FUKREY - Hindi Film Review From Dubai

Fukrey എന്ന ഈ സിനിമ കാണാന്‍ എന്നെ പ്രേരിപ്പിച്ച ഒരു ഘടകമേ ഉള്ളു, അത് ചിത്രത്തിന്റെ പോസ്റ്ററില്‍ കണ്ട ഫര്‍ഹാന്‍ അക്തര്‍ എന്ന പേരാണ്.
He is my favorite actor & director.ഫര്‍ഹാന്‍ അക്തര്‍ എന്ന പേര് ഞാന്‍ ആദ്യം കേള്‍ക്കുന്നത് 12 വര്‍ഷം മുന്‍പാണ്. Dil Chahatha Hai എന്ന ആ ക്യാമ്പസ്‌ ചിത്രം അത് വരെയുള്ള ബോളിവുഡ് സിനിമകളുടെ സ്ഥിരം ചട്ടകൂടുകളെ പൊളിച്ചെഴുതി. അത് വരെ ത്രികോണ പ്രണയ ചിത്രങ്ങളില്‍ കുരുങ്ങി കിടന്നിരുന്ന ഹിന്ദി സിനിമക്ക് ആണ്‍സൌഹൃദത്തിന്റെ കഥ പറഞ്ഞ ആ ചിത്രം ഒരു പുതുമ ആയി. പിന്നീട് അതിന്റെ പാത പിന്തുടര്‍ന്ന് കുറെ ചിത്രങ്ങള്‍ ഇറങ്ങി. rang de basanti, rock on,3 idots, zindagi na milegi dobara, delhi belly തുടങ്ങി ഈ വര്‍ഷം ഇറങ്ങിയ kai poche വരെ. കുറച്ചു സുഹൃത്തുക്കള്‍, അവരുടെ പ്രശ്നങ്ങള്‍, സ്വപ്‌നങ്ങള്‍,പ്രണയം,വിവാഹം അങ്ങനെയാണ് ആ ചിത്രങ്ങളുടെ ഒരു കഥാഗതി. ആ ഗണത്തിലേക്ക് ചേര്‍ക്കാന്‍ ഒരു പുതിയ ചിത്രം കൂടെ..അതാണ് Fukrey.

ഒരേ സ്കൂളില്‍ പഠിക്കുന്ന രണ്ടു സുഹൃത്തുക്കള്‍, ചൂച്ച ആന്‍ഡ്‌ ഹണ്ണി. അവരിലൂടെയാണ് കഥ ആരംഭിക്കുന്നത്. രണ്ടു പേര്‍ക്കും സ്കൂള്‍ പഠനം കഴിഞ്ഞാല്‍ നഗരത്തിലെ പ്രധാന കോളേജില്‍ പഠിക്കാന്‍ ആണ് ആഗ്രഹം, പഠിക്കാനുള്ള താല്പര്യം കൊണ്ടല്ല, മറിച്ച്‌ പെണ്‍കുട്ടികളെ വളക്കാം എന്നുള്ള ഒരു ഉദ്ദേശം കൊണ്ടാണ്. പക്ഷെ സ്കൂളിലെ മാര്‍ക്ക്‌ കുറവായത് കൊണ്ട് നേരായ വഴിയില്‍ അവിടെ അഡ്മിഷന്‍ കിട്ടില്ല. അത് കൊണ്ട് അവര്‍ കാഷ് കൊടുത്തു അവിടെ ഒരു അഡ്മിഷന്‍ നേടിയെടുക്കാന്‍ തീരുമാനിക്കുന്നു. ഇതിന്റെ ഇടയില്‍ ഹണ്ണിക്ക് ഒരു പ്രേമവും ഉണ്ടാകുന്നുണ്ട്. അതെ സമയം വേറെ ഒരു സര്‍ദാര്‍ പയ്യന്‍, പേര് ലാലി, അവന്‍ അവന്റെ ബാല്യകാല കൂട്ടുകാരിയെ പ്രണയിക്കാന്‍ വേണ്ടി ഇതേ കോളേജില്‍ ചേരാനുള്ള ശ്രമത്തിലാണു. പക്ഷെ അവനും മെറിറ്റ്‌ സീറ്റില്‍ അഡ്മിഷന്‍ കിട്ടില്ല. അവനും മറ്റവരെ പോലെ വളഞ്ഞ വഴിയിലൂടെ ഒരു സീറ്റ്‌ നേടാനുള്ള ശ്രമത്തിലാണ്. അവന്റെ അച്ഛന് നഗരത്തില്‍ ഒരു സ്വീറ്റ്‌ ഷോപ്പ് ഉണ്ട്, പക്ഷെ അയാള്‍ ഇത്രയധികം കാഷ് കൊടുക്കാന്‍ തയ്യാറാകുന്നില്ല. അതെ സമയം സഫര്‍ എന്ന നാലാമന്‍.അവന്‍ ഒരു കലാകാരന്‍ ആണ്, പക്ഷെ ആ കല കൊണ്ട് ജീവിക്കാന്‍ കഴിയാതെ ബുദ്ധിമുട്ടുകയാണ്. അവനും അവന്റെ അച്ഛന്റെ ചികില്‍സക്ക് വേണ്ടി കാഷ് വേണം.

ഒരു സാഹചര്യത്തില്‍ ഈ നാല് പേരും കണ്ടു മുട്ടുന്നു. നാല് പേരുടെയും ആവശ്യം പെട്ടെന്ന് കുറച്ചു കാഷ് ആണ്. ഹണ്ണി ഒരു പ്ലാന്‍ തയ്യാറാക്കുന്നു. ചൂച്ച കാണാറുള്ള സ്വപ്‌നങ്ങള്‍ വെച്ച് ഒരു നമ്പര്‍ ഉണ്ടാക്കി അവര്‍ എടുക്കാറുള്ള ലോട്ടറി എപ്പോളും അടിക്കാറുണ്ട്. ഈ തവണ കുറച്ചു കൂടുതല്‍ കാശിനു ലോട്ടറി വാങ്ങിക്കാന്‍ വേണ്ടി അവര്‍ തീരുമാനിക്കുന്നു. അവരുടെ കയ്യില്‍ അത്ര മാത്രം കാശില്ല. സഫര്‍ പറഞ്ഞതനുസരിച്ച് അവര്‍ നഗരത്തിലെ ഡോണ്‍ ആയ ഭോലി പഞാബന്‍ എന്ന ഒരു സ്ത്രീയെ ചെന്ന് കാണുന്നു, അവരെ ഈ കാര്യങ്ങള്‍ പറഞ്ഞു മനസ്സിലാക്കുന്നു, കുറച്ചു നിബന്ധനയില്‍ അവള്‍ ലോട്ടറി എടുക്കാം എന്ന് സമ്മതിക്കുന്നു.ലാലിയുടെ അച്ഛന്റെ കടയുടെ പ്രമാണം അവള്‍ക്കു ഈട് വെക്കുന്നു. പക്ഷെ അന്ന് രാത്രി ചൂച്ച ഉറങ്ങുന്നില്ല, സ്വപ്നവും കാണുന്നില്ല. കാലത്ത് പക്ഷെ ചൂച്ച ഒരു കള്ള സ്വപ്നം അവരെ പറഞ്ഞു കേള്‍പ്പിക്കുന്നു, അത് വെച്ച് കണക്ക് കൂട്ടിയ സംഖ്യ കൊണ്ട് അവര്‍ ഒരു വലിയ തുകക്ക് ഭോലിയെ കൊണ്ട് ലോട്ടറി എടുപ്പിക്കുന്നു.

ഇവിടെ നിന്ന് കഥ വേറെ ഒരു ട്രാക്കിലേക്ക് മാറുകയാണ്. ആ ലോട്ടറി അടിക്കുമോ? അടിചില്ലെന്കില്‍ ഭോലിയുടെ കാഷ് അവര്‍ എങ്ങനെ തിരിച്ചു കൊടുക്കും? കൊടുത്തില്ലെങ്കില്‍ ലാലിയുടെ അച്ഛന്റെ കടയുടെ പ്രമാണം എങ്ങനെ തിരിച്ചു കിട്ടും? അവര്‍ക്ക് എങ്ങനെ ആ കോളേജില്‍ അഡ്മിഷന്‍ കിട്ടും? സഫറിന്റെ അച്ഛന്റെ ചികില്‍സ എങ്ങനെ നടക്കും? ശേഷം ഭാഗം വെള്ളിത്തിരയില്‍ കണ്ടു ആസ്വദിക്കുക.

ഒരു ഡല്‍ഹി ബെല്ലി മോഡല്‍ സ്ക്രിപ്റ്റ്‌ ആണ് ചിത്രത്തിന്റേത്,എന്നാല്‍ ആ ഒരു നിലവാരത്തിലേക്ക് എത്താന്‍ കഴിഞ്ഞിട്ടുമില്ല. എങ്കിലും സിനിമ എല്ലാവര്ക്കും ആസ്വദിക്കാവുന്ന ഒന്ന് തന്നെയാണ്. നായകന്മാരുടെ നാടന്‍ ഭാഷയിലുള്ള തെറിവിളി, ഡബിള്‍ മീനിംഗ് ഡയലോഗുകള്‍ എല്ലാം നല്ല പ്രതികരണം ആയിരുന്നു. തിയറ്ററില്‍ കുറെ പേര്‍ ഇങ്ങനെ ഉച്ചത്തില്‍ ചിരിക്കുന്നത് കണ്ടിട്ട്‌ സത്യം പറഞ്ഞാല്‍ കുറെ നാളായി. നായകന്മാര്‍ നാല് പേരും നല്ല പെര്‍ഫോമന്‍സ് ആയിരുന്നു. എങ്കിലും കയ്യടി കൂടുതല്‍ വാങ്ങിയത് ചൂച്ച ആണ്. പിന്നെ ഇടയ്ക്കു വന്നു പോകുന്ന ഒരു കള്ളുകുടിയന്‍, ലാലിയുടെ അച്ഛന്‍, അവരും തിളങ്ങി. നായികമാര്‍ക്ക് അത്ര പ്രാധാന്യം ഇല്ല. ഹണ്ണിയുടെ കാമുകി സുന്ദരിയാണ്, ലാലിയുടെ ബാല്യകാല കൂട്ടുകാരി ഇടയ്ക്കു വന്നു പോകുന്നു. പാട്ടുകള്‍ എല്ലാം സിനിമയുടെ മൂഡിന് ചേരുന്ന fast numbers ആയിരുന്നു.

3 idiots, ഡല്‍ഹി ബെല്ലി, ഈ ചിത്രങ്ങളൊക്കെ കണ്ടിറങ്ങിയപ്പോള്‍ നിങ്ങളുടെ മനസ്സില്‍ എന്തായിരുന്നു? ഒരു നല്ല ചിത്രം കണ്ട സംതൃപ്തി, സന്തോഷം. അല്ലെ? അത്രയൊന്നും തോന്നില്ലെങ്കിലും ഫുക്രേയ്‌ ഒരു നല്ല ചിത്രം തന്നെയാണ്. ഒരു രണ്ടു രണ്ടര മണിക്കൂര്‍ ചിരിക്കാനുള്ള വകുപ്പൊക്കെ സിനിമയില്‍ ഉണ്ട്. എനിക്ക് ഇഷ്ട്ടപെട്ടു.കോമഡി ചിത്രങ്ങള്‍ ഇഷ്ട്ടപെടുന്നവര്‍ ധൈര്യമായി കണ്ടോളു, അല്ലാത്തവര്‍ പോയില്ലെങ്കിലും കുഴപ്പമില്ല. അടുത്ത ആഴ്ച വീണ്ടും കാണുന്നത് വരെ നന്ദി..നമസ്കാരം.

Yamla Pagla Deewana 2 - Review From Dubai

ഈ സിനിമ കാണാന്‍ മൂന്നു കാരണങ്ങള്‍ ഉണ്ട്. ആദ്യത്തെ കാരണം ഇന്ന് ഇവിടെ ഹോളിഡേ ആണ് എന്നുള്ളതാണ്. വല്ലപ്പോഴും അല്ലെ ഇങ്ങനെ ഒരു അവധി കിട്ടു, അപ്പൊ പിന്നെ ഒരു സിനിമ കാണാമെന്ന് വെച്ചു. രണ്ടാമത്തെ കാരണം ഇതിന്റെ ആദ്യ ഭാഗം രണ്ടു വര്ഷം മുന്‍പ്‌ ഞാന്‍ കണ്ടിട്ടുണ്ട് എന്നതാണ്. അത്ര മികച്ചൊരു സിനിമ ആയിരുന്നില്ല എങ്കിലും കണ്ടിരിക്കാവുന്ന ഒന്നായിരുന്നു അത്. അന്ന് അത്യാവശ്യം ചിരിക്കാന്‍ സാധിച്ച കുറെ സീനുകള്‍ ചിത്രത്തില്‍ ഉണ്ടായിരുന്നു, പിന്നെ ഈ അച്ഛനും രണ്ടു മക്കളും കൂടിയുള്ള ഒരു സിനിമ ആയത് കൊണ്ട് , അവരെ അങ്ങനെ ഒരുമിച്ചു സ്ക്രീനില്‍ കാണുന്നതിന്റെ ഒരു കൌതുകവും ഉണ്ടായിരുന്നു. അപ്പോള്‍ അവര്‍ വീണ്ടും വരുന്നു എന്ന് കേട്ടപ്പോള്‍ എന്നാ പിന്നെ ഒന്ന് കണ്ടേക്കാം എന്ന് തീരുമാനിച്ചു. മൂന്നാമത്തേതും വളരെ പ്രധാനപ്പെട്ടതുമായ കാരണം ഇതിന്റെ സംവിധായകന്‍ സംഗീത്‌ ശിവന്‍ ആണെന്നുള്ളതാണ്. മലയാളത്തില്‍ വ്യൂഹം, യോദ്ധ, ഡാഡി, ഗാന്ധര്‍വ്വം, നിര്‍ണ്ണയം എന്നീ ചിത്രങ്ങള്‍ എടുത്ത സംവിധായകന്‍. ഇപ്പൊ കുറച്ചു നാളായി ബോല്ലിവുഡിലാണ്. അവിടെ സോര്‍, ചുരാ ലിയാ ഹേ തുംനെ, ക്യാ സൂപ്പര്‍ കൂള്‍ ഹായ് ഹം, ഏക്‌, ക്ലിക്ക് അങ്ങനെ കുറെ ചിത്രങ്ങള്‍ എടുത്തിട്ടുണ്ട്. ഈ അടുത്ത് മലയാളത്തില്‍ ആസിഫ്‌ അലി നായകനായ Idiots എന്ന ചിത്രത്തിന്റെ തിരകഥ എഴുതിയിരുന്നു.

ഇനി സിനിമയിലേക്ക്, ആദ്യ ഭാഗം കാണാത്തവര്‍ക്ക് വേണ്ടി പറയാം. ധരംസിങ്ങും (ധര്‍മേന്ദ്ര)മകന്‍ ഗജോധര്‍സിങ്ങും (ബോബി ഡിയോള്‍. രണ്ടു പേരും തിരു മുടിഞ്ഞ കള്ളന്മാരാണ്. തന്റെ ഭാര്യയോടു പിണങ്ങിയാണ് ധരം തന്റെ ഇളയ മകന്റെ കൂടെ കഴിയുന്നത്. ആദ്യ ചിത്രത്തില്‍ ധരമിന്റെ മൂത്ത മകന്‍ പരംവീര്‍ സിംഗ് (സണ്ണി ഡിയോള്‍) അച്ഛനെയും അനിയനെയും കൂട്ടി കൊണ്ട് വരാന്‍ കാനഡയില്‍ നിന്ന് ബനാറസില്‍ എത്തുന്നതും, ഗജോധരിന്റെ പ്രണയ സാക്ഷാല്‍ക്കാരത്തിനായി അവര്‍ മൂന്നു പേരും കൂടെ പഞ്ചാബില്‍ പോകുന്നതും, അവിടെ നടക്കുന്ന തമാശകളുമായിരുന്നു കഥ. എന്നാല്‍ ഈ രണ്ടാം ഭാഗത്തില്‍ കഥ തുടങ്ങുമ്പോള്‍ ധരം ഒരു കള്ള സന്ന്യാസി ആണ്, കൂടെ മകന്‍ ഗജോധരും ഉണ്ട്. ഈ തവണ ഗജോധര്‍ വലിയ ഒരു സല്‍മാന്‍ ഖാന്‍ ഫാന്‍ ആണ്. സ്വാമിയെ കാണാന്‍ എത്തുന്ന യോഗ് രാജ്‌ എന്ന ഒരു ഒരു ബിസിനസ്‌കാരനെ (അനു കപൂര്‍) ധരംസിംഗ് ഒരു ധനികന്‍ ആണെന്ന് തെറ്റിദ്ധരിക്കുന്നു. സത്യത്തില്‍ അയാള്‍ വലിയ ഒരു കടക്കെണിയിലാണ്. അയാളുടെ മകള്‍ സുമനെ കൊണ്ട് ഗജോധരിനെ കല്യാണം കഴിപ്പിക്കാന്‍ വേണ്ടിയുള്ള ധരമിന്റെ ശ്രമങ്ങളാണ് സിനിമയുടെ പ്രധാന കഥ (ഗജോധരിന്റെ ആദ്യ കാമുകി എവിടെ പോയോ എന്തോ?) കൂടാതെ ആ നായികയും ഒരു സല്‍മാന്‍ ഖാന്‍ ഫാന്‍. അത് കൊണ്ട് തന്നെ ചിത്രം മുഴുവനും സല്‍മാന്റെ ഡയലോഗുകളും പാട്ടുകളും ഉപയോഗിച്ചിട്ടുണ്ട്.

മൂത്ത മകന്‍ പരംവീര്‍ ഇപ്പോള്‍ ലണ്ടനില്‍ ആണ്, അയാള്‍ അവിടെ ഒരു debt collector ആണ്. (അയാളുടെയും ഭാര്യയെയും കുട്ടികളെയും ഒന്നും കാണിക്കുന്നില്ല). അയാളുടെ ബോസ്സിന്റെ നിര്‍ദേശ പ്രകാരം അയാള്‍ യോഗ് രാജിന്റെ അടുക്കല്‍ എത്തുന്നു, അയാള്‍ എന്ത് കൊണ്ടാണ് ലോണ്‍ തിരിച്ചടക്കാത്തത് എന്ന് അന്വേഷിക്കാന്‍ വേണ്ടി പരം അയാളുടെ പ്രശ്നങ്ങള്‍ അന്വേഷിക്കുന്നു. തുടര്‍ന്ന് അയാള്‍ അയാളുടെ കൂടെ ജോലിക്ക് കയറുന്നു. അയാളുടെ പഴയ ക്ലബ്‌ പരം നന്നാക്കുകയും റീ ഓപ്പണ്‍ ചെയ്യുകയും ചെയ്യുന്നു. അതെ സമയം യോഗ് രാജിനെ കാണാനും ആ കല്യാണം ഉറപ്പിക്കാനും വേണ്ടി ധരം സിങ്ങും ഗജോധാരും വലിയ ധനികരുടെ വേഷത്തില്‍ നാട്ടില്‍ നിന്ന് ഇവിടെ എത്തുന്നു.പരംവീര്‍ അവരെ അതില്‍ നിന്ന് പിന്തിരിപ്പിക്കാന്‍ ശ്രമിക്കുന്നു,പക്ഷെ അവര്‍ സമ്മതിക്കുന്നില്ല. അങ്ങനെ ആ കല്യാണ നിശ്ചയം നടക്കുന്നു, എന്നാല്‍ പിന്നീട് അറിയുന്നു സുമന്‍ യോഗ് രാജിന്റെ മകള്‍ അല്ല, അയാളുടെ യഥാര്‍ത്ഥ മകള്‍ രീത ആണ്. അവള്‍ക്ക്ക് ആണെന്കില്‍ ഇഷ്ടം പരംവീറിനോടും. ഇതറിയുന്ന ധരം അവളെ വശീകരിക്കാന്‍ വേണ്ടി ഗജോധരിനെ വേറെ ഒരു വേഷത്തില്‍ അവതരിപ്പിച്ച്‌,തന്റെ രണ്ടാമത്തെ മകന്‍ ആണെന്നും പറഞ്ഞു യോഗ് രാജിന് പരിചയപെടുത്തുന്നു. ഒരാളും രണ്ടു വേഷവും മാറി മാറി വരുന്നു. സ്വാഭാവികമായും പ്രശ്നങ്ങള്‍ ആരംഭിക്കുമല്ലോ? ഈ തവണ അവര്‍ക്ക് കൂട്ടായി ഒരു ആള്‍ക്കുരങ്ങും(Orangutan) ഉണ്ട്. തുടര്‍ന്നുണ്ടാകുന്ന സംഭവ വികാസങ്ങളാണ് ഇതിലെ കഥ.

ധര്‍മേന്ദ്ര..77 വയസ്സുള്ള ഒരു സീനിയര്‍ സൂപ്പര്‍സ്റ്റാര്‍, ഈ പ്രായത്തിലും അദ്ധേഹത്തിന്റെ ആ ഒരു എനര്‍ജി ലെവല്‍ ആദ്യ ഭാഗത്തില്‍ തന്നെ എന്നെ അതിശയിപ്പെടുത്തിയിരുന്നു. രണ്ടു വര്ഷം കഴിഞ്ഞു ഈ രണ്ടാം ഭാഗത്തിലും അതിനു മാറ്റമൊന്നുമില്ല. സ്വന്തം മക്കളുടെ കൂടെ ഡാന്‍സും, സംഘട്ടനവും, കോമഡിയും എല്ലാം ചെയ്തു അദ്ദേഹം ചിത്രത്തില്‍ നിറഞ്ഞു നില്‍ക്കുന്നു. പ്രായത്തിന്റെ ഒരു അവശത മുഖത്തുണ്ടെങ്കിലും അദ്ധേഹത്തിന്റെ മനസ്സ് ഇപ്പോളും ചെറുപ്പമാണ്. അദ്ധേഹത്തിന്റെ ഒരു സ്ഥിരം ഡാന്‍സ് സ്റ്റൈലിനെ കളിയാക്കി കൊണ്ട് ഒരു ഗാനം ചിത്രത്തിന്റെ അവസാനം ചേര്‍ത്തിട്ടുണ്ട്.ഓം ശാന്തി ഓം എന്നാ ചിത്രത്തില്‍ അദ്ധേഹത്തിന്റെ ആ സ്റ്റെപ് കാണിക്കുന്നുണ്ട്.

സണ്ണി ഡിയോള്‍..ധര്‍മേന്ദ്രയുടെ മൂത്ത മകന്‍, ആദ്യ കാലത്ത് ഹിന്ദിയില്‍ Gatak,Gayal, Gadhar, Darr, Yamini,Border,Jeet, Ziddi അങ്ങനെ കുറേ സൂപ്പര്‍ ഹിറ്റുകള്‍ നല്‍കിയ നടന്‍. ഇപ്പോള്‍ അധികം ചിത്രങ്ങളൊന്നും ഇല്ല. സ്വന്തം നിര്‍മ്മാണ കമ്പനിയുടെ ചിത്രമാണ്‌ ഇത്. വില്ലന്മാരുടെ നേരെ വലിയ വായില്‍ ആക്രോശിക്കുന്ന സണ്ണിയുടെ സ്ഥിരം നമ്പര്‍ ആദ്യ ഭാഗത്തില്‍ ഒരു കോമഡി ആയി അവതരിപ്പിച്ചിരുന്നു. സഹിക്കാന്‍ കഴിയാത്ത ആ വലിയ ശബ്ദം കേട്ട് വില്ലന്മാരെല്ലാം ചെവി പൊത്തുന്നതായിരുന്നു ആ സീന്‍.ഒരു സ്പൂഫ് എന്ന നിലയില്‍ അത് രസിപ്പിക്കുകയും ചെയ്തു. ഇതിലും അങ്ങനെ ഒരു സീനുണ്ട്. സണ്ണിയുടെ ശബ്ദത്തിന്റെ ആഘാതം കൊണ്ട് വില്ലന്മാരെല്ലാം പറക്കുന്നതായാണ് എടുത്തിരിക്കുന്നത്. പക്ഷെ അത് കുറച്ചു കൂടി പോയി എന്ന് പറയാതെ വയ്യ.

ബോബി ഡിയോള്‍..ആ പേര് കേള്‍ക്കുമ്പോള്‍ എന്റെ മനസ്സില്‍ ആദ്യം ഓര്‍മ്മ വരുന്നത് അയാളുടെ ആദ്യ ചിത്രമായ "ബര്‍സാത്" ആണ്. മുടിയൊക്കെ നീട്ടി വളര്‍ത്തി നീല കൂളിംഗ്‌ ഗ്ലാസും വെച്ചു കൊണ്ടുള്ള ആ വരവ് ഇന്നും മനസ്സില്‍ ഉണ്ട്. അതിനു ശേഷം Gupt, Soldire,Ajnabee, Humraz എന്നീ സൂപ്പര്‍ ഹിറ്റുകള്‍ ഉണ്ടായിരുന്നു എങ്കിലും മുന്‍ നിരയിലേക്ക് ഉയരാന്‍ ബോബിക്ക് കഴിഞ്ഞില്ല. ചേട്ടനെ പോലെ തന്നെ ഇപ്പോള്‍ ബോബിക്കും സിനിമകള്‍ കുറവാണ്‌.അവസാനം വിജയിച്ച ചിത്രം ഇതിന്റെ ആദ്യ ഭാഗമാണ്. അത് കൊണ്ടായിരിക്കാം വീണ്ടും അവരുടെ കൂടെ തന്നെ ഒരു ചിത്രം ചെയ്തത്, പോരാതെ സല്‍മാന്‍ ഖാനെയും കൂട്ട് പിടിച്ചിട്ടുണ്ട്, പക്ഷെ ഇത് കൊണ്ടും ബോബിയുടെ കരിയറിന് ഗുണമൊന്നും ഉണ്ടാകുമെന്ന് തോന്നുന്നില്ല.

ഇവരെ കൂടാതെ അനുപം ഖേര്‍,ജോണി ലിവര്‍, തുടങ്ങിയവരും ചിത്രത്തില്‍ ഉണ്ട്. ആര്ര്‍ക്കും കാര്യമായി ഒന്നും ചെയ്യാനില്ല. നായികമാരെയൊന്നും മുന്‍പ് കണ്ടതായി ഓര്‍മ്മയില്‍ ഇല്ല. ഗാനങ്ങളില്‍ ഒന്നും തന്നെ അത്ര മികച്ചതല്ല. കോമഡിക്ക് വേണ്ടി ചെയ്തത് ഒന്നും എല്ക്കുന്നില്ല എന്നതാണ് സിനിമയുടെ പ്രശ്നം. ക്ലൈമാക്സില്‍ കുറെ സുമോ ഗുസ്ഥിക്കാരെ കൊണ്ട് വന്നു എന്തൊക്കെയോ കാണിച്ചു കൂട്ടി, പ്രേക്ഷകന്റെ ക്ഷമ പരീക്ഷിക്കുന്ന രംഗങ്ങള്‍ ആണ് അതെല്ലാം. ഒന്നാം ഭാഗത്തിന്റെ ഏഴയലത്ത് പോലും എത്താന്‍ ഈ രണ്ടാം ഭാഗത്തിന് സാധിച്ചിട്ടില്ല. എങ്കിലും slapstick & non sence കോമഡി ഇഷ്ട്ടപെടുന്നവര്‍ക്ക് വേണമെകില്‍ ഒരു തവണ കാണാം, അല്ലാത്തവര്‍ ആ ഭാഗത്തേക്ക് പോകാതിരിക്കുന്നതാണ് നല്ലത്. വീണ്ടും കാണുന്നത് വരെ എല്ലാവര്ക്കും നന്ദി..നമ്സക്കാരം !!

മുരളി ഗോപി - Marching Left Right Left !!

ഭരത് ഗോപിയുടെ മകന്‍, അതില്‍ കൂടുതല്‍ ഒരു പരിചയപ്പെടുത്തല്‍ വേണ്ട മുരളി ഗോപിക്ക്. പരിചയ സമ്പന്നനായ ലാല്‍ജോസിന്റെ ദിലീപ്‌ ചിത്രത്തിലൂടെ തുടക്കം, അതും ഒരേ സമയം മൂന്നു കാര്യങ്ങള്‍ ചെയ്തു കൊണ്ട്..അഭിനയം,ആലാപനം,തിരക്കഥ. 2004 അവസാനം ഇറങ്ങിയ രസികന്‍ എന്ന ആ ചിത്രം പക്ഷെ പരാജയപ്പെട്ടു.എങ്കിലും വില്ലന്‍ വേഷം ചെയ്ത ആ നടനെ എല്ലാവരും ശ്രദ്ധിച്ചു, സിനിമ കണ്ടിറങ്ങിയ ഭൂരിഭാഗം ആളുകള്‍ക്കും അന്ന് അറിയില്ലായിരുന്നു അത് ഭരത് ഗോപിയുടെ മകന്‍ ആണെന്നുള്ള കാര്യം. ഒരു ഡയലോഗ് പോലുമില്ലാതെ തന്നെ കാള ഭാസ്കരന്‍ എന്ന ആ വില്ലന്‍ വേഷം മികച്ചതാക്കാന്‍ മുരളീകൃഷ്ണന് കഴിഞ്ഞു. ചിത്രത്തിലെ "ചാഞ്ഞു നില്ക്കണ " എന്ന് തുടങ്ങുന്ന ഗാനം ആലപിച്ചതും മുരളിയാണ്. ഒരു പക്ഷെ നായകന് വേണ്ടി വില്ലന്‍ പാടിയ ഏക മലയാള ഗാനവും അതായിരിക്കാം.നല്ലൊരു തുടക്കം കിട്ടിയെങ്കിലും ചിത്രത്തിന്റെ പരാജയം കാരണം വേറെ മികച്ച അവസരങ്ങള്‍ ഒന്നും അയാളെ തേടി ഉടനെ വന്നില്ല. അതിനു ശേഷം മുരളി കുറച്ചു കാലം ദുബായില്‍ ജോലി ചെയ്തു.



അവിടെ നിന്ന് അഞ്ചു വര്ഷം കഴിഞ്ഞാണ് ബ്ലെസ്സിയുടെ ഭ്രമരത്തിലൂടെ (2009) മോഹന്‍ലാലിന്‍റെ കൂടെ മുരളി ഗോപി എന്ന പേരിലായിരുന്നു രണ്ടാം വരവ്. ചെറിയ വേഷം ആയിരുന്നു എങ്കിലും ശ്രദ്ധിക്കപെടുന്ന ഒരു വേഷമായിരുന്നു അതിലെ ഡോക്ടര്‍ അലക്സ്‌. ചിത്രം കണ്ട പലര്‍ക്കും അത് രസികനിലെ വില്ലന്‍ ആയിരുന്നു എന്ന് മനസ്സിലായതെ ഇല്ല. ആ ചിത്രത്തിലെ മികച്ച അഭിനയത്തിന് ആ വര്‍ഷത്തെ സത്യന്‍ മെമ്മോറിയല്‍ അവാര്‍ഡ്‌ ലഭിച്ചു. പിന്നീട് കമലിന്റെ ഗദാമ്മയില്‍ (2011) ചെറിയൊരു വേഷം. അതിനു ശേഷം 2012 തുടക്കത്തില്‍ "ഈ അടുത്ത കാലത്ത്‌" എന്ന ചിത്രം വരുന്നത്. ന്യൂ ജനറേഷന്‍ സിനിമ അല്ലെങ്കില്‍ മുരളി ഗോപിയുടെ ഭാഷയില്‍ ഹാബിറ്റ്‌ ബ്രേക്കെര്സ് " ആയ സിനിമകളുടെ ഭാഗം ആയി അരുണ്‍ കുമാര്‍ അരവിന്ദ്‌ എന്ന മികച്ചൊരു സംവിധായകന്റെ കൂടെ ചേര്‍ന്ന് ഒരുക്കിയ "ഈ അടുത്ത കാലത്ത് "പതിവ് സിനിമകളില്‍ നിന്നും ആശയപരമായും അവതരണ ശൈലിയിലും വേറിട്ട്‌ നിന്നു, ചിത്രം വലിയ രീതിയില്‍ പ്രേക്ഷക പ്രശംസ നേടി. ഒപ്പം ആ ചിത്രത്തില്‍ ഡോക്ടര്‍ അജയ്‌ കുര്യന്‍ എന്ന മികച്ചൊരു കഥാപാത്രവും ചെയ്തു. അതിലെ അഭിനയത്തിനും തിരകഥക്കുമായി ചെറുതും വലുതുമായി ഒട്ടേറെ അംഗീകാരങ്ങളും മുരളിയെ തേടിയെത്തി.

എന്നാല്‍ മുരളി ഗോപി അരങ്ങു തകര്‍ത്തത് മമ്മൂട്ടി നായകനായ "താപ്പാന" എന്ന ചിത്രത്തിലെ കന്നുകുട്ടന്‍ എന്ന കരുത്താര്‍ന്ന വില്ലന്‍ വേഷത്തിലാണ്. തന്റെ അച്ഛന്റെ കൂടെ അഭിനയിച്ച സീനിയര്‍ നടനായ മമ്മൂട്ടിയുടെ കൂടെ ഒരു പതര്‍ച്ചയും കൂടാതെ മുരളി ഗോപി അഭിനയിച്ചു.ഈ വര്ഷം ഓഗസ്റ്റ്‌ ക്ലബ്‌, ലെഫ്റ്റ് റൈറ്റ് ലെഫ്റ്റ് എന്നീ സിനിമകളും പൂര്‍ത്തിയാക്കി. അതില്‍ ലെഫ്റ്റ് റൈറ്റ് ലെഫ്റ്റ് എന്ന ചിത്രത്തിന്റെ തിരക്കഥ ഒരുക്കിയിയതും മുരളി ഗോപി തന്നെയാണ്. അരുണ്‍ കുമാര്‍ അരവിന്ദിന്റെ കൂടെ വീണ്ടും ചേര്‍ന്നാണ് തന്റെ പുതിയ ചിത്രമായ ലെഫ്റ്റ് റൈറ്റ് ലെഫ്റ്റ് എന്ന ചിത്രവും മുരളി ഗോപി ഒരുക്കുന്നത്. മൂന്നു കാലഘട്ടങ്ങളിലൂടെയാണ് അതിന്റെ കഥ പറഞ്ഞു പോകുന്നത്. ഒപ്പം രാജേഷ്‌ പിള്ളയുമായി ചേര്‍ന്ന് മോഹന്‍ലാലിനെ നായകന്‍ ആക്കി അണിയിച്ചൊരുക്കുന്ന ലുസിഫെര്‍ എന്ന ചിത്രതിനു വേണ്ടിയും മുരളിഗോപി തൂലിക ചലിപ്പിക്കുന്നുണ്ട്. മുരളി ഗോപിയും അരുണ്‍ കുമാര്‍ അരവിന്ദും ചേര്‍ന്നുള്ള നിര്‍മ്മാണ കമ്പനിയുടെ ആദ്യ ചിത്രമായ "വെടി വഴിപാട്‌ " എന്ന ഒരു ചിത്രവും പണിപ്പുരയില്‍ ഉണ്ട്.

മുരളി ഗോപി അറിയപ്പെടുന്ന ഒരു ചെറുകഥ എഴുത്തുകാരന്‍ കൂടിയാണ്.പത്തൊമ്പതാമത്തെ വയസ്സില്‍ "ആയുര്‍രേഘ" എന്ന ആദ്യത്തെ ചെറുകഥ കലാകൌമുദിയില്‍ പ്രസിദ്ധീകരിച്ചിരുന്നു. അദ്ധേഹത്തിന്റെ തിരഞ്ഞെടുക്കപ്പെട്ട കുറച്ചു ചെറുകഥകള്‍ "രസികന്‍ സോധനെ" എന്ന പേരില്‍ റെയിന്‍ബോ ബുക്സ്‌ പുറത്തിറക്കിയിരുന്നു. തുടക്ക കാലത്ത് ദി ഹിന്ദു, ദി ഇന്ത്യന്‍ എക്സ്പ്രസ്സ്‌ എന്നീ പത്രങ്ങളുടെ സബ് എഡിറ്റര്‍ ആയും മുരളി ഗോപി ജോലി ചെയ്തിട്ടുണ്ട്. ഇപ്പോള്‍ Msn india entertainment ചീഫ്‌ എഡിറ്റര്‍ ആയി വര്‍ക്ക്‌ ചെയ്യുന്നു. തിരുവനന്തപുരത്തെ പേയാട് ആണ് മുരളി ഗോപിയുടെ താമസം. വരും വര്‍ഷങ്ങളില്‍ മലയാള സിനിമയില്‍ മികച്ച ചിത്രങ്ങളുടെ ഒരു ലെഫ്റ്റ് റൈറ്റ് ലെഫ്റ്റ് ഒരുക്കി മുന്നേറാന്‍ മുരളി ഗോപിക്ക് കഴിയട്ടെ എന്ന് നമുക്ക് ആശംസിക്കാം !!

Aurangzeb - Hindi Film Review From Dubai

എന്റെ ഈ ബ്ലോഗില്‍ സിനിമ പലപ്പോഴും ഒരു വിഷയം ആയി വന്നിട്ടുണ്ട്, എങ്കിലും ഒരു റിവ്യൂ ആദ്യമായാണ്. ഒരു ചേഞ്ച്‌ ആര്‍ക്കാണ് ഇഷ്ട്ടമല്ലാത്തത്?

ആദ്യം തന്നെ പറയട്ടെ, Aurangzeb എന്ന സിനിമ കാണാനുള്ള ഒരേ ഒരു കാരണം നമ്മുടെ പൃഥ്വിരാജ് ആണ്, കാര്യം യാഷ്‌രാജ് ഫിലിംസ് നല്ല ബാനര്‍ ആണെങ്കിലും ഞാന്‍ അവരുടെ എല്ലാ സിനിമകളും കാണാറില്ല, പിന്നെ പണ്ടത്തെ പോലെ അല്ല,അവര്‍ ഇപ്പൊ ഒരു വര്ഷം കുറെ സിനിമകള്‍ ഇറക്കുന്നുണ്ട്, അതില്‍ ചിലതൊക്കെ വെറും കൂതറ ആകാറുണ്ട്. ഇത് പിന്നെ നമ്മുടെ ഒരു താരം ആ ഒരു ബാനറില്‍ ,ഹിന്ദിയിലെ വലിയ നടന്മാരുടെ കൂടെ അഭിനയിക്കുമ്പോ, അതും ഒരു പോലീസ് വേഷത്തില്‍, എങ്ങനെ ഒഴിവാക്കും?

ഇനി സിനിമയിലേക്ക്...കഥ നടക്കുന്നത് ഗുര്‍ഗോന്‍ എന്ന സ്ഥലത്താണ്, അവിടത്തെ ഒരു റിയല്‍ എസ്റ്റേറ്റ്‌ കിംഗ്‌ ആണ് യാഷ്‌ വര്‍ദ്ധന്‍( ജാക്കി ശ്രോഫ്ഫ് ).ഒരു പാട് ക്രിമിനല്‍ ആക്ടിവിട്ടീസുമായി നടക്കുന്ന അയാളുടെ മകന്‍ ആണ് അജയ്‌ ( അര്‍ജുന്‍ കപൂര്‍) . അവരുടെ ഗാങ്ങിനെ പിടിക്കാന്‍ നടക്കുന്ന പോലീസ് ഓഫീസേര്‍സ് ആണ് പ്രിത്വിയും അമ്മാവന്‍ ഋഷി കപൂറും. പ്രിത്വിയുടെ അച്ഛന്‍ (അനുപം ഖേര്‍ ) ഒരിക്കല്‍ പ്രിത്വിയോടു തന്റെ വേറെ ഒരു ഭാര്യയെയും മകനെയും കുറിച്ച് പറയുന്നു. അവരെ കാണാന്‍ പോയ പ്രിത്വി കണ്ടത്‌ അജയുടെ മുഖമുള്ള വിശാലിനെയാണ്. തുടര്‍ന്ന് നടന്ന അന്വേഷണത്തില്‍ വിശാല്‍ അജയുടെ ഇരട്ട സഹോദരന്‍ ആണെന്നു മനസ്സിലാകുന്നു. തന്റെ അമ്മാവനുമായി ആലോചിച്ചു പ്രിത്വി ഒരു മാസ്റ്റര്‍ പ്ലാന്‍ തയ്യാറാക്കുന്നു, അങ്ങനെ അവര്‍ അജയെ പിടി കൂടുന്നു , യാഷ്‌ വര്ധന്റെ ബിസിനസ്‌ രഹസ്യങ്ങള്‍ ചോര്‍ത്താനും, അയാളെ കുടുക്കാനും വേണ്ടി പ്രിത്വിയും ഋഷി കപൂറും ചേര്‍ന്ന് വിശാലിനെ അജയുടെ വേഷത്തില്‍ യാഷ്‌ വര്ധന്റെ അടുത്തേക്ക്‌ അയക്കുന്നു.ഷാരൂഖ്‌ ഖാന്റെ ഡോണ്‍ പോലെ ഒരു സംഭവം.പക്ഷെ ഇവിടെ വിശാല്‍ അവര്‍ക്കെതിരെ തിരിയുന്നിടത്താണ് കഥ മാറുന്നത്. അവിടെ ഇടവേള.. പോലീസിന്റെ തന്ത്രം ഫലിക്കുമോ? വിശാല്‍ യഥാര്‍ത്ഥത്തില്‍ ആരാണ്? യാഷ്‌ വര്‍ദ്ധന് അയാളെ മനസ്സിലാകുമോ? പോലീസ് പിടിയിലായ അജയ്‌ എങ്ങനെ രക്ഷപെടും? യാഷ്‌ വര്‍ദ്ധന് എന്ത് സംഭവിക്കും? തുടര്‍ന്നുണ്ടാകുന്ന സംഭവങ്ങളാണ് ബാക്കി കഥ.

റിയല്‍ എസ്റ്റേറ്റ്‌ കിംഗ്‌ ആയി ജാക്കി ശ്രോഫ്ഫ്‌ ഒതുക്കമുള്ള പെര്‍ഫോമന്‍സ് കാഴ്ച വെച്ചു. ഇപ്പോള്‍ മികച്ച വേഷങ്ങള്‍ മാത്രം തെരഞ്ഞെടുത്തു ചെയ്യുന്ന ഋഷി കപൂര്‍ തന്റെ വേഷം മികച്ചതാക്കി,ഇത് വരെ നമ്മള്‍ കാണാത്ത ഒരു പെര്‍ഫോമന്‍സ്, ഇപ്പോളാണ് ഇവരുടെയൊക്കെ പ്രതിഭ നമ്മള്‍ കാണുന്നത്. പിന്നെ നമ്മുടെ ഹീറോ, അര്‍ജുന്‍ കപൂറിന്റെ ആദ്യ സിനിമ Ishqzaade ഞാന്‍ കണ്ടിട്ടില്ല, എന്തായാലും ഈ സിനിമയിലെ ഡബിള്‍ റോള്‍ അയാള്‍ക്ക് താങ്ങാവുന്നതിലും അപ്പുറമാണ്, ഒരു സിനിമയുടെ മാത്രം പരിചയ സമ്പത്തുള്ള ഒരു നടനെ കൊണ്ട് കഴിയുന്നതിലും കൂടുതലാണ് അയാളെ കൊണ്ട് ചെയ്യിച്ചത്, എങ്കിലും ആക്ഷന്‍ സീനുകള്‍ എല്ലാം മികച്ചതാക്കി, ചില കോമഡിയും നന്നായി, ചില സീനിലോക്കെ കയ്യടിയും വാങ്ങി, പക്ഷെ പയ്യന്‍ ഒരു പാട് തെളിയാന്‍ ഉണ്ട്, വേറെ ഏതെന്കിലും മെയിന്‍ നടന്‍മാര്‍ ആയിരുന്നെകില്‍ ആ വേഷം കുറച്ചു കൂടെ നന്നാക്കിയേനെ.

പിന്നെ നമ്മുടെ പ്രിത്വിരാജ്‌, പോലീസ് വേഷത്തില്‍ നന്നായി തിളങ്ങി. നായകന്‍ എന്ന് തന്നെ പറയാവുന്ന വേഷം തന്നെ ആയിരുന്നു ഇതിലെ ACP ആര്യ, മലയാളത്തില്‍ നിന്നുള്ള ഒരു നടനു ഇതൊക്കെ തന്നെ ധാരാളം. ഹിന്ദി ഭാഷ മാത്രം അത്ര ശരി ആയിട്ടില്ല,എങ്കിലും മോശം എന്ന് പറയാനൊക്കില്ല, എന്തൊക്കെ ആയാലും പ്രിത്വി ഒരു മലയാളി അല്ലെ? ആ ഒരു വ്യത്യാസം കാണാതിരിക്കുമോ? എങ്കിലും ഹിന്ദി സിനിമയിലെ പ്രമുഖരുടെ കൂടെ പ്രിത്വി അഭിനയിക്കുന്നത് കാണാന്‍, പല രംഗങ്ങളിലും ഋഷി കപൂറിന്റെ കൂടെ പ്രിത്വി ഒരു വിധം നന്നായി പെര്‍ഫോം ചെയ്തപ്പോള്‍ പ്രിത്വിയുടെ നാട്ടുകാരന്‍ ആയി, ഒരു മലയാളി ആയി ആ കൂട്ടത്തില്‍ ഇരുന്നപ്പോള്‍ തെല്ല് സന്തോഷം തോന്നി.ചിത്രം തുടങ്ങുന്നതും അവസാനിക്കുന്നതും പ്രിത്വിയിലൂടെയാണ്. എന്തായാലും പ്രിതിയുടെ വേഷം ശ്രദ്ധിക്കപ്പെടും എന്ന് ഉറപ്പാണ്‌. തിരക്കുള്ള ഒരു നായക നടന്‍ ആകാന്‍ കഴിഞ്ഞില്ലെങ്കിലും ബോളിവുഡില്‍ നിന്ന് കൂടുതല്‍ അവസരങ്ങള്‍ പ്രിത്വിയെ തേടിയെത്തും എന്ന് തന്നെ കരുതാം.

തുണി അഴിക്കാന്‍ ഒരു മടിയുമില്ലാത്ത ഒരു പാവം കുട്ടിയാണ് ഇതിലെ നായിക, കഥയില്‍ അവള്‍ക്ക് അധികം പ്രാധാന്യം ഇല്ലെങ്കിലും അവളെ കൊണ്ട് കഴിയുന്നത് അവള്‍ ചെയ്തിട്ടുണ്ട്. ആദ്യത്തെ സീനിലെ ബികിനിയും, ഇംഗ്ലീഷ് സിനിമയെ വെല്ലുന്ന രീതിയിലുള്ള ഒരു ലിപ് ലോക്കും തന്നെ ഗംഭീരം, നമ്മളും ലോക സിനിമയുടെ കൂടെ മുന്നേറുന്നുണ്ട്, അര്‍ജുന്‍ കപൂറിന്റെ കൂടെ ഉള്ള ഒരു കിടപ്പറ സീന്‍ ഉണ്ടായിരുന്നത് ഇവിടെ കട്ട്‌ ചെയ്തു എന്ന് തോന്നുന്നു, അതൊരു നഷ്ട്ടമായി തോന്നി. അനുപം ഖേര്‍ ഒരു സീനില്‍ മാത്രം വന്നു പോയി, Barbadhiyaan എന്ന ഗാനം തെറ്റില്ല,ഇത് പോലൊരു ആക്ഷന്‍ ചിത്രത്തില്‍ ഗാനങ്ങള്‍ക്ക് അധികം പ്രാധാന്യവും ഇല്ല. ചിത്രത്തില്‍ നല്ലൊരു ത്രില്ലിംഗ് കഥ ഉണ്ട്, പക്ഷെ എടുത്തു വന്നപ്പോള്‍ ഒരു പഞ്ച് ഇല്ലാതെ ആയി പോയി. തുടക്കം മുതല്‍ ഒടുക്കം വരെ ഒരു ആക്ഷന്‍ മൂഡ്‌ നില നിര്‍ത്താന്‍ ശ്രമിച്ചിട്ടുണ്ട്, പക്ഷെ എവിടെയൊക്കെയോ എന്തൊക്കെയോ പാകപ്പിഴകള്‍ ഉണ്ട്, പ്രധാന പ്രശ്നം ചിത്രത്തിന്റെ ലാഗിംഗ് ആണ്, പിന്നെ ഇടക്കിടക്ക്‌ കയറി വരുന്ന ഫാമിലി സെന്റിമെന്റ്സും. ഇത് രണ്ടും ഒരു ആക്ഷന്‍ ചിത്രത്തിനു യോജിച്ചതല്ല,ചിലപ്പോ ഒരു പുതുമുഖ സംവിധായകന്റെ അനുഭവ സമ്പത്തിന്റെ കുറവ് കൊണ്ടാകാം. ചുരുക്കത്തില്‍ കുറച്ചു കൂടെ ശ്രദ്ധിച്ചിരുന്നു എങ്കില്‍ Aurangzeb ഈ അടുത്ത കാലത്ത്‌ ഹിന്ദിയില്‍ ഇറങ്ങിയ മികച്ച ഒരു ചിത്രം ആയേനെ .

ഒരിക്കല്‍ ഒരു ചാനെല്‍ ഇന്റര്‍വ്യൂവില്‍ എന്താണ് സ്വപ്നം എന്നു ചോദിച്ചപ്പോള്‍ പ്രിത്വി പറഞ്ഞു " എനിക്ക് മലയാള സിനിമയുടെ ബ്രാന്‍ഡ്‌ അമ്പാസിഡര്‍ ആകണം" അതായതു അമിതാബ് ബച്ചന്‍ ഹിന്ദി സിനിമയെ പ്രതിനിധീകരിക്കുന്ന പോലെ, പൃഥ്വിരാജ് മലയാള സിനിമയെ പ്രതിനിധീകരിക്കണം, തന്റെ സിനിമകള്‍ക്ക് ഹിന്ദിയിലും മാര്‍ക്കറ്റ്‌ ഉണ്ടാകണം എന്ന് . പ്രിത്വി പറഞ്ഞത്‌ അയാളുടെ സ്വപ്നം ആണ്. നടക്കും അല്ലെങ്കില്‍ നടത്തും എന്ന് അയാള്‍ വിശ്വസിക്കുന്ന സ്വപ്നം. ആ സ്വപ്നം യാഥാര്‍ത്ഥ്യം ആകട്ടെ എന്ന് നമുക്ക്‌ പ്രാര്‍ത്ഥിക്കാം. കുറച്ചു കൂടെ കച്ചവട ഫോര്‍മുലകള്‍ ഉള്ള ഒരു സിനിമയിലൂടെ ബോളിവുഡില്‍ പ്രിത്വി ഒരു പടി കൂടെ കയറും എന്ന് കരുതാം.

തന്റെ കരിയറിലെ മികച്ച സമയത്തിലൂടെയാണ് പ്രിത്വി ഇപ്പോള്‍ പോകുന്നത്, കഴിഞ്ഞ വര്ഷം അയാളും ഞാനും തമ്മില്‍ എന്ന ചിത്രത്തിലെ മികച്ച വേഷം, ഈ വര്ഷം സെല്ലുലോയിഡ് എന്ന സിനിമയിലൂടെ രണ്ടാമത്തെ സംസ്ഥാന അവാര്‍ഡ്‌ , തൊട്ടു പിന്നാലെ വന്ന മുംബൈ പോലീസ് എന്ന സിനിമയിലൂടെ പ്രേക്ഷകരുടെ പ്രശംസ ലഭിച്ചു, മൂന്നും ഹിറ്റ്‌ ആകുകയും ചെയ്തു, ഇപ്പൊ ഹിന്ദിയില്‍ ഒരു ചിത്രം ..Aurangzeb.. ഇനി മലയാളത്തില്‍ മെമ്മറീസ്, ലണ്ടന്‍ ബ്രിഡ്ജ്, തുടങ്ങിയ നല്ല കുറെ പ്രോജെക്ട്സ്, ഹിന്ദിയില്‍ ഷാരൂഖ്‌ -അഭിഷേക് ബച്ചന്‍ ടീമിന്റെ കൂടെ ഫറാഖാന്റെ ന്യൂ ഇയര്‍...യെസ്‌ , പ്രിത്വി ഓണ്‍ ദി റൈറ്റ് ട്രാക്ക്‌..പിക്ചര്‍ അഭി ബാകി ഹെ ഭായ്‌..!!