ഷെറപ്പോവയ്ക്ക് ഒരു തുറന്ന കത്ത്

സച്ചിന്‍ ടെണ്ടുല്‍ക്കറെ അറിയില്ലെന്നു പറഞ്ഞതിന് മലയാളി യുവത്വത്തിന്റെ തെറിയഭിഷേകം ഏറ്റുവാങ്ങുന്ന ടെന്നീസ് താരം മരിയ ഷെറപ്പോവയ്ക്ക് ഒരു തുറന്ന കത്ത്. കെ. പി റഷീദ് എഴുതുന്നു.



പ്രിയപ്പെട്ട മരിയ ഷറപ്പോവാ,

സത്യത്തില്‍ ഇങ്ങനെയൊന്നുമല്ല ഈ കത്ത് തുടങ്ങേണ്ടത്. പെണ്ണുങ്ങളെ വിളിക്കാവുന്ന മലയാളത്തിലെ ഏതെങ്കിലും പച്ചത്തെറിയില്‍ തുടങ്ങണം. അല്ലെങ്കില്‍ ഇംഗ്ലീഷിലോ അതല്ലെങ്കില്‍ ഗൂഗിള്‍ ട്രാന്‍സ്ലേറ്റര്‍ വെച്ച് റഷ്യനിലോ ആക്കി കത്ത് തുടങ്ങണം. എന്തായാലും തുടങ്ങേണ്ടത് തെറിയില്‍ തന്നെയാണ് എന്നതില്‍ കറ കളഞ്ഞ മലയാളിയായ ഈയുള്ളവന് സംശയമേയില്ല.

മരിയ ഷറപ്പോവ, നിങ്ങള്‍ ചെയ്ത കുറ്റം എത്ര ഗുരുതരമാണ് എന്ന് നിങ്ങള്‍ക്കറിയുമോ? സച്ചിന്‍ ടെണ്ടുല്‍ക്കറിനെ നിങ്ങള്‍ക്കറിയില്ല പോലും. നിങ്ങളെപ്പോലെ ഞങ്ങളുടെ പത്രങ്ങളും ചാനലുകളും ഇത്രയേറെ പടം കൊടുത്തു പ്രോല്‍സാഹിക്കുന്ന ഒരാള്‍ ഇക്കാണിച്ചത്, ചുരുങ്ങിയത് ഉടുതുണി അഴിച്ച് പെരുവഴിയില്‍ നിര്‍ത്തി കല്ലെറിഞ്ഞു കൊല്ലേണ്ട അപൂര്‍വ്വങ്ങളില്‍ അപൂര്‍വ്വമായ കുറ്റം തന്നെയാണ്. എന്നിട്ടും അതു ചെയ്യാതെ ഞങ്ങളുടെ ഡാറ്റ കാശ് ചെലവാക്കി, ഞങ്ങളുടെ കമ്പ്യൂട്ടറിലും മൊബൈലിലും കുത്തിപ്പിടിച്ചിരുന്ന് 'വെവരമറിയിച്ചു'തന്നത് ഞങ്ങളുടെ മര്യാദയാണ്. അത് ഞങ്ങളുടെ മഹത്തായ സംസ്കാരമാണ്. നിങ്ങള്‍ക്കറിയാമല്ലോ, നൂറ് ശതമാനം സാക്ഷരതയുള്ളവരാണ് ഞങ്ങള്‍.

ഇന്നലെയാണ്, ഫേസ്ബുക്കില്‍നിന്ന് ഞാനും ആ വിവരമറിഞ്ഞ് ഞെട്ടിയത്. നിങ്ങളാ കൊടും ക്രൂരത ചെയ്തിരിക്കുന്നു! tennisworldusa.org എന്ന അമേരിക്കന്‍ ടെന്നീസ് വാര്‍ത്താ പോര്‍ട്ടല്‍ ഗോസിപ്പ് മട്ടില്‍ പറഞ്ഞ വെറുമൊരു വാര്‍ത്ത ആയിരുന്നെങ്കിലും 123 കോടി ഇന്ത്യക്കാരെ ബാധിക്കുന്ന ഏറ്റവും സുപ്രധാനമായ വാര്‍ത്ത എന്ന നിലയില്‍ ഞങ്ങടെ മാധ്യമങ്ങളെല്ലാം അതു പറയുക തന്നെ ചെയ്തു. വിംബിള്‍ഡണ്‍ കളിക്കിടെ റോയല്‍ ബോക്സില്‍ ഇരുന്ന ഡേവിഡ് ബെക്കാമിനെക്കുറിച്ച് അങ്ങേര് വലിയ പുലിയാണെന്ന് പറഞ്ഞ നിങ്ങളോട് അപ്പുറത്തിരിക്കുന്നത് ഞങ്ങളുടെ കണ്‍കണ്ട പടച്ചവന്‍ സച്ചിന്‍ ടണ്ടുല്‍ക്കറാണെന്നും അതാരാണെന്ന് അറിയില്ലേ എന്നും പത്രക്കാരന്‍ ചോദിച്ചപ്പോള്‍, അറിയില്ലെന്ന് നിങ്ങള്‍ പറഞ്ഞു എന്നറിഞ്ഞപ്പോള്‍ സത്യത്തില്‍ ഇടനെഞ്ചു തകര്‍ന്നു പോയി. എങ്ങിനെ നിങ്ങള്‍ക്ക് അതിനു കഴിഞ്ഞു, എന്റെ മരിയാ ഷറപ്പോവേ!



നിങ്ങളെ ഞങ്ങള്‍ക്കറിയാമെന്ന് നിങ്ങള്‍ മറക്കരുത്. നിങ്ങളെന്നല്ല ടെന്നീസ് കളിക്കുന്ന എല്ലാ പെണ്ണുങ്ങളുടെയും എബിസിഡി മുഴുവന്‍ ഞങ്ങള്‍ക്ക് കാണാപ്പാഠമാണ്. തുണി ഉടുക്കുന്നതിലെ കുഴപ്പമാണ് ഇന്നാട്ടിലെ പെണ്ണുങ്ങളെ ബലാല്‍സംഗം ചെയ്യാനും തോണ്ടാനും കാരണമെന്ന് അടിയുറച്ച് വിശ്വസിക്കുന്ന ഞങ്ങളുടെ നാട്ടിലെ മാധ്യമങ്ങള്‍ നിങ്ങളുടെയൊന്നും ഒരൊറ്റ കളിയുടെ പടവും മുടങ്ങാതെ പ്രസിദ്ധീകരിക്കുന്നുണ്ട് എന്നത് മറക്കേണ്ട. ഞങ്ങളുടെ സ്പോര്‍ട്മാന്‍ സ്പിരിറ്റ് ആണത്, മരിയ, സ്പോര്‍ട്സ്മാന്‍ സ്പിരിറ്റ്!

ആയിരക്കണക്കിന് ഫോട്ടോകളില്‍നിന്ന് കാലിനു താഴെ ക്യാമറ വെച്ച് പകര്‍ത്തുന്നവ മാത്രം എടുത്ത് മുറിയില്‍ ഒട്ടിക്കുന്ന ഞങ്ങളോട് നിങ്ങള്‍ ഇത് ചെയ്യരുതായിരുന്നു. കളി അറിയില്ലെങ്കിലും നിങ്ങളെ ആരാധിക്കുന്ന ഞങ്ങളുടെ, ക്രിക്കറ്റ് പടച്ചവനെ എങ്കിലും നിങ്ങള്‍ അറിയേണ്ടതായിരുന്നു. ഇനി അറിയില്ലെങ്കില്‍ പോലും ഞങ്ങള്‍ സാധാരണ ചെയ്യുന്നത് പോലെ സച്ചിനേട്ടനെ അറിയുമെന്നും ഒന്നിച്ചു ചായ കുടിച്ചിട്ടുണ്ടെന്നുമൊക്കെ നിങ്ങള്‍ പറഞ്ഞിരുന്നെങ്കില്‍ ഇത്രം ദണ്ണം വരുമായിരുന്നോ? നിങ്ങളിന്നലെ പറഞ്ഞില്ലേ, ബാസ്കറ്റ് ബോള്‍ ഇതിഹാസം മൈക്കല്‍ ജോര്‍ഡനേം നിങ്ങള്‍ക്കറിയില്ലെന്ന്. പുള്ളിയെ ഞങ്ങള്‍ക്കുമറിയില്ലെങ്കിലും നിങ്ങളെ പോലെ അതിങ്ങനെ ഉളുപ്പില്ലാതെ വിളിച്ചു പറയുന്നില്ലല്ലോ. വെവരം വേണം മരിയാ, വെവരം!

സംഗതി ശരിയാണ്. അറിവില്ലായ്മ ഞങ്ങള്‍ക്കുമുണ്ട്. ഉദാഹരണത്തിന് ഞങ്ങളുടെ രാഷ്ട്രപിതാവായ മഹാത്മാ ഗാന്ധിജി ആരെന്നു ചോദിച്ചാല്‍ അറിയാത്തവരൊക്കെ ഞങ്ങള്‍ക്കിടയില്‍ കാണും. അതിനിപ്പോള്‍, സ്വാതന്ത്യ്രസമരം വരെയൊന്നും പോവേണ്ട, ക്രിക്കറ്റ് കളിയിലേക്ക് തന്നെ വരാം. ഉദാഹരണത്തിന്, ശേഖര്‍ നായിക്ക് എന്ന ഞങ്ങളുടെ അന്ധ ക്രിക്കറ്റ് ടീമിന്റെ ക്യാപ്റ്റന്‍. 58 മാച്ചുകളില്‍ 32 സെഞ്ച്വറികള്‍ എടുക്കുകയും 2012ല്‍ നടന്ന അന്ധര്‍ക്കു വേണ്ടിയുള്ള ആദ്യ ട്വന്റി ട്വന്റി ക്രിക്കറ്റ് ചാമ്പ്യന്‍ഷിപ്പില്‍ ഇന്ത്യയെ വിജയത്തില്‍ എത്തിക്കുകയും ചെയ്ത ആളാണ്. അറിയാമോ എന്ന് ചോദിച്ചാല്‍ ഞാന്‍ ചിരിക്കും, ബാക്കിയുള്ളവരും. ഞങ്ങള്‍ക്കാര്‍ക്കും അയാളെ അറിയില്ല പെങ്ങളേ. വനിതാ ക്രിക്കറ്റ് ടീം ക്യാപ്റ്റന്‍ ജുലാന്‍ ഗോസ്വാമിയുടെ കാര്യവും തഥൈവ. ഐ.സി.സി വനിതാ ക്രിക്കറ്റ് റാങ്കിംഗില്‍ ഒന്നാം സ്ഥാനത്തുണ്ടായിരുന്ന മിതാലി രാജ് ഞങ്ങളുടെ മുന്‍ വനിതാ ക്രിക്കറ്റ് ക്യാപ്റ്റനാണ്. പുള്ളിക്കാരിയെ അറിയാമോ എന്നൊന്നും ചോദിച്ചേക്കരുത്, കുടുങ്ങും. ഇതൊക്കെ പറയുന്നു എന്നേയുള്ളൂ. വേറെയുമുണ്ട് ഒരു പാടാള്‍ക്കാര്‍. ഞങ്ങളാരും കേട്ടിട്ടുപോലുമില്ലാത്ത വല്യ വല്യ ഇന്ത്യന്‍ പുലികള്‍. ഇപ്പോള്‍ നിങ്ങളെ ടൈപ്പില്‍ പെട്ട സാനിയ മിര്‍സയെക്കുറിച്ച് പറയാം. പുള്ളിക്കാരത്തിയെ അറിയാത്ത ഒരൊറ്റ കുഞ്ഞു കുട്ടിയേം ഇവിടെ കാണില്ല. എന്നാലോ , ടെന്നീസ് എന്തെന്നൊന്നും ഞങ്ങളോട് ചോദിച്ചേക്കരുത്.

ഇതൊക്കെ കേട്ട് ഞാന്‍ നിങ്ങടെ ആളാണെന്നൊന്നും കരുതേണ്ട. സച്ചിനെ അറിയില്ലാന്ന് പറഞ്ഞത് പോക്രിത്തരം തന്നെയാണ്. കൈയില്‍ കിട്ടിയാല്‍ കരണത്തിട്ട് പൊട്ടിക്കേണ്ട കുറ്റം. അറിയാന്‍ വേണ്ടി പറയുകയാണ്, ഇപ്പറഞ്ഞ സച്ചിന്‍ ഞങ്ങടെ സ്വന്തം കൊച്ചനാണ്. കാണപ്പെട്ട ദൈവം. ഞങ്ങളുടെ നാട്ടിലും വേറെ കുറേ രാജ്യങ്ങളിലും മാത്രം കളിക്കുന്ന ക്രിക്കറ്റ് എന്നൊരു കളിയുണ്ട്. അതാണ് പുള്ളിക്കാരന്റെ സെറ്റപ്പ്. ഞങ്ങടെ നാട്ടിലെ ഏറ്റവും ആരാധകരുള്ള കളിക്കാരനാണ്. വേണമെങ്കില്‍, പുള്ളിയെ ഞങ്ങള് പ്രധാനമന്ത്രിയുമാക്കും. നിങ്ങളും ഞങ്ങളെ പോലെ നിങ്ങളെ നാട്ടിലെ പി.എസ്.സി എഴുതുന്നുവെങ്കില്‍ അതിന്റെ ഗൈഡില്‍ ഉറപ്പായും കാണും പുള്ളിക്കാരന്റെ വിവരങ്ങള്‍. അതൊക്കെ വായിച്ച് പഠിച്ച് വിവരക്കേട് മാറ്റി മുംബൈയിലെ സച്ചിന്റെ വീട്ടില്‍ ചെന്ന് അഞ്ജലിച്ചേച്ചിയുടെ മുന്നില്‍ ചെന്ന് സെല്‍ഫി പോസ്റ്റ് ചെയ്യുന്നതാവും നല്ലത്. അല്ലെങ്കില്‍, വിവരമറിയും.

അതിന്നലെ തന്നെ നിങ്ങളറിഞ്ഞു കാണും എന്നെനിക്കറിയാം. അത്രയ്ക്ക് കേട്ടില്ലേ തെറി :)

നിങ്ങളും ഞങ്ങളെ പോലെ ഫേസ്ബുക്കും നോക്കിയിരിക്കുന്നത് കൊണ്ട് തെറി കേട്ട് കണ്ണു പുളിച്ചു കാണണം. അതില്‍ ചിലതൊന്നും നിങ്ങള്‍ക്ക് മനസ്സിലായിക്കാണില്ല എന്നറിയാം. അത് മലയാളമാണ് മരിയാ. ഞങ്ങളുടെ ഭാഷ. അത് പഠിപ്പിക്കുന്ന സ്കൂളിലൊന്നും ഞങ്ങടെ കൊച്ചുങ്ങള് പഠിക്കില്ലെങ്കിലും സംഗതി ശ്രേഷ്ഠഭാഷയാണ്. അതാ തെറി കണ്ടാലറിയാമല്ലോ. നിങ്ങള്‍ക്ക് ഇനി അതറിയാമോ എന്നാരോ സംശയം പറഞ്ഞതു കൊണ്ടാണ് അറിയാവുന്നവര്‍ ഇംഗ്ലീഷിലും അല്ലാത്തവര്‍ റഷ്യനിലും അതിട്ടു തന്നത്. സച്ചിനാരെന്നറിയില്ലെങ്കില്‍ നിങ്ങടെ അപ്പനോടോ അമ്മയോടോ കെട്ട്യോനോടോ ഒക്കെ ചോദിക്കണം എന്ന് പറഞ്ഞതൊക്കെ കണ്ട് പ്രശ്നം നിസ്സാരം എന്നൊന്നും കരുതേണ്ട. ഫേസ്ബുക്കില്‍ കയറിയാല്‍ ഞങ്ങള്‍ക്ക് വിരലില്‍ തെറിയേ വരൂ. അത് പെണ്ണുങ്ങടെ പേജാണെങ്കില്‍ കൂടും. അതും കാണാന്‍ കൊള്ളാവുന്നതും പത്രത്തില്‍ മാത്രം കാണാന്‍ വിധിയുള്ളതുമായ മദാമ്മപ്പെണ്ണുങ്ങളെങ്കില്‍ ഞങ്ങടെ ഭാഷ ശരിക്കും ശ്രേഷ്ഠമാവും. ഇന്നലെ തന്നെ ഞങ്ങളെ ഒരു സഹോദരന്‍ നിങ്ങടെ പേജില്‍ എഴുതിയില്ലേ, നിങ്ങള്‍ക്ക് മലയാളികളെ അറിയില്ല, ഇത്തിരി ചങ്കുറപ്പ് കൂടുതലാ, റഷ്യക്കാര് താങ്ങില്ല എന്നൊക്കെ. അത്രയേ എനിക്കും പറയാനുള്ളൂ.

അതിനാല്‍, ഇനിയെങ്കിലും ഞാന്‍ പറഞ്ഞ പി.എസ്.സി ഗൈഡ് വാങ്ങി പഠിച്ചോളുക. പറ്റുമെങ്കില്‍, അതിലെ സച്ചിന്റെ വിവരങ്ങള്‍ കാണാപ്പാഠം പഠിച്ച് അടുത്ത വണ്ടിക്ക് മുംബൈക്ക് കയറുക. വരുന്ന വിവരം ഫേസ്ബുക്കിലിട്ടാല്‍, നിങ്ങളെ ഫേസ്ബുക്കില്‍നിന്ന് പുറത്താക്കണമെന്ന ഞങ്ങളുടെ പ്രക്ഷോഭം നിര്‍ത്താമെന്ന് ഇന്നാട്ടിലെ മീശയുള്ളതും ഇല്ലാത്തതുമായ മുഴുവന്‍ ആമ്പിള്ളേരുടെ പേരിലും ഞാനിതാ അറിയിക്കുന്നു.

ഞങ്ങടെ നാട്ടിലെ ഒരു പഴഞ്ചൊല്ല് കൂടി പറഞ്ഞ് ഞാനിത് നിര്‍ത്താം.
അറിയാത്ത കുഞ്ഞ് ചൊറിയുമ്പോള്‍ അറിയും

സ്വന്തം
കെ.പി റഷീദ്

- See more at: http://www.asianetnews.tv/sports/article/13763_pen-letter-to-Maria-Sharapova-#sthash.MOVQyfAe.dpuf

സച്ചിന്റെ വിടവാങ്ങല്‍ പ്രസംഗം !!

സുഹൃത്തുക്കളെ ശാന്തരാവുക... നിങ്ങളെന്നെ കൂടുതല്‍ വികാരഭരിതനാക്കുകയാണ്. എന്റെ വര്‍ണശബളമായ യാത്ര ഇവിടെ അവസാനിക്കുകയാണെന്ന് വിശ്വസിക്കാന്‍ പ്രയാസം. ഒരുപാടുപരെ നന്ദിയോടെ സ്മരിക്കുകയാണ് ഞാന്‍ . ആദ്യം 1999ല്‍ എന്നെ വിട്ടുപിരിഞ്ഞുപോയ എന്റെ അച്ഛന്‍ തന്നെ. അച്ഛന്റെ മാര്‍ഗനിര്‍ദേശം ഇല്ലായിരുന്നെങ്കില്‍ ഇന്നിങ്ങനെ നിങ്ങളുടെ മുന്നില്‍ എനിക്കു നില്‍ക്കാന്‍ കഴിയുമായിരുന്നില്ല. സ്വപ്‌നങ്ങളെ തേടിപ്പോകാന്‍ എന്നെ പ്രേരിപ്പിച്ചത് അച്ഛനാണ്.

ലക്ഷ്യം എത്ര വിഷമകരമാണെങ്കിലും അത് കൈവരിക്കാനുള്ള ശ്രമം ഉപേക്ഷിക്കരുതെന്ന് അദ്ദേഹം എന്നെ ഉപദേശിച്ചു. അച്ഛന്റെ അഭാവം ഇന്നു ഞാന്‍ ശരിക്കും അനുഭവിക്കുന്നു. പിന്നെ അമ്മ. എന്നെപ്പോലൊരു വികൃതിപ്പയ്യനെ എങ്ങനെ കൈകാര്യം ചെയ്തുവെന്ന് പലപ്പോഴും അത്ഭുതപ്പെട്ടിട്ടുണ്ട് ഞാന്‍ . കളിച്ചു തുടങ്ങിയ കാലം മുതല്‍ അമ്മ എനിക്കു വേണ്ടി പ്രാര്‍ഥിച്ചുകൊണ്ടേയിരിക്കുകയായിരുന്നു. സ്‌കൂളില്‍ പഠിക്കുമ്പോള്‍ നാലു വര്‍ഷം ഞാന്‍ എന്റെ അമ്മാവനൊപ്പമായിരുന്നു താമസം. സ്വന്തം മകനെപ്പോലെയാണ് അമ്മാവനും അമ്മായിയും എന്നെ കണക്കാക്കിയത്. അധികം സംസാരിക്കാന്‍ ഇഷ്ടപ്പെടാത്ത ആളായിരുന്നു എന്റെ മൂത്ത സഹോദരന്‍ നിഥിന്‍ . പക്ഷേ ഏട്ടന്‍ പറയുമായിരുന്നു-എനിക്കറിയാം. നീയെന്ത് ചെയ്താലും അതിനുവേണ്ടി നൂറു ശതമാനവും പരിശ്രമിക്കുമെന്ന്. എന്റെ സഹോദരി സവിതയാണ് എനിക്ക് ആദ്യത്തെ ക്രിക്കറ്റ് ബാറ്റ് സമ്മാനിച്ചത്. ഇന്നും ഞാന്‍ ബാറ്റ് ചെയ്യുമ്പോള്‍ അവര്‍ ഉപവാസമിരിക്കും. മറ്റൊരു സഹോദരനായ അജിത്തും ഞാനും ഒരുപോലെ ക്രിക്കറ്റ് സ്വപ്‌നം കണ്ടു ജീവിച്ചവരാണ്. എനിക്കുവേണ്ടി സ്വന്തം കരിയര്‍ ത്യജിച്ചയാളാണ് അദ്ദേഹം. അചരേക്കറുടെ അടുക്കലേയ്ക്ക് എന്നെ ആദ്യമായി കൊണ്ടുപോയത് അദ്ദേഹമാണ്. കഴിഞ്ഞ ദിവസം രാത്രി പോലും എന്നെ വിളിച്ച് എന്റെ പുറത്താകലിനെ കുറിച്ച് ചര്‍ച്ച ചെയ്തു. കളിക്കാതിരുക്കുമ്പോഴും ഞങ്ങള്‍ ബാറ്റിങ് ടെക്‌നിക്കുകളെ കുറിച്ചാണ് ചര്‍ച്ച ചെയ്യാറുള്ളത്. ഇതൊന്നുമില്ലായിരുന്നെങ്കില്‍ ഞാന്‍ ഒരു സാധാരണ ക്രിക്കറ്റര്‍ മാത്രമായി ഒതുങ്ങിപ്പോകുമായിരുന്നു.

എന്റെ ജീവിതത്തിലെ ഏറ്റവും സുപ്രധാനമായൊരു കാര്യം 1990ല്‍ അഞ്ജലിയെ കണ്ടുമുട്ടിയതാണ്. ഡോക്ടര്‍ എന്ന നിലയില്‍ ഒരു വലിയ കരിയര്‍ അവരുടെ മുന്നിലുണ്ടെന്ന് എനിക്ക് അറിയാമായിരുന്നു. പക്ഷേ, എനിക്കു ക്രിക്കറ്റില്‍ തുടരാന്‍ വേണ്ടി അഞ്ജലി കുട്ടികളുടെ പരിചരണം ഏറ്റെടുക്കുകയായിരുന്നു. ഞാന്‍ പറഞ്ഞ എല്ലാ വിഡ്ഡിത്തങ്ങളും സഹിച്ച് എനിക്കൊപ്പം നിന്നതിന് അഞ്ജലിയോടു നന്ദി പറയുകയാണ്. പിന്നെ എന്റെ ജീവിതത്തിലെ ഏറ്റവും വിലപ്പെട്ട രണ്ടു രത്‌നങ്ങള്‍- സാറയും അര്‍ജുനും. അവരുടെ ഒരു പാട് പിറന്നാളാഘോഷങ്ങളിലും വിനോദയാത്രകളിലും പങ്കാളിയാകാന്‍ എനിക്കു കഴിഞ്ഞില്ല. കഴിഞ്ഞ 14-16 വര്‍ഷമായി നിങ്ങള്‍ക്കൊപ്പം വേണ്ടത്ര സമയം ചിലവിടാന്‍ കഴിഞ്ഞിട്ടില്ലെന്ന് എനിക്കറിയാം. അടുത്ത പതിനാറു വര്‍ഷം നിങ്ങള്‍ക്കൊപ്പം തന്നെ ഉണ്ടാകുമെന്ന് ഞാന്‍ ഉറപ്പു തരുന്നു.

പിന്നെ എന്റെ ഭാര്യയുടെ അച്ഛനമ്മമാര്‍ . അവരുമായി ഒരുപാട് കാര്യങ്ങള്‍ ഞാന്‍ ചര്‍ച്ച ചെയ്യാറുണ്ട്. അവര്‍ ചെയ്ത ഏറ്റവും വലിയ കാര്യം എന്നെ വിവാഹം കഴിക്കാന്‍ അഞ്ജലിയെ അനുവദിച്ചു എന്നതാണ്. കഴിഞ്ഞ ഇരുപത്തിനാലു വര്‍ഷമായി എന്റെ സുഹൃത്തുക്കളും വിലമതിക്കാനാവാത്ത സംഭാവനയാണ് നല്‍കിയത്. ഞാന്‍ സമ്മര്‍ദത്തിലായപ്പോഴെല്ലാം അവര്‍ എനിക്കൊപ്പം നിന്നു. ഞാന്‍ പരിക്കിന്റെ പിടിയിലായപ്പോള്‍ പുലര്‍ച്ചെ മൂന്നു മണിവരെ എനിക്കൊപ്പം ഇരിക്കാന്‍ അവര്‍ തയ്യാറായി. എന്നോടൊപ്പം നിന്നതിന് എല്ലാവര്‍ക്കും നന്ദി.

പതിനൊന്ന് വയസ്സുള്ളപ്പോഴാണ് എന്റെ കരിയര്‍ ആരംഭിച്ചത്. അചരേക്കള്‍ സാറിനെ ഗ്യാലറിയില്‍ കാണുമ്പോള്‍ വല്ലാത്തൊരു സന്തോഷമുണ്ട്. അദ്ദേഹത്തിന്റെ സ്‌കൂട്ടറില്‍ യാത്ര ചെയ്ത് ദിവസവും രണ്ടു മത്സരങ്ങള്‍ വരെ കളിച്ച കാലമുണ്ടായിരുന്നു. ഞാന്‍ കളിക്കുന്നുവെന്ന് ഉറപ്പാക്കാന്‍ അദ്ദേഹം എല്ലായിടത്തും എന്നെ നേരിട്ടു കൊണ്ടുപോയി. ഞാന്‍ അമിതാത്മവിശ്വാസത്തിന്റെ പിടിയിലാവാതിരിക്കാന്‍ ഒരിക്കല്‍പ്പോലും നന്നായി കളിച്ചുവെന്ന് അദ്ദേഹം എന്നോടു പറഞ്ഞിട്ടില്ല എന്നതാണ് രസകരം. സര്‍, ഞാന്‍ കളിക്കാത്തതിനാല്‍ ഇനി എന്തു ഭാഗ്യപരീക്ഷണത്തിനും മുതിരാം.


മുംബൈയിലാണ് എന്റെ കരിയര്‍ ആരംഭിച്ചത്. പുലര്‍ച്ചെ നാലു മണിക്ക് ന്യൂസീലന്‍ഡില്‍ നിന്നു മടങ്ങിയെത്തി പിറ്റേന്നു തന്നെ രഞ്ജി ട്രോഫിയില്‍ കളിച്ചത് ഓര്‍മയുണ്ട്. അരങ്ങേറ്റം മുതല്‍ തന്നെ ബി.സി.സി.ഐ. വലിയ പിന്തുണയാണ് എനിക്കു നല്‍കിയത്. എല്ലാ സെലക്ടര്‍മാരോടും നന്ദിയുണ്ട്. എനിക്ക് മതിയായ ചികിത്സ ലഭ്യമാക്കിയുമെല്ലാം നിങ്ങള്‍ എപ്പോഴും എനിക്കൊപ്പം തന്നെ നിലകൊണ്ടു. നന്ദി, എനിക്കൊപ്പം കളിച്ച എല്ലാ മുതിര്‍ന്ന കളിക്കാര്‍ക്കും. ഇപ്പോള്‍ ഇവിടെയില്ലാത്ത രാഹുല്‍ , വി.വി.എസ്, സൗരവ്, അനില്‍ തുടങ്ങിയവരെയെല്ലാം ഇപ്പോള്‍ സ്‌ക്രീനില്‍ കാണാം. എല്ലാ പരിശീലകരെയും എന്റെ നന്ദി അറിയിക്കുകയാണ്. രാജ്യത്തെ പ്രതിനിധാനം ചെയ്യുന്നതില്‍ നമ്മളെല്ലാം അഭിമാനിക്കുന്നു. തുടര്‍ന്നും അഭിമാനത്തോടെ തന്നെ രാഷ്ട്രത്തെ സേവിക്കാനാവുമെന്നാണ് പ്രതീക്ഷ. യഥാര്‍ഥ സത്തയില്‍ തന്നെ നിങ്ങള്‍ ഈ രാജ്യത്തെ സേവിക്കുമെന്നു തന്നെയാണ് എന്റെ വിശ്വാസം എന്നായിരുന്നു എം.എസ്. എനിക്ക് ഇരുന്നൂറാം ടെസ്റ്റ് തൊപ്പി സമ്മാനിച്ചപ്പോള്‍ ഞാന്‍ പറഞ്ഞത്.

എന്റെ ഫിറ്റ്‌നസ് ഉറപ്പാക്കിയ ഡോക്ടര്‍മാരോട് നന്ദി പറഞ്ഞില്ലെങ്കില്‍ അതൊരു വലിയ വീഴ്ചയായിരിക്കും. എന്റെ പരിക്കുകളുടെ ഗൗരവം കണക്കിലെടുത്ത് പാതി രാത്രി വരെയിരുന്ന് ചികിത്സിച്ചിട്ടുണ്ട് അവര്‍ .

എന്റെ സുഹൃത്ത് അന്തരിച്ച മാര്‍ക്ക് മസ്‌കരേനസിന്റെ അഭാവം ഞാന്‍ അനുഭവിക്കുന്നു. മാര്‍ക്കിന്റെ ജോലി തുടര്‍ന്നും നിര്‍വഹിച്ച ഇപ്പോഴത്തെ മാര്‍ക്കറ്റിങ് ടീമായ ഡബ്ല്യു. എസ്.ജിയോടും എന്റെ നന്ദി അറിയിക്കുകയാണ്. കഴിഞ്ഞ പതിനാലു വര്‍ഷമായി എനിക്കൊപ്പം ചേര്‍ന്നു പ്രവര്‍ത്തിച്ച ഒരാളാണ് വിനയ് നായിഡു.

സ്‌കൂള്‍ കാലം തൊട്ട് ഇന്നുവരെ മാധ്യമങ്ങള്‍ എനിക്കും വലിയ പിന്തുണയാണ് നല്‍കിയത്. എന്റെ കരിയറിലെ അസുലഭാവസരങ്ങള്‍ ഒപ്പിയെടുത്ത ഫോട്ടോഗ്രാഫര്‍മാരോടും നന്ദിയുണ്ട്.

പ്രസംഗം നീണ്ടുപോയെന്ന് എനിക്കറിയാം. എങ്കിലും ലോകത്തിലെ വിവിധ ഭാഗങ്ങളില്‍ നിന്നും ഇവിടെ എത്തിച്ചേര്‍ന്ന എല്ലാവരോടും ഞാന്‍ എന്റെ നന്ദി അറിയിക്കുകയാണ്. എന്റെ ആരാധകരെയും ഞാന്‍ ഹൃദയംഗമായ നന്ദി അറിയിക്കുകയാണ്. അവസാനശ്വാസം വരെ സച്ചിന്‍, സച്ചിന്‍ എന്ന ആരവും എന്റെയുള്ളില്‍ ഇരമ്പിക്കൊണ്ടേയിരിക്കും.



courtesy - mathrubhumi - http://www.mathrubhumi.com/sports/story.php?id=406965

സച്ചിന്‍ ഔട്ടായോ?

സച്ചിന്‍...ക്രിക്കറ്റ് എന്താണെന്നു മനസ്സിലാക്കിയ കാലത്ത് ആദ്യം നെഞ്ചിലേറ്റിയ പേര്...സച്ചിന്‍..ഇന്ത്യന്‍ ക്രിക്കറ്റിന്റെ അവസാന വാക്കായിരുന്ന സച്ചിന്‍.. അനേകായിരം ഇന്ത്യക്കാരുടെ ആവേശവും വികാരവുമായ സച്ചിന്‍.. സ്വന്തം പിതാവ് മരണപ്പെട്ടത്തിന്റെ തൊട്ടടുത്ത ദിവസം പോലും ഇന്ത്യക്ക് വേണ്ടി കളിക്കളത്തില്‍ ഇറങ്ങിയ സച്ചിന്‍.. ഒരു പാട് അമ്മമാരുടെ പ്രാര്‍ത്ഥനയും സ്നേഹവും ലഭിച്ച ആ ഇതിഹാസം One Day International Cricket- ന്റെ പടിയിറങ്ങുന്നു..



ഞാനൊക്കെ ക്രിക്കറ്റ് കണ്ടു തുടങ്ങിയ സമയത്ത് സച്ചിന്‍ മാത്രമേ ഉള്ളു മനസ്സില്‍, ഇന്ത്യയുടെ കളി ഉള്ള ദിവസം സ്കൂളില്‍ നിന്നും കോളേജില്‍ നിന്നുമൊക്കെ നേരത്തെ വന്നു ടിവിയുടെ മുന്പില്‍ ഇരുന്നിരുന്ന ആ കാലം , അന്നൊക്കെ കളിയുടെ ഇടക്ക് വെച്ച് ആര് കയറി വന്നാലും ആദ്യം ചോദിക്കുക “സച്ചിന്‍ ഔട്ടായോ? “എന്നായിരുന്നു, ഒരു തലമുറ കേട്ട് വളര്‍ന്ന ചോദ്യം, കാരണം അന്ന് ഇന്ത്യന്‍ ടീം എന്ന് വെച്ചാല്‍ സച്ചിന്‍ ആയിരുന്നു, സച്ചിന്‍ പുറത്തായാല്‍ ഇന്ത്യ തോറ്റിരുന്ന കാലം, തന്റെ പത്താം നമ്പര്‍ ജേര്സി് അണിഞ്ഞു സച്ചിന്‍ ഇറങ്ങുമ്പോള്‍ ഒരേ സമയം എത്ര ഇന്ത്യക്കാരായിരുന്നു ആ കളി കാണാന്‍ ടിവിയുടെ മുന്പില്‍ ഇരുന്നിരുന്നത്, കൊച്ചു കുട്ടികള്‍ മുതല്‍ വയസ്സായ ആളുകള്‍ വരെ, ക്രിക്കറ്റ് എന്ന കളി പൂര്ണ്ണ മായും അറിയാത്തവര്ക്ക് പോലും സച്ചിന്‍ പ്രിയപ്പെട്ടവനായിരുന്നു.

സച്ചിന്‍ ഫോം ആയാല്‍ പിന്നെ കളി ജയിച്ചു എന്ന് വിശ്വസിച്ചിരുന്നു ഞാന്‍ അടക്കം എല്ലാവരും. സച്ചിന്‍ ഔട്ടായാല്‍ കളി നിര്‍ത്തി പോയിരുന്ന ഒരാളായിരുന്നു ഞാന്‍ . സച്ചിന്റെ കൂടെ കളിയ്ക്കാന്‍ എത്രയോ കളിക്കാര്‍ മാറി മാറി വന്നു, പക്ഷെ ഒരു മാറ്റവും കൂടാതെ വര്ഷങ്ങളോളം സച്ചിന്‍ മറ്റേ അറ്റത്തു നിലയുറപ്പിച്ചു തന്നെ നിന്നു.എത്രയോ ഫോര്‍, എത്രയോ സിക്സ്..അതില്‍ നിന്നും പിറന്ന എത്രയോ സെഞ്ച്വറികള്‍ , എത്രയോ ഹാഫ് സെഞ്ച്വറികള്‍ ..4+6= 10dulkar എന്ന ഒരു പ്രയോഗം തന്നെ നിലവില്‍ വന്നില്ലേ?

ഈ കോഴ വിവാദം വന്നു ക്രിക്കറ്റ് എന്ന മഹത്തായ കളിയുടെ അന്തസിനും അഭിമാനത്തിനും കോട്ടം തട്ടിയ നാളുകളിലും ഒരു വിവാദത്തിലും പെടാതെ സച്ചിന്‍ മാറി നിന്നു.സ്വന്തം വ്യക്തിത്വം കാത്തു സൂക്ഷിച്ചു കൊണ്ടാണ് അദ്ദേഹം ഇത് വരെ മുന്പോട്ട് പോയത് , അന്ന് സച്ചിന്റെ കൂടെ കളിച്ചിരുന്ന പലരും വിവാദത്തില്‍ പെട്ട് ടീമിന് പുറത്ത്‌ പോയി,പലരും വിരമിച്ചു,അതിനു ശേഷം എത്രയോ പുതുമുഖങ്ങള്‍ ഇന്ത്യന്‍ ടീമില്‍ വന്നു, യുവരാജ്‌ മുതല്‍ അജിന്ഗ്ഗെ രഹാനെ വരെ എത്രയോ പേരുടെ കൂടെ സച്ചിന്‍ കളിച്ചു. നേടാന്‍ കഴിയാതെ പോയ ലോക കപ്പിലും മുത്തമിടാനുള്ള ഭാഗ്യം സച്ചിനുണ്ടായി. പല മത്സരങ്ങളിലും സച്ചിന്റെ പ്രകടനം കൊണ്ട് മാത്രം ടീം ഇന്ത്യ വിജയിച്ചു.

സച്ചിന്റെ കാലം കഴിഞ്ഞു എന്ന് പറഞ്ഞവരോട് ബാറ്റ് കൊണ്ട അദ്ദേഹം മറുപടി കൊടുത്തു. കൂടെ കളിച്ചിരുന്നവരോടും എതിര്‍ ടീമില്‍ ഉള്ളവരോടും ഇത്രയധികം വിനയത്തോടെ പെരുമാറുന്ന മറ്റൊരു കളിക്കാരന്‍ ഉണ്ടോ എന്ന് സംശയമാണ്.ഒളിമ്പിക്സില് ഇന്ത്യക്ക് വേണ്ടി മെഡല്‍ നേടിയ സൈനയ്ക്ക് ആന്ധ്രപ്രദേശ് സ്പോര്‍ട്സ് അസോസിയേഷന്റെ സമ്മാനമായ BMW കാര്‍ സമ്മാനിച്ചപ്പോള്‍ അത് നല്കാന്‍ സച്ചിനെ ക്ഷണിച്ചത് ഈ അവസരത്തില്‍ ഓര്മ്മിക്കട്ടെ. രാജ്യസഭയിലേക്ക്‌ തിരഞ്ഞെടുക്കപ്പെട്ട അദ്ദേഹം ഗവണ്മെന്റ് ബംഗ്ലാവ് വേണ്ട എന്ന് പറഞ്ഞത്‌ വാര്‍ത്തകളില്‍ നിറഞ്ഞു നിന്നിരുന്നു.ഇന്ത്യന് നേവി territorial army മെമ്പര്‍ഷിപ്‌ കൊടുത്ത് ആദരിച്ച ഒരു കളിക്കാരന്‍ കൂടിയാണ് നമ്മുടെ പ്രിയപ്പെട്ട സച്ചിന്‍ രമേശ്‌ ടെണ്ടുല്‍ക്കര്‍ !!

കളിക്കളത്തിലും പുറത്തും ഒരു പോലെ മാന്യത പുലര്ത്തുന്ന ആളാണ് സച്ചിന്‍, ഒരു ലിക്കര്‍ കമ്പനിയുടെ ഇരുപതു കോടിയുടെ ഓഫര്‍ നിരസിച്ച ആളാണ് അദ്ദേഹം‍.സച്ചിന്‍ അത് അന്ന് ചെയ്തിരുന്നെകില്‍ ഇന്ത്യയില്‍ ഒരു കളിക്കാരന് പരസ്യ ഇനത്തില്‍ കിട്ടുമായിരുന്ന കൂടിയ തുക ആയേനെ അത്.എന്നാല്‍ നാടിനെ നശിപ്പിക്കുന്ന മദ്യം വില്ക്കാനുള്ള അങ്ങിനെയൊരു പരസ്യം ചെയ്യാന്‍ അദ്ദേഹം തയ്യാറായില്ല.പണത്തിനു വേണ്ടി എന്തു പരസ്യവും ചെയ്യാന്‍ തയ്യാറായി നില്ക്കുവന്ന ഇന്നത്തെ കളിക്കാര്‍ സച്ചിന്റെ ഈ നിലപാട് കണ്ടു മനസ്സിലാക്കണം

അതിനു പകരം അദ്ദേഹം ചെയ്ത പരസ്യങ്ങള്‍ എല്ലാം കുട്ടികളുടെയും സാധാരണക്കാരുടെയും പ്രിയപ്പെട്ടതായി മാറി,പരസ്യത്തിലെ ഗാനങ്ങള്ക്കൊപ്പം ഞങ്ങള്‍ ഇരുന്നു കയ്യടിച്ചത് എനിക്കോര്‍മ്മയുണ്ട്, ആ കയ്യടി സച്ചിനോടുള്ള ആരാധന ആയിരുന്നു, പതിനേഴോളം ഉല്പന്നങ്ങളുടെ പരസ്യത്തില്‍ നമ്മള്‍ സച്ചിനെ കണ്ടിട്ടുണ്ട് എന്ന് നിങ്ങള്‍ക്കറിയാമോ? പെപ്സി പോലുള്ള പാനീയങ്ങള്‍ ഇന്ത്യയില്‍ ജനകീയമായത് സച്ചിനിലൂടെയാണ് എന്ന് ഞാന്‍ വിശ്വസിക്കുന്നു. ആലാരെ സച്ചിന്‍ ആലാരെ എന്ന പരസ്യമൊക്കെ മധുരമുള്ള ഒരു ഓര്‍മ്മയായി ഇന്നും മനസ്സിലുണ്ട്. അദ്ദേഹം ചെയ്ത അത്തരം ചില പരസ്യങ്ങളില്‍ മികച്ച അഞ്ചെണ്ണം താഴെ ചേര്ക്കുന്നു.

ഒഴിവ് ദിവസങ്ങളില്‍ കൂട്ടുകാരുടെ കൂടെ കുടിച്ചു ഉല്ലസിച്ചു നടക്കാതെ തന്റെ കുടുംബത്തോടൊപ്പം കഴിയാന്‍ ഇഷ്ട്ടപെടുന്ന ആളാണ് സച്ചിന്‍. തന്റെ ഭാര്യാ അഞ്ജലിയോടും, മക്കള്‍ സാറയോടും അര്‍ജുനോടും ഒത്തു ചേര്ന്ന് തികഞ്ഞ ഒരു കുടുംബനാഥനായി അദ്ദേഹംഅവരുടെ കൂടെ സമയം ചിലവഴിക്കുന്നു.

ഈ അടുത്ത കാലത്ത്‌ ഫേസ്ബുക്കിലും അദ്ദേഹം സജീവമായി,കൂടാതെ ട്വിറ്ററിലും നിങ്ങള്ക്ക് അദ്ദേഹത്തെ ഫോളോ ചെയ്യാവുന്നതാണ്. (@sachin_rt.)അദ്ധേഹത്തിന്റ ഫേസ് ബുക്ക്‌ പ്രൊഫൈല്‍ താഴെ ചേര്ക്കുന്നു.
https://www.facebook.com/SachinTendulkar/info

എന്നും റെക്കോര്ഡുകളുടെ കൂട്ടുകാരനായിരുന്നു സച്ചിന്‍, ബാറ്റിങ്ങില്‍ എന്ന പോലെ ബോളിങ്ങിലും ഫീല്ടിങ്ങിലും അദ്ദേഹം കാണിച്ചിരുന്ന മികവ് എല്ലാവര്ക്കും അറിയാവുന്നതാണ്, അതിനെ കുറിച്ച് വിശദീകരിക്കാന്‍ ഈ ബ്ലോഗ്‌ പോസ്റ്റ്‌ മതിയാകില്ല, അത് കൊണ്ട് അദ്ധേഹത്തിന്റെ ഇത് വരെയുള്ള ഒരു കരിയറിന്റെ ഒരു ചുരുക്കം താഴെ ചേര്ക്കുന്നു. ( from wikipedia).

സച്ചിന്റെ ഈ റെക്കോര്ഡുകളുടെ ഏഴയലത്ത് എത്താന്‍ ഇന്നത്തെ കളിക്കാര്ക്ക് കഴിയുമോ എന്നത് സംശയമാണ്, അല്ലെങ്കില്‍ തന്നെ സച്ചിന്‍ കളിച്ച അത്രയും കാലം കളിയ്ക്കാന്‍ ആര്ക്കു സാധിക്കും എന്നത് ഒരു ചോദ്യമായി അവശേഷിക്കുന്നു. അത് കൊണ്ടാണല്ലോ ക്രിക്കറ്റിനെ ഒരു മതമായി കാണുന്ന ഇന്ത്യയില്‍ സച്ചിനെ അതിന്റെ ദൈവമായി കാണുന്നത്.

സച്ചിന്‍ പോകുമ്പോള്‍ ടീമിന് നഷ്ട്ടപെടുന്നത് മികച്ച ഒരു കളിക്കാരനെ മാത്രമല്ല, ഗ്രൌണ്ട് മുഴുവന്‍ നിറയുന്ന പ്രസരിപ്പും, ടീമിന് മുഴുവന്‍ പോസിറ്റീവ് എനര്‍ജി നല്‍കുന്ന ഒരു ശക്തികേന്ദ്രം കൂടിയാണ്,ഒപ്പം മറ്റ് ടീമുകള്‍ക്ക് എതിരെയുള്ള ഇന്ത്യയുടെ തുരുപ്പ് ചീട്ടും. പുതിയ കളിക്കാര്‍ക്ക് സച്ചിന്‍ നല്‍കുന്ന പ്രോത്സാഹനം നമ്മുടെ ശ്രീശാന്ത് ഉള്‍പ്പെടെ പല കളിക്കാരും പറഞ്ഞു നമ്മള്‍ കേട്ടിട്ടുണ്ട്. സച്ചിനെ കുറിച്ച് പ്രശസ്തരായ കുറച്ചു പേര്‍ പറഞ്ഞത്‌ കൂടെ ചേര്‍ക്കാതെ ഇത് പൂര്‍ണ്ണമാകില്ല.അത് താഴെ ചേര്‍ക്കുന്നു

പണ്ട് സച്ചിന് ജയ് വിളിച്ചവര്‍ ഉള്‍പ്പെടെ പലരും ഇന്ന് സച്ചിന് കളി നിര്ത്തണം എന്ന് പറഞ്ഞു മുറവിളി കൂട്ടി, എന്തായാലും അവര്‍ക്കൊക്കെ ഇനി സമാധാനമായി വീട്ടില്‍ ഇരിക്കാം,കളി കാണാം,പക്ഷെ സച്ചിന്‍ കളി നിര്‍ത്തിയാല്‍ ക്രിക്കറ്റ് എന്ന കളി കാണുന്നത് തന്നെ നിര്‍ത്തും എന്ന് തീരുമാനിച്ച കുറെ പേരുടെ, സാധാരണക്കാരായ ഒരു പാട് ഇന്ത്യക്കാരുടെ മനസ്സില്‍ സച്ചിന്‍ എന്നും നില നില്‍ക്കും.

നന്ദി..സച്ചിന്‍..നന്ദി.. ഞങ്ങളെ ത്രസിപ്പിച്ച ഓരോ നിമിഷങ്ങള്‍ക്കും.. ഞങ്ങള്‍ അഭിമാനത്തോടെ ഓര്‍ക്കുന്ന ഓരോ വിജയങ്ങള്‍ക്കും .. താങ്കളുടെ കാലഘട്ടത്തില്‍ ജീവിക്കാന്‍ കഴിഞ്ഞു എന്നതില്‍ ഞാന്‍ അഭിമാനിക്കുന്നു. ഇത് പോലൊരാള്‍ ഇനി ഉണ്ടാകില്ല..തീര്‍ച്ച..കാരണം ഇതിഹാസങ്ങള്‍ പുനര്‍ജനിക്കാറില്ല !!