്‍ക്കും ഇഷ്ട്ടപെടും.

ജോസും സുമയും - ഉദ്യാനപാലകന്‍ (1996)

എനിക്ക് വളരെ ഇഷ്ടമുള്ള ഒരു സിനിമ ആണ് ഉദ്യാനപാലകന്‍. പണ്ട് കോളേജില്‍ പഠിക്കുമ്പോള്‍ തൃശൂര്‍ നിന്നും കണ്ടതാണ്. അന്ന് തൊട്ടേ ആ സിനിമയും, അതിലെ പാട്ടുകളും മനസ്സില്‍ കയറിയതാണ്. ഇന്നും അതിന്‍റെ ഡിസ്ക് കയ്യില്‍ ഉണ്ട്, ഇടക്ക് കാണാറുമുണ്ട്. അതിലെ രണ്ട് കഥാപാത്രങ്ങളാണ് ജോസും സുമയും. രണ്ടു മതത്തില്‍ പെട്ടവരായത് കൊണ്ട് ഒന്നിക്കാന്‍ പറ്റാതെ പോയവര്‍. പിന്നീട് സുമയുടെ ഭര്‍ത്താവ് മരിച്ച ശേഷം സിനിമയുടെ അവസാനമാണ് അവരുടെ വിവാഹം നടക്കുന്നത്.

മണിക്ക് തന്‍റെ തുടക്ക കാലത്ത് കിട്ടിയ നല്ലൊരു വേഷം ആയിരുന്നു ലൈന്‍മാന്‍ ജോസ്. അതില്‍ മദ്യപിച്ചു കൊണ്ട് വന്നു മമ്മുക്കയെ ചീത്ത പറയുന്ന സീനൊക്കെ അന്ന് നല്ല കയ്യടി കിട്ടിയ ഒന്നാണ്. കോമഡി കളിച്ചു നടന്ന സമയത്താണ് ലോഹി മണിക്ക് ആ ഒരു വേഷം കൊടുക്കുന്നത്. അന്ന് കുടിച്ചുള്ള മണിയുടെ അഭിനയം കണ്ട് നീ ശരിക്ക് കുടിച്ചിട്ടുണ്ടോ എന്ന് മമ്മുക്ക ചോദിച്ചെന്ന് മണി പറഞ്ഞ് കേട്ടിട്ടുണ്ട്. അത് പോലെ തന്നെ രേഖ മേനോനും. മമ്മുക്കയുടെ അനിയത്തിയുടെ വേഷം, ഭര്‍ത്താവിന്‍റെ പീഡനം സഹിക്കേണ്ടി വരുന്ന ഒരു വീട്ടമ്മ, പിന്നീട് അയാള്‍ മരിച്ച ശേഷം മോളുടെ കൂടെ സ്വന്തം വീട്ടില്‍ വന്ന് നില്‍ക്കേണ്ടി വരുന്നു അവള്‍ക്ക്. സുമ എന്ന ആ കഥാപാത്രം ഇന്നും ആളുകള്‍ ഓര്‍ത്തിരിക്കുന്ന ഒന്നാണ്. പറഞ്ഞ് വന്നത് രണ്ടു പേരും ജീവിതത്തില്‍ നിന്ന് ഇടക്ക് വെച്ച് ഇങ്ങനെ പോകുമെന്ന് നിനച്ചത് പോലുമില്ല.